Актуально Глава КЧР Рашид Темрезов призвал жителей региона в онлайн формате проголосовать за территорию для благоустройства в 2025 год Актуально Глава КЧР Рашид Темрезов и министр труда и соцразвития региона Динара Камурзаева обсудили ход реализации мероприятий в рамках Года семьи Актуально Открытый турнир СКГА по скалолазанию «Кубок ректора» прошел в КЧР Актуально Федеральные трассы КЧР готовят к выходу из зимнего периода Актуально Садоводческие домовладения Карачаево-Черкесии могут стать участниками программы социальной газификации

ЗАКЪЫЛЬ АКВШВАУА РЫНАСЫП ГIАЙИТI

12.07.2019 200
ЗАКЪЫЛЬ АКВШВАУА РЫНАСЫП ГIАЙИТI
Россияла асквш 2008 йгIашIарышвта йдыртлапIауа атгIачва ры-Мш зымгIва рыхъазлагьи магIын ду зму гвыргъьахъвыпI. АгIвычIвгIвыс йхъагвы аквыта дызчпауа йаргванква рбзибари ргватри ракIвпI. ДзачIвызлакIгьи, дъанызлакIгьи, уыста дыздкIылазлакIгьи, йъайызпшуа йунагIва дцахырныс дгвжважвузтын, насып йымата йырпхьадзитI. Уамайгвыргъьушта йгьаъам йцIыхъвахауа азаман ауацIала абаза кытквала адемография аъаща ъагъьхауа, саби щарда зму атгIачваква йъагIарылахIауа. Абаза район йаланакIуа ЙынджьыгьчкIвын кыт апны асабиква ргIадзныргылра гватра ду азалызхуа атгIачваква гьмачIым. Ауат йрыуапI УАЗРГIА Алибеки Марини. Ауат пщгIвысабичва рыгIзитI, йыртахъу шнадырхъуш йащтата йацацхърагIауа йбзазитI. Алибек Къарча-Черкес къральыгIва технология институт инженер-энергетикта дапхьатI. Ауаъа дангIалга Москва город апны ауыхвара йапщылу аъачIвагIаквала жвасквша руацIа амайчра гIайырбауа дынхатI. Нхара даналагуз акыт апны йгIаджвыквицIаз йтдзы апкъгIваца акIвын йгылаз. АчкIвын Москва дангIацапах йгIайынхаз ахча гIайрысабапын, йтдзы найырдзахтI, швапхата йырхIаз гIайцйырхърагIан, уыхвара фирмагьи гIахъитIытI. Уаз Алибек ХIаджьмурат йпа аргваныта дыздыруа зымгIвадзугьи уысдъа дшзымчIвауа, дшхъахъву, дшунагIва пшвыма нардзу гIауархIвуаштI. Жвизсквша цIуата йгIанйыршаз «Стройпартнер» фирма уахьчIва йъагIадзаз дахIврала йынхитI. Абаза районла, ареспубликала аукционква йрылалитIта, ангIалра мачвы анацIарцIара, рхъвдаквцIараква джьауапкIра ду рылата йдырхъйахитI. Айшыста йхIхIвапIта, уахьчIвала Уаз Алибек ауагIагьи нхарала йадигалитI, йхъагьи файда азгIайгитI. Алибек йнашх лашарата, йунагIва дгIаджвылцIта йхъагвы аквыта дынхузтын, ймачIымкIва йхъапщыла лбзира алапI. Алибеки Марини акъыльаквшвара рызбжьата пщгIвысабичва гIадзындыргылитI. Марина Ростов къральыгIва университет дгIалгатI, дэкономистпI. Абаза район астатистика къвырльыкъвхара апны дъачIвагIагIвпI. АгIариква рахIба Дали йбыжьбахауа класс дцатI, ауи аспорт дачIвыпI, абакIрала йгIатгараква атгIачва зымгIва айгвыргъьитI, ауи йыщтагIайуа Лия – йгIвбахауа класс дгIалгатI, ддзахуата тшылбжьитI, Лолита – пщысквша ракIвпI дызту, ауаса лныбыжь йгIаквхымкIва дгвыбзыгъапI, адуней йгIаквылгIвацаз Софита хвыц лхьпшрала лан дылцхърагIитI. АтгIачва цIагылагIв бзита, кьангьашагIв-уасаражвта дырзалитI Алибек йан Тамара. Ауи лпа нхарала йдахIвраква лхъа рыладухитI, лтаца Марина лхIаль шпшдзу гIалылкIгIитI, ахвыцква гIвза цIабыргыта дырзалитI. АтгIачва агвыргъьахъвква ацнардаситI, асабиква йанйыз амшква ацдыртлапIитI, хIуагIахъа цIасква рылакIта йгIадзынгылитI. Алибек йаба ХIаджьмурат адуней йхIваджьищтара сквшщарда цIитI. Ага ауаса йаъазтынгьи, асабиква ауи йсуратква зну альбом ранду Тамара йлыцта йахъдрышвтлитI, дада хъагIата дгIаргвалашвахлитI. Марина лаби лани ЧкваргIа Нурбии Зулии йгIадзындыргылыз ргIвыпхIчви рпи рсабиква йрайгвыргъьитI, йрылшауала йырцхърагIитI. Рпа Расул хгIвысабичва йымапI, дара дрыцбзазитI, рпхIайцIба Алинагьи гIвыпхIчва хвыцкI гIадзынлыргылитI, Марина – хъахьыла йшхIхIваз апшта, пщгIвысабичва дранпI. Ауат зымгIва Нурбии Зулии рыпшцIа йанайззара йпшку разазаъаща швапхата йыззалуа ахвыцква даргьи гIвычIвгIвыс нардзата йшалуаш йазхъахIцIитI. Россияла июль а 8 йдыртлапIауа атгIачва ры-Мшла акъыльаквшвара ззбжьата зсабиква гIадзынзыргылуа УазргIа Алибеки Марини хIрайхIвахIвитI. РунагIва йанакIвызлакIгьи баракьат гIвназтI, йрызбжьу анбжьагIвыгIари агвыцкьари зынгьи йрылымдзгIауата рхвыцква щардала йырхъарпазтI. Ауат ангIацIасра, ъачIвагIа раута йынхауа йанджвыквырцIуш азамангьи уахьчIва апшта йгIадзуштI. Ауат рынцIра аурала азаджв-азаджв йанакIвызлакIгьи цIагылагIвта дшизалуаш кьангьашра гьалам.
200 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный