СКФО В Дагестане временно закрыли зоопарк из-за отсутствия лицензии СКФО Где поесть том ям в Черкесске СКФО В Чеченском педколледже состоялся «Вечер нашидов» СКФО В Ингушетии назвали победителей конкурса «Большие вызовы» Актуально «Единая Россия» проведет «Диктант Победы» на суше, в море и в небе

ЖВЛАРА БЗАЗАРА

15.03.2019 269
ЖВЛАРА БЗАЗАРА
АГIАРШIЫЦХРА АКЪАРУ ШIАКВА АТАХЪЫПI Черкесск апны «Обновление. Лидерство. Открытость» ахьызта йапшым ахабзалыхра органква рдепутатква райззара акIвшатI. Ауи анхара далан «Единая Россия» политика партия йхIаракIу а-Совет йалу, КЧР а-Хъада ТЕМРЕЗОВ Рашид Бориспи йпа. Ари айззара апны уыс хъадата йгIащтIырхыз цIыпх декабрь агIан Москва йакIвшаз «Единая Россия» партия й-VIII-хауа асъезд йылнахыз ахачIвква ракIвпI. Темрезов Рашид 17 сквша цIуата «Единая Россия» хъгалра зму партията йшщаквгылыз гIаликIгIатI, ауи агIаджвыквцIарала акъраль ахъазлагьи, абзазагIвчва рыхъазлагьи апсахра бзиква шаъу гIайырбатI. ХIреспублика аунашвачпагIв а-Федеральна Айззара йазцауа Россия Федерация а-Президент Путин Владимир йтшазынархара апны ауагIахъа проектква рыхъазла аджьауапкIра «Единая Россия» йшахъвдакву шгIайырбаз, аштаква рпынгьи ауи апартия аджьауапкIра рахIагьи йшалахIауа йхIватI. – АкъральгIвчва ргIальаматраква хIрызгылазара, ауагIа рбзазаща агъьчIвра хIазынхара, дасу йуыс йнардзата йырхъйара хIборчпI, – йхIватI Темрезов Рашид. – ЙхIхауа ауысква ажвлара ахагIвазазларныс, ауагIа ргвбжара гIдырра ахъазла «Я нужен своей республике» проект джвыквхIцIитI. Ауи хIкъраль а-Президент хIгватра ззынайырхаз абаргвыраква ррыдзра йазалхпI. Ауи апроект рахIа йауацIыхта дгIаквчважватI «Единая Россия» ашIыпIа хъвшара а-Исполком знапIыцIу Джамбаев Руслан. – АуагIа зынйауа асоциальна баргвыраква алзыргуш, апатриот бжьара йазынхуш Квта адхIкIылитI, – йхIватI ауи. – РыцхIагIакI, баргвыракI йанйауа йыцызкIуаш уагIа шаъу йылайхIвара атахъыпI, йгвалымсым акъральгIвчва ауи апроект йгIалалырныс, ргвчIагIвра гIадырбарныс рылшуштI. КЧР АуагIа Айззара (а-Парламент) а-Председатель Иванов Александр хIзаман ауагIа рджьгарра шщтIыцIуа, апартия йгьи акъральыгIва органква рахьылагьи ауат йрыму азцIгIараква йшрылахIауа гIаликIгIатI. – АлхыгIвчва, абзазагIвчва разхъацIара гIахIырцIабыргуата ауагIа рбжараква ррыдзра хIазынхузтын, ауагIа йраргвану хIдепутатызлуштI. АхъатачIв джьауапкIра йахъазымкIва апартия шабгу ахьызла хIшынхауа зынгьи йхIхъаштылра гьатахъым, – йхIватI Иванов Александр. Айззара йгIвбахауа ах ъвы азцIгIараквали аджьауапквали йалан. КЧР а-Хъада Темрезов Рашид адепутатква абжараква гIащтIырхра йахъазымкIва ауат ррыдзрала амальква гIараура шатахъу гIаликIгIатI. – ХIуагIа рбзазаща агъьчIвра йазынхауа зымгIва хIадкIылазлара амагIны дупI. Адепутат ахIбачва ршвапха байа гIахIрысабапра, згвы цхIауа ашIаква ркъару гIахIыдхIкIылра атахъыпI, – йхIватI Темрезов Рашид. – Кытипхьадза йджьгару чкIвыныргIа аъапI, ауат хIара йгIахIыцIагылырныс, анахьанат апартияква йырцхърагIарныс, хIреспублика атшауацIыхра йазынхарныс йхIазырпI. ЧКIВЫНЫРГIА РГIАДЖВЫКВЦIАРАКВА ЙРЫЦЫРКIИТI Темрезов Рашид ЛагъьКIавкIаз къральыгIва гуманитар-технология академия апны чкIвыныргIа дрынйатI. Анйара йалан агвчIагIвра адкIылараква ргIащтийыгIвчва, аволонтерква. АшIаква гвчIагIвра йгьи жвлара уыста йдырхъйауа КЧР а-Хъада дахадыргIвазатI, апхъахьыла мурадта йгьи хачIвыта йрыму гIархIватI. – Асквш 2018 РФ а-Президент Путин Владимир аволонтерква йрыСквшта йщаквйыргылтI. ЦIыпх Россияла, КъарчаЧеркесла аволонтерква злу анйара, айззара, гвчIагIвра акция щарда акIвшатI, – йхIватI Темрезов Рашид. – Ари асквш апынгьи ауат анхараква гьашIасуам. АшIаква ркъару, рджьауапкIра хIкъраль апхъаламгIвайсра йартырныс йхIазырпI, чкIвыныргIа рпатриотра щтIыцIитI. УахьчIвала аволонтерква йдырхъйауа ауысква зымгIва рмагIны дупI – сабикI йа тажвлыгажвкI йырцхърагIазтынгьи, зпшвыма зчвыдзыз лакI гIархчазтынгьи, йъабзазауа апшцIа аныргIалра йазынхузтынгьи, рыцхIагIакI йалашваз йзыгвжважвузтынгьи – абанпара шIа ргвалымсра гIадырбитI, абзазаща агъьырчIвырныс йащтапI. ХIреспублика апны йакIвшалакIгьи аволонтерква швхIыцIагылапI, ауи ахъазла швабыжта сшвзыразпI. Згвы былуа, зкъару йазхIауа цхърагIагIв хIымазтын, хIуачIвымш рахIа йшагъьхуш йазхъахIцIитI. Темрезов Рашид «Теплая забота» проект агIаджвыквцIагIв, хъацIакIырта змам рырчара адызгалуа Баев Сергей, «Мой ангел» гвчIагIвра фонд гIанзыршаз Байрамкулова Светлана, «Шарпны» абаза чкIвыныргIа радкIылара гIанзыршаз Джьмакъвыл Бэла, «Адыге Хасэ» чкIвыныргIа рхъвшара знапIыцIу Жужуев Тимур, «Территория милосердия 09» фонд анхагIвы Кубекова Нузула, «Всероссийский Красный крест» ахъвшара знапIыцIу Рощупкина Елена, «Общество без наркотиков» реабилитация Квта гIанзыршаз Страх Виктор, «Кавказский донор» проект адгалагIв Узденов Ибрагим, «Бег ради жизни» проект абзазара йалазжьуа Хакирова Ася аразыра швъаква риттI. 
269 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный