СКФО В Северной Осетии в 2024 году появятся прямые авиарейсы в Нижний Новгород СКФО Сельхозкооперативы в КБР набирают популярность Актуально Региональный этап Всероссийской олимпиады по истории российского предпринимательства прошел в КЧР на базе КЧГУ Актуально Глава КЧР Рашид Темрезов в Приэльбрусье встретился с активистами Общероссийского движения детей и молодежи «Движение Первых» Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева

«ЙЫНДЖЬЫГЬ» УАГIАХЪА ТЕАТР АГIАТГАРА ДУ

03.11.2020 139
«ЙЫНДЖЬЫГЬ» УАГIАХЪА ТЕАТР АГIАТГАРА ДУ
ЙагIвсыз асквш йгIашIарышвта «Культура» уагIахъа проект апкъ йтата культурала РФ а-Министерства йгьи Поленов В.Д. йыхьыз зхъу ауагIа рыршIыйарала Россия а-КъральыгIва Тдзы ргIаджвыквцIарала аршIыйара гвыпква рфестиваль-анкъвакъвра адыргалитI. СынчIва ауи «Культура – это мы!» номинацияла йакIвшатI йгьи Россия ашта 83 йрыуу ршIыйагIвчва гвыпта 255 алан. Ауи афестиваль-анкъвакъвра ду йалан йгьи напIасра дула йгIалыркIгIауата Бабкина Надежда унашва зхъылцIауа «Русская песня» Москва къральыгIва академическа театр асцена апны йгIахъвмартI Абаза район йауу «Йынджьыгь» УагIа театр. – Йапшым аршIыйагIвчва гвыпква рфестиваль шакIвшушла ахабар уагIа культурала ареспублика Квта йгIахIнарадзатI, – лхIвитI Абаза район апны «Акультури атшпсщари р-Квта» нхарта аунашвачпагIв Квырша Марина анкъвакъвра йшалалыз гIалгвалашвахуата. – АуагIа театрква ауи йапшу афестиваль – анкъвакъвраква йанрыларжьуа мачIпI, ауи ахIатырла йхIауыз алшара гьагIвхIымщттI, хIшвъаква хIщтитI. Анкъвакъвра хIшаларжьуала аджьауап йацта «Йынджьыгь» уагIа театр аргылчIвква йгIарылхта хвшIчIваракI рвидеоква рзыхIщтира шатахъу гIахIархIвтI. ЙхIщтийыз йрыуапI «Ханума» йгIалхыз ашIчIвара. Ажюри ауи рыцIа йыргвапхан йгIалырхтI. Ставрополь апны «Ханума» ашIчIвара дакъикъа гIважвала йгIахIырбара атахъын, ауаса аэпидемиология аъаща йгIалцIла ауыгьи видеота йхIщтитI. ХIыргылчIвква згвапхаз арежиссер Синельникова Анастасия айсра йазынархата кIара хIымазтын дазцIгIатI. Урышвла йхIымаз хIтеатр йалу АлбыргIан акультура Тдзы адиректор Къвач Зурида дгIазпхьаз ауыса акIвпI. Москва агала-концерт апны ан лтурасы йтагылаз Зурида йлыцгIахъвмарыз аби апи гIазпхьаз ауысаква Анастасии сари йгIалхIххтI. Аба йтурасыла дгIахъвмартI КЧР-ла гIатгара зму акультура анхагIвы, Абаза район апны «Акультури атшпсщари р-Квта» асуратчпагIв-декоратор Быджь Амир. Ани аби айсра йнардасуаз рпа йтурасы гIахъитIытI зымгIвагьи бзидздзата йырдыруа, «Абазги» ансамбль гIаншангьи ауи далата ашва зхIвауа Псыжв акультура Тдзы ахудожества унашвачпагIв ХIашвцIа Аслан. Абараса Россияла афестиваль-анкъвакъвра йалалырныс токьаль зчпаз «Йынджьыгь» УагIа театр йагъьта йгIалыркIгIаз агвып гIважва йрылашватI йгьи «Культура – это мы!» номиницияла йлауреатхатI, сом гIвмильуанкIгьи гIаквнадыргатI. Афестиваль адгалагIвчва йагъьта йгIалыркIгIаз агвыпква агала-концерт йалазларныс «Русская песня» Москва къральыгIва академическа театр йдрайгватI. – Москва хІангІай йгІахІыртыз афестиваль апрограмма апны ЙынджьыгьчкІвын кыт йадзхъата агород хьызква Иркутск, Каргополь, Касимов, Тутаев, Урай, Хабаровск сангIарыпхьа ъанквынракІ гІасылашватІ, уадыргІванагьи ауат ртеатрква ррепетицияква анызба чва бзила йгІахІпшыта, хвы хІзызбата агала-концерт хІгІазрайгваз хІгІахъвмарщала йхІрыразырныс хІылшушмахІва сгвыргІвауа салагатІ. Зыхьыз схІваз агородква ртеатрква рартистква бзидздзата йгІахъвмаруан, – йхІыцагІвишитІ Быджь Амир йлахІвараква. – Ауаса ахыгIв асцена хIгIаквылта Зурида лбжьы ансагIа гвыпкIгьи хIшгIархьымшвауа гIасгвынгIвытI. ГвынгIвырапI йапхъахауата Москва асцена апны йгIахъвмаруаз «Йынджьыгь» УагIа театр артистква гвалагIваласра шрылаз. Ауаса ахыгIвгьи бзидздзата йгIахъвмартI, ртурасква цIолата йырзыгIахътIтI, йырхIвауа ргви рпси йшалырщтуа аздзыргIвчва йрылархIвун. Йаргьи ауи акIвпI азал йгIвназ рыладзква дрыцкьауа йгIагылта «Браво»- хIва напIы йзырзасуаз. Ажва аламкIва, атеатр ду апны йгIахъвмарыз хIабаза актерква алахIвара пшдзаквала йырчвыта йгIахъынхIвыхтI. – Ауи йапшу фестиваль-анкъвакъвра уалазларныс сабапра дупI, уызшIыбжьуш гIалухитI, – лхIвитI Къвач Зурида. – Швабыжта йгIанымшаскIва дсгвапхатI арежиссер Синельникова Анастасия, агIахIвра, ацирк, атеатр гвыпква адылкIылын агала-концерт бзидздзата йадылгатI. Швабыжта сырзыразпI йсыцгIахъвмарыз Амир, Аслан, ауат рбыжьква сгIарыквын сгвы алалуан. Дасу йтурасыла йнардзата йгIахъвмартI. Ари афестиваль-анкъвакъвра хIаларжьра ахъазла Абаза район «Акультури атшпсщари р-Квта» аунашвачпагIв Квырша Марина уыс щарда акIвлыршатI йгьи лгIапсара гьымдзтI. ХIапхъахьылагьи агIатгара дуква хIымазлушта, хIабаза уагIа, хI-Къарча-Черкес рыхьыз хъарата, пшдзата йхIыргушта хIгвыгъитI. Москва театр асцена апны йгIахъвмарыз «Йынджьыгь» УагIа театр артистква, ауат йрыцта Абаза район йтыцIта йцаз зымгIвагьи пщымшкI руацIала рыла йабазла, йшдрысасызла йразыта йгIахъынхIвыхтI. ЙалкIгIата ргвы йгIатахатI йбергьльу «Современник» къральыгIва драмтеатр ларпшра йъадырцаз. – Ауасадза сгьымгвыгъузтI, мачIкIгьи сачврыхIун, асцена ду йамщцаз хIактерква шпагIахъвмаруашхIва сгвыргIвун, – лхIвитI Квырша Марина. – Йапхъахауата хIызлалыз ари йапшу афестиваль агала-концерт шакIвшуш, йапшым ажанрква шадыркIылуаш сыла йыгьсызгIацIамжьуазтI. Ауаса Къвач Зуридагьи, Быджь Амиргьи, ХIашвцIа Аслангьи ажвала йузымхIвушта бзидздзата йгIахъвмартI. Ауат ракIвымкIва асцена йгIаквлыз заджвгьи «Браво»-хIва йгIагылта напIы йгьырзамстI. Ауи ъанамдзауа гьаъам, хIхъа ду йхIдырбауа йгIахъвмартI. Абараса уахьчIва «Йынджьыгь» театр йалу ауи гIанзыршаз, ащата зрыбагъьаз артистква АгачаргIа МухIарбии Рити, Быджь Татьяна, Цекъва МухIадин, Цекъва Майа, Къмыш Амин, Бленау Усыф, датшагьи асквш 1986 агIан Ставрополь апны йгIатыргаз ахьыз «УагIа Театр» дырцIабыргуа, ахIбачва йщаквдыргылыз ацIас пшдзаква дымрыдзуа йгIамгIвайситI. Ауат ргIатгараквала ужвыгьи йызнымкIва хIшдыргвыргъьуш, хIреспублика, абазаква хIыхьыз шдыргуш йазхъахIцIит
139 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный