ЙЫРШIЫЙАРА АБАЗА УАГIАХЪА РАЦЗАКIЫРА ЙАЗЫНАЙЫРХАТI

а йгьи Россия, Абхазия, аурышв диаспораква ъану Германия, Франция, Великобритания, Турция датшагьи акъральквала йбергьльу алитература цIбацIбагIвчва ргватра азынадырхатI агIвгIвы, Россия агIвгIвчва р-Союз йалу ЭТЛЫХВ Олег Адыльгьари йпа йыршIыйара. Алитература цIбацIбагIв, Россия агIвгIвчва р-Союз асекретарь Переяслов Николай хIхаквлагIв йгIвыраква йагIвсыз азаман йбзазуз Толстой Лев йроман «Война и мир», Шолохов Михаил й-«Тихий Дон», Толстой Алексей йкъальам йгIахъыцIыз «Хождение по мукам», Симонов Константин йгIвыз «Живые и мертвые» романква рсатыр йалайпхьадзатI. АуысагIв йгьи алитература цIбацIбагIв, апрофессор Тохтамышев Хзыр йшипхьадзауала, Этлыхв Олег совет реализм нархара даланакIитI. Йара ауаса алитература цIбацIбагIв Шульгин Владимир Россия литература апны йшIыцу гIаншарата Олег Адыльгьари йпа йыршIыйара гIаликIгIатI. Артшхъвараква ауи апшта бзи йзымбауа ауысагIв, алитература цIбацIбагIв Щыбзыхва Ларисагьи Этлыхв Олег йгIвыраква хвду рыквылцIатI. Абар датшагьи алитература цIбацIбагIвчва ргвгIанаграква: – «УызгIвымсхыз романпІ» – («Звезды над Каиром» роман йазынархата – Переяслов Николай). – «Урышв бызшва пшдзала йгIву ароман» – («Притяжение» роман ахъазла апрофессор Филиппов). – «Аурышв литература апны романзаджвыкIла аавтор дбергьыльхата йгьи дклассикхата йыншатI. Этлыхв Олег йроман «Следы на песке» щата багъьа зму нхарапI, йхIаракIу художества гIвырапI. Йара йылахьгьи ауи йашIырпшыпI» – (ауысагIв йгьи алитература цIбацIбагIв, апрофессор Тохтамышев Хзыр). – «Этлыхв Олег йгIвыра история роман квпшыра шIыц амапI, ауи йагIвсыз азамани хIуахьчIви аднакIылитI. «Звезды над Каиром» роман йцIыхъвахауа азаман апны Россия йагъьу ароманква руацIала йаквнагу гыларта шакIуаш йазхъасцIитI» – (академик, ацIбацIбагIв-литературадырыгIв Бекизова Лейла). Атурых гIаншараква йауацIыхта йгьи цIолата йгIахъызтIуа агIвгIвы Этлыхв Олег йыршIыйара датшагьи щардагIвы аквчважватI. – «Апсны абзазагIвчва ауи аъаща азыгIальаматра ду зазхIыму Этлыхв Олег дъабазу, хIышта дъакъральгIву акIвпI. Ауи йгIалцIла абаза уагIахъа йрыуу агIвгІвчва бергьыльква рсатыр ужвыгьи заджвыла йшщардагIвхаз багъьата йхIзыхIвуштI. Этлыхв Олег йгIвыраква хIуагIахъа рлитература анадзара щтIырхтI йгьи адуней ауацIала йаквнагу гыларта ркIытI. Алитература цIбацIбагIв ЧкIала Петр йшгIаликIгIазла, Абхаз апхьагIвчва рыхъазла Египет ауагIахъа фыр, уыжвгIанчIви Египет къральыгIва ащата щтIазцIаз Алибей йынцIра-бзазара йгIаквчважвауа «Звезды над Каиром» Этлыхв Олег йроман магIын ду амапI. ЙгIалкIгIара атахъыпI, Алибей йтурых й-ХIХ-хауа асквшышв угIалагата агIвыма литература аклассикква швкIны йшгIаквчважвахьаз, акинокомпанияквагьи фильмта щарда шахъырхыз. Ауаса Этлыхв Олег заджвыкI йакIвпI Алибей абхазква дшгIарылцIыз адуней ауацIала йдзырдырыз». ХIызту асквш август агIан хIхаквлагIв «Лунный свет» романтрилогия гIацIищттI. Ауи йауацIыхта хIаквчважвара апхъала Россия йгьи Абхазия рлитература цIбацIбагIвчви апхьагIвчви хвыта йаквырцIаз хIхIвара атахъыпI. – «Тлахан дукI гIазцIазкIуа ароман айшыста уаквчважварныс гьуылшушым. Акъраль уысква раъаща ауи апш цIолата йгьи цIабыргыта уыжвгIанчIви гIвгIвыкIгьи йгIайырбарныс гьйылымшатI» – (алитература цIбацIбагIв Переяслов Николай). – «Уроман уыжвгIанчIви Россия йгьи Совет Союз йаланакIуаз акъральква ргIвгIвчва рынхараква зымгIва йшрагъьу кьангьаш гьалам» – (академик Шамба Тарас). – «Урышв бызшва цкьала йгIву книга бзидздзапI. АцIбацIбагIвчва ауи эпос гIвыра хвду шаквырцIуш йазхъасцIитI. Адуней литература аклассикква уыршIсырпшра стахъыпI» – (акнига гIацIщтырта аредактор Скворцова Елена). – «Ароман сшабгаз снанауахвтI. СгIадымцIуата зъара мшы цIуата сапхьауайа! ЙсымагIальаматдзапI» – (Чква Нурби). АчIвыйа йара ароман гIазквчважвауа? Ауи атрилогия йаланакIуа «Радуга над Черкесском» йапхъахауа акнига йагIвсыз асквшышв й-70-хауа асквш ауагIа рбзазара йгьи руысква шаъаз гIахънатIитI. Автор ауи азаман йшаъадзаз апшта йгIайырбарныс йылшатI. «Далекие звезды» зхьицIаз йгIвбахауа акнига йара ауи атлахан апны абхазква йырзынайырхатI. АгIвгIвы йылшатI йджьащахъваз совет заман агIан хIуагIахъа ргвы акшаща шаъаз, Апсны абзазара закIгьи йапшмыз ащтацаща, ауагIа ргвцкьари ргвхътIыри гIайырбарныс. Переяслов Николай йгIвытI: «Далекое солнце» книга художества-публицистика романгIвацата йгьузыхIвушым. АхърыкъьаракIгьи аламкIва, ауи адунейла йджьанат шIыпIу Абхазия йазынарху проза поэмапI. Шульгин Владимир йшгIаликIгIазла, «Лунный свет» роман йаланакIуа «Далекое солнце» книга хъи цIыхъви змам йчIыхву ажвгIванд ацIахь йаъу ашIыпIа джьащахъва шIыц-шIыц йгIахънатIитI. – «Сара сыхъазла ауи совет заман агIан Абхазия шбзазуз узырдыруа художества энциклопедияпI» – йгIвытI ауи. ЙгIвбахауа акнига щардагIвы аквчважвауата хвыта йаквырцIаз узырбауа ашвапхаква гьмачIым. – «Сара айсра апхъалагьи Абхазия бзита йыздыруан, ауаса «Далекое солнце» книга санапхьа Анчва йгIалихыз ауи ашта пшдза схъа ахъазла шIыц-шIыц йатагIахъстIхтI. Абхаз уагIахъа, ауат ргвбайара, ргвыгъараква, ргвыргIвараква рыцIа цIолата срыхагIвазатI. – Ароман йхъарахаз азаман бзи, совет заман агIан ауагIаква рхъвыцщи руыскви шазакIыз гIаунаргвалашвахитI. Ауи азаман гIазрылашаруз амара щарда цIуата йшташвахыз уазнархъвыцитI» – абар апхьагIвчва ргвгIанаграква шаъу. Йхпахауа акнига – «Ушедшие за облака» абхаз уагIахъа рхъахвитра йазабакIуата фыррата йгIадырбаз йгIаквчважвитI. Ароман зпхьадзарали зкъаруквали агалагьи йщардаз агъа йайгIайыз абхаз уагIахъа рымч йащатахаз ацзакIыра шакIву унардыритI. Автор йхудожества гIвырала айсра апны абхаз уагIахъа айгIайра гIатыргарныс рылзыршаз рапхъагылагIвчва фырква ртурасква абгата йгIайырбатI. Апрофессор Тохтамышев Хзыр йшгIаликIгIаз апшта, «Ароман аавтор ауи атлахан алакта, агвы, апсыпнкъвгаща шаъаз, уахьчIва амш асурат йапищылхуата агIвычIвгIвыс бзазарата йпхьадзауа алахъвгIахъасраква йылайхIвауата йъайзыгIарбахыз гIатгара дупI». «Лунный свет» роман философия хъвыцщала йырчвыпI. Ауи агIвычIвгIвыс адуней дыззыкву йгьи адгьыл апны гылартата йкIуа дазхъвыцырныс дазаднацалитI. АгIвыра лкIгIарата йаму – фыр хъада дгьалам. Ауи йафыру азаман акIвпI. ЙцIасу сюжет шамамгьи узыхIвуштI, эпоха ззырхIвауа тлаханкI йгьи абаза уагIахъа йрыуу агIвычIвгIвыс дуква руыс пхатшаква ракIвпI ауи йгIахънатIуа. Этлыхв Олег йгIвыраква зымгIва хац къапщыта йалситI атурых йакъвнагаз абхаз йгьи абаза уагъахIаква рылахь шазакIу йгьи ауат Абаза зхьзу уагIахъакIта штшадыркIылхуа.