Кавказым щыпсэу адыгэхэмкIэ мы илъэсыр хьэщIэкIэ къулейуэ къыщIэкIащ. Апхуэдэу, накъыгъэ мазэм щыщIэдзауэ мызэ-мытIэу я Хэкужь къэкIуащ хамэ къэралхэм зэбгырыдзауэ щыпсэу адыгэхэр. Псом хуэмыдэу, ди лъэпкъэгъухэр нэхъыбэу къикIащ Тырку къэралым. Мы махуэхэми я Хэкужь ялъагъуну, лъэпкъэгъухэм я щэнхабзэм, хабзэм IупщI, нэхъ гъунэгъу зыхуащIыну къэкIуащ Тыркум щыщ щIалэгъуалэ гуп. Ахэр Тыркум щыIэ жылагъуэ зэгухьэныгъэхэм я кавказ федерацэ КААФФЕД-м къигъэкIуащ. Тыркум цIыхуи 9 къикIащ. Ахэр чэзуурэ щыIэнущ Къэбэрдей-Балъкъэрым, Къэрэшей-Черкесым, Адыгэ Республикэм, Абхъазым. ШыщхьэIум (августым) и 11-12-м щIалэгъуалэ гупыр ди хэгъуэгум щыхьэщIащ. Абыхэм япежьащ Адыгэ Хасэм хэт нэхъыжьхэр, щIалэгъуалэр. Япэу, хьэщIэхэр ирагъэблэгъащ Адыгэ Хасэм и хэщIапIэм. Абдеж нэхъыжьхэм къабгъэдэкIыу псалъэ гуапэкIэ къэблэгъа ныбжьыщIэхэм зыхуагъэзащ. Апхуэдэу, КъЧР-м и «Адыгэ Хасэ – Черкесский Парламент» жылагъуэ зэщIэхъееныгъэм и тхьэмадэ Шэрджэс Мухьэмэд хьэщIэхэм захуигъэзащ гур зыгъэфI, мыхьэнэ зыщIэлъ псалъэхэмкIэ. 
- ФIэхъусыж вжыдоIэ! Мыр дэ зэрыдищIыгум хуэдэу фэри фи щIыгущ, фи Хэкущ! Мыр дэ тхъума щIыгущ, щIэтхъумари ди лъэпкъращ. Дэнэ хамэ къэрали щыпсэу адыгэхэм ящIэну сыхуейщ мыр я щIыгуу зэрыщытыр, ахэр къиздикIар ягу ирагъэлъыну, я Хэкужь къагъэзэжын зэрыхуейр къагурыIуэну, – жиIащ Шэрджэс Мухьэмэд. КъинэмыщIауэ, Хасэ тхьэмадэм къыхигъэщащ зэкIэщIэдзауэ псэу, зы унагъуэцIэ зезыхьэ адыгэхэр мыпхуэдэ зэкIэлъыкIуэкIэхэм зэрызэпащIэжынур. Къыхэгъэщыпхъэщ, Хэкум къеблэгъа хьэщIэхэр Адзынхэ, Мэрэтыкъуэхэ, Уэзхэ, Дохъушокъуэхэ, КуэщIасэхэ, нэгъуэщI лъэпкъхэм ящыщу зэрыщытыр. ЩIалэгъуалэр игъэгушхуащ «ЩIалэгъуалэ Адыгэ Хасэ» жылагъуэ зэщIэхъееныгъэм и тхьэмадэ Жу Тимури. - Нобэ япэу фи Хэку лъапэкIэ фыкъихьэжащ, ауэ дяпэкIэ фхузэфIэкIыу къэвгъэзэжынкIэ дыфщогугъ. Нобэ нэхъ дызэкIэлъыкIуэф хъуащ, ари зы гуфIэгъуэщ. Ауэ дыхуейт адыгэбзэм нэхъ фегугъуну, ар фымыутIыпщыну. Адыгэр дунейм тет нэхъ лъэпкъыжь дыдэхэм ящыщщ. Абы куэд и фэм дэкIащ, куэд ишэчащ. Иджы а псор зыхуашэча щIэблэм и бзэр хуэмурэ IэщIокI. НобэкIэ адыгэм и нэхъыбэр Тыркуращ зэрысыр. Хэкум мащIэ дисми, ди бзэр тхъумэфащ. Ауэ псом нэхърэ нэхъыбэ адыгэ здыщыпсэу къэралым деж бзэм епха Iуэхухэр щIагъуэкъым. Бзэр зэвмыгъэщIэжмэ, лъэпкъыр зэрыс къэралым и цIыхухэм хэшэпсыхьыжынущ. Дэ, Хэкум щыпсэухэр, зыфхудогъазэ, дыволъэу: бзэр фхъумэ, фрипсалъэ! Адыгэм и къэкIуэнур фэ щIалэгъуалэращ зэлъытар, – жиIащ Жу Тимур. 
КъинэмыщIауэ, Жум къыхигъэщащ «СirсassiaTV» интернет-сайтыр «ЩIалэгъуалэ Адыгэ Хасэм» зэрагъэхьэзырыр, ар адыгэбзэкIэ гъэпсауэ зэрыщытынур. ИужькIэ щIалэгъуалэр ди хэгъуэгум и къалащхьэм дашащ. Нэхъ пщыхьэщхьэ хуэгъазэу, хьэщIэхэм папщIэ Адыгэ Джэгу дахэ зэхаублащ. Абдеж IупщIу щыплъагъуфынут хьэщIэхэмрэ Хэкум щыпсэу адыгэхэмрэ я къафэкIэр зыкIи зэрызэщхьэщымыкIыр, зы хабзэ, зы щэнхабзэ зэрызетхьэр. ХьэщIэу къеблэгъахэм зэрыжаIамкIэ, ахэр куэд щIауэ ехъуапсэт Хэкужьым къэкIуэну, я адэжь щIыгум я лъэр теувэну. КъинэмыщIауэ, абыхэм къыхагъэщащ мыбдеж щыпсэу я лъэпкъэгъухэр я псэм къызэрищтэр, хуабжьу ягу зэрырихьыр. Джэгу нэужьым Тыркум къикIа ди лъэпкъэгъухэр Хьэбэз районымкIэ яшащ. Абыхэм «Iэдииху» деж зыщрагъэплъащ, жэщи абдеж щагъыIащ. ЕтIуанэрей махуэм, пщIэдджыжьым жьыуэ хьэщIэхэр Домбей дашащ. Мы махуэхэм хьэщIэхэм ящIыгъуащ, нэIуасэ зыхуащIащ ди хэгъуэгум щыщ ныбжьыщIэхэри. ЩIалэгъуалэр зэдэуэршэращ, зэпыщIэныгъэ ягъуэтащ. ИкIи ахэр дяпэкIи зэрыщIэну, зэкIэлъыкIуэну зэгурыIуащ. АдэкIэ ди лъэпкъэгъухэр Мейкъуапэ лъэныкъуэмкIэ ягъэкIуэтащ. Источник: riakchr.ru
Комментарии