ЗДЖЬАУАПКIРА ХIАГIУ ХІКЫТЛАГІВ ХІХЪА ЙЫЛАДУПI

АгІвычІвгІвыс адуней дангІаквылра угІалагата аунагІва бжьащата йауыз акІвпІ йбзазара щъата йазалуа. ТгІачва бзи апны дгІадзынгылтІ январь а 25 сквш 66 зхъыцІуаш йбергьльу аполитик, КЧР АуагІа Айззара (а-Парламент) регламентли амандат уысквали акомитет апредседатель БЫДЖЬ Исмель АбдульгІазиз йпа. Ауи йаба АбдульгІазизи йан ХІаджьари Къвбина кытла йшырдырхуа йынхагІвыз, зъадаб хІагІаз, ргІариква рыгІзарабжьарала хабза пшдза нкъвызгуз, ажвлара пІатІу зквырцІуз гІвычІвгІвыста акІвпІ. Ага абзазара баргвызтынгьи, ауат рыхвыгІвгІаричва рбжьари рарыпхьари къару ду аларцІатІ. РгІапсарагьи гьымдзтІ, рсабиква зымгІва дырра хІаракІы раутІ, дасугьи йара йымгІва пшдза ликъьатІ. – Санхвыцыз угІалагата аба йажва шапхъу багъьата йсгвынскІылтІ, – йхІвитІ Исмель. – ХІан йанакІвызлакІгьи йгІахІалхІвлун аба ймагІны шдуу. АхІбачва хвы шырзыгІбуш, ражва хІшаздзыргІвуаш акІвын хІани хІаби хІыззырбжьуз. Ачвахра гІадзарыквын тшбыг ззыкІуаз йкІуан, чва хъызхуаш ахІвссагьи аъан. ХІаба хІапхъа дгылан, сайщчва Музакьыр, Аскьарби йгьи сара хІгІайыдзхъагылуанта хІуыс джвыквхІцІун. Ауи апшта атгІачва чва рхуанта асовхоз тоннкІ 15 сомкІла йадрыхвгІун. Асовхоз апны Быджь АбдульгІазизи йпачви чвахрала йрайгІайуаз дгьаъамызтІ. Тонн 110 –120 напІыла йырхуанта йаквырцІахуан. АбдульгІазиз йчвахыртахІва йызпхьуз Къвбина радгьылква рпны йгІанхатІ. Исмель аквтанай апхьарта дангІалга, ар къвырльыкъвхара дызшІырттІ. Ауи амщтахь Ставрополь политехника институт диплом къапщыла дгІалгатІ. Асквш 1980 йгІашІарышвта йапшым ауыхвара нхартаква дынхатІ. Ауи унашва зхъицІуз агвып МосковскІа поселок, «Южна» агрокомбинат зуыхваз, Басаев Шамиль йалайрыхъвашаз Буденновск ачымазагІвтара гІащаквзыргылхыз йрыуапІ. ЙхIхІвара хІтахъыпІ Къвбина кытла псабара газ кІылгара анджвыквырцІа Исмель къару ду шалайцІаз. Йхъатала агазцага трубаква рыцщтІихуан, ащъаква рыхъазла амашаква бельла йрыцижуан. ЙанакІвызлакІгьи зджьауапкІри зтшдырри хІагІу Исмель акоммунист партия ласы днарахвтІ. Ауаъа угІалагата уыжвгІандзарагьи апартия далата дгІамгІвайситІ, КЧР АуагІа Айззара (а-Парламент) йхпахауа, йпщбахауа, йхвбахауа, йцбахауа азддараква дырдепутатта Къарча-Черкес ахабзалыхра уысква къару рылайцІатІ. Ауи а-Парламент йапшым датша комитетквагьи рунашвачпара дахIврала йшынкъвигаз бергьльыпI. Быджь Исмель аполитика наукаква дыркандидатпІ, КПРФ а-Квта комитет далапІ, КПРФ КЧР-ла ахъвшара йапхъахауа дасекретарьта 13 сквша дынхатІ, уыжвгьи йгІвыджьхауа асекретарь йъанатIа джьауапкІра дула йырхъйитІ. Исмель дгІазлыцІыз абаза уагІахъа дырпа цІабыргыпІ. Къвбина адгьылква ргІахчара акІвызтІ, Абаза район гІаныршара акІвызтІ ажвлара рапхъа дгылата тшгІайырбатІ. Ауи акыт аквтанай апхьарта, акультура Тдзы, амбулатория, асабигІзарта йыззыбжула йадгалрала йызнымкІва дырцхърагІатІ. Йкыт акІвымкІвагьи анахьанат абаза кытквагьи цхърагІара дирадзатІ. ХІхаквлагІв КПРФ политика партия знапІыцІу Зюганов Геннадий хвду гІайыквицІитІ, хIышта дангIай йунагІва дсасытІ. – СкытлагІвчва ахІбачва рапшта, хІъагІадзынгылыз акъраль – Совет Союз анамцІпІла удын дута йсзалтІ. Ауи йацта хІбзазарагьи алпІлатІ. Млыквта йаъаз ртиуа азаводква, афабрикаква, аколхозква, асовхозква, ауагІа злабзазуз зымгІва ыквырчІвакьтІ. Айсра сквшква рагІангьи ауи апш гьнымшатІ, Сталин ачІахъва ахв йаладырхІарныс йгьайымрыхвитуазтІ. Ужвы ачІахъва грамм 500 ахІа йыгьнадзум, ахв хъалра акІвымкІва йгьалдзгІум. Коронавирус згІва зъарагІвуда йыквнахыз? ХІцІыхъва йгІайуа хІсабиква руачІвымшла рхъагвы аквыта йбзазара ахъазла ахІбачва ужвыгьи тшхІрыгІапсара атахъыпІ, – йхІвитІ Исмель. Ари абаза хъацІа хвын УрышвихъымгІва дхъалтІ. Ауи ахъыкв апны АйгІайра баракъ ыквйыргылтІ. Ауыгьи агІвычІвгІвыс йдунейпшыща гІахънатІитІ, йпатриотра, йбзазара къару йыргІарбагапІ. Быджь Исмель йгІариква ахыгІвгьи – Марина, МухІамад, АхІмад раба йшвапхала йгІадзынгылтІ. АчкІвынчва агІвыджьгьи акоммунист партия йалапІ, ацІабыргыри аджьауапкІри рбзазара йахъвыкІхатІ. Акъыльаквшварала йацбзазауа Исмельи йхъапщыла Сими ауи аъаща гвщтІыхра гІарыланацІитІ, ргІариква мгІва райша ъагІалырхыз йайгвыргъьитІ, ауат йгІарыцІагылуа асабиква рынасыпква бзихарныс рзыртахъпІ. Пшдзата йбзазауа, нхарала, политика уыснкъвгарала зынгьи йамайчуа, зуагІахъа бзи йызбауа Быджь Исмель данйыз амшла хІйайхІвахІвуата згІвадари нцІра ауыри йзыхІтахъпІ. ЙунагІва йанакІвызлакІгьи насыпи баракьати гІвназтІ, йыкІьадыгв саби бжьыла йырчвызтІ.