Актуально С ночи 3 декабря и весь завтрашний день в горах Карачаево-Черкесии лавиноопасно СКФО Министр просвещения России посетит строящиеся в Ингушетии объекты образования СКФО В Чечне вручили подарки детям с ОВЗ СКФО Минэнерго Дагестана добивается снижение цен на газомоторное топливо СКФО 424 новых случая заражения ВИЧ выявлено на Ставрополье

«ЙЫМГIАЩАУА УЫСДЪА ДЫГЬГIАНХУМ»

23.09.2021 34
«ЙЫМГIАЩАУА УЫСДЪА ДЫГЬГIАНХУМ»
«Абазашта» газет анапаква рпны хIгIарыквчважватI асквш 2016 агIан «Сады Карачаево-Черкесии» инвестиция проект абзазара йаларжьуата Красна Восток кыт йауу Джьут Айнар апайщикква ангIалра рыдичпалта гектар 34 рпны чIва цIлата зыкь 31 шлайцIаз. Ауи асабап Гвым абзазагIвчва йырхъазымкIва, арайон шабгу абзазагIвчвагьи йрыквшвитI. Акыт абзазагIв БЖЬАНЫКIЬА Артур МхIамат йпагьи агIайыраква гIайдахIвитI. Ауи асквш 2019 агIан Гвым дзыгIв агъьма тшпыла йпыбжвахаз, атIура йцIанакIыз 1,6 гектар багьандата йгIайахвын, чархына (малина) лайцIатI. – Сара ПервомайскI кыт сйытI, апхьарта амщтахь ауаъа йтагылу алицей пщысквша сапхьатI, «Техник-технолог молочной промышленности» ъачIвагIа гIацIызгатI, – йхIвитI БжьаныкIьа Артур. – Сквшы 20 цIитIта сан лкыт Красна Восток сгIахъынхIвыхын, сбзазитI. «Нхарта гьаъам»- хIва акIвпI йсагIалауа ачкIвынчва рытланыкъвала. Сара ауат йыгьрыцскIуам. ЙшпакIву акыт утата ухъа здугалуаш уыс шумауа? Йутахъызтын, рахвы рхIа, адгьыл рхарджь. ЙзачIв уысызлакIгьи уызлабзазуш хъахIара тшыткI гIаунатуаштI. Абан швырпшы Джьут Айнар йлайцIаз ачIва цIлаква. Ауаъа нхаша гIаргуа уагIата йакIуа зъарагIвуда?! Сара спынгьи сыкIьадыгв апхIвыскви съахIыльчви ачархына драшвалитI, йамуа акъвапсква амырхитI, йашIырххитI. ГвхътIыла, йазгIашыкъта йынхитI. АлахI дырзыразхатI. Саргьи ауат ргвы сгьасуам, нхашала йсрыразитI. Артур йшихIвауала, руатра апны сана (смородина) йгьи бажвта йгIазшIалуа чархына гIайырйитI. Архъа багьандата йгIайахвыз адгьыл апны кIьыда-кIьыдата йлапI «Полька-палана» йгьи Голландия йгIадырйуа, йбажвхауа ачархына сорт шIыцква. Ауат йырхъазымкIва, «Лячка» сорт паса йауа кыбпI. Ауи мызкIы ауацIа чархына гIаунатитIта ауыла йалгитI. – «Сады КарачаевоЧеркесии» инвестиция проект абзазара йаларжьуата цхърагIара щарда гIаншитI. Ауи апш цхърагIара кIара гIауадзума? – сицIгIатI Артур. – Момо, ауи йара сгьазымхъвыцтI, – йджьауапхатI ауи. – Сара агъныла швы-хъышв агьиква ласыргылитIта ахча тшыткI гIасынхитI, сан дгIасцхърагIитI, апхьарта йынхауа схъапщыла лынхаша гIасрысабапитI. Артур дтгIачвапI. Йхъапщыла Заира Апсуа кыт дауапI, Черкесск педучилища йцIыхъвахауа акурс дапхьауата лылахь гIацIцIтI. Ауи дъагIайыз Красна Восток кыт йтагылу Кълыч Рауф йыхьыз нкъвызгауа аквтанай апхьарта дшынхузымцара Къарча-Черкес къральыгIва педуниверситет физика-математика факультет дгIалгатI, й-5-хауа – й-10-хауа аклассква йгIайуа асабиква хIисапла йалрыпхьитI. Асквш 2019 агIан дызлалыз КъарчачкIвын районла «Асквш арыпхьагIв» анкъвакъвра апны йгIвбахауа агыларта гIатылгатI, диплом согIа ацта йгIалквнадыргатI. Артури Заири хвыгIвпачва рымапI: Айнар – й-8-хауа, Самир й-6-хауа, Салим й-4-хауа, Исльам йапхъахауа аклассква йцитI, айцIбадза Ильас хвысквша дыртапI. – АунагIва апны рахIа йтшытхаз ахыгIвгьи цIагылагIв багъьата йхIымапI, – йхIвитI Артур. – Анхара ргвы азыцхIитI, араъа йхIыцта, йымшыркъвауа йзагIахаз ачархына ашIырхитI. Артур йшихIвауала, ачархына айгвыгIвра ду атахъыпI. Ауи Интернетла Ставрополь край, Къабард-Балкъар йауу, ачархына йадынхалуа ауагIаква драбадыритI, драйкьангьашитI, дыршIашвитI, тшыгIвра бажв гIауызтуа лайцIитI. Йаназаману асатыр бжьараква рхитI, ачархына щапIква драшвитI, йдыртшатшитI, ужвы йшырчпауа апшта адзы ткIвапс-ткIвапс йацIаржьитI. – ЙгIашIышвхуа ачархына йъадугалуаш уымма, швгIапсара гьымдзума? – сицIгIатI Артур. – Астатистика йшгIанарбауала, Россия ауацIала чархына йгьи йапшым акыб цIлаква гIазырйуа хпроценткI йгьайхIам, айхIарагIв йырхвгIитI, – йджьауапхатI Артур. – Чархына зтахъу ауи аъара йщардагIвыпIта, зымгIвагьи ртахъыра анхIзымырхъйауа гIаншитI. МшигIадза килограмм 200 раъара гIашIыхIхитIта, акыт абзазагIвчва йнарахвитI. Ауат йырхъазымкIва, йгIасыхIвауа Учкекен, Кисловодск, Черкесск агьиква рбзазагIвчвагьи йырзызгитI. ЙгIасырйуа ачархына пхатшапI, хъвшвы гьадызгалуам. – Сара АлахI йхIвузтын, садгьыл шта йаласырхIуштI, асилос машаква ъаныргIалыз сыррайшуштI, ауи аргван йгIаначпауа акIвархъа хъвскIылта адзы йазнакIкIуа гIасрысабапуаштI. Адзын ачархынаква йрыласырхIуштI, жвумп, сана агьиква щардата йласцIуштI, ауыс зрыласуаш тракторкIгьи сырхIуштI, съамапсымаква зыгIвнасцIуш, тшпсщарта, мацIауырта тшыткI амата тдзы чкIвынкIгьи тасыргылуаштI. Акыт цIлаква агIамта йхIызгIанагуа аквашуа, агъ рымзарархара ахъазла йазалху сеткIа рхъасырпуштI. Ауатква зымгIва къарупI, ахча бзи атахъыпI. Йбзихушын, акыт хшнахвырта шырчпаз апшта, ашвыр цIлаква, акыбква йгIаршIалуа йъарыдынхалуаш цехкIгьи тадыргылзарквныз. «ЙымгIащауа уысдъа дыгьгIанхум» ахIвитI ажважв. Артур швабыж цIолата, гвыбзыгъата йуачIвы дазхъвыцитI. Ауи йшихIвауала, уахьчIвала акыт йтыцIта йапшым ацехква йынхауа апхIвысква щардагIвыпI. Ауат заман щарда рунагIва йагхитI, мгIвахв аквдрыдзитI, рсабиква айгвыгIвра рзыгIандыршарныс лшара дукI гьрауам. Артур йуысква аквшварыквын, йырхIауа атрактор заджвы даквйырчIвуштI, ахIвсса акыб цIлаква драшвуштI, йгIаршIалуа ашIырхуаштI. Ауи йхъа йахъазымкIва, йуагIа баргвырата йызшIашвауагьи дазхъвыцитI, закIыла дшрысабапхуш дащтапI. «Мурад пшдза зму йгIайдахIвитI» рхIвитI. Акыб цIлаква ргIарийрала зынхара джвыквызцIаз БжьаныкIьа Артур йтгIачвагьи йаргьи ргIапсара йайгвыргъьауа, рылшараква йдыргвышхвауа, рхабар пшдза хъара йгауа, руагIагьи дрыразуа атшауацIыхра йазынхаргIат
34 просмотров


Комментарии

Написать
Комментарии >
Умар Текеев, начальник службы радиовещания ГТРК Карачаево-Черкесия, заместитель председателя регионального отделения общественной организации "Союз журналистов России"
Карамурзин Рамазан Леонович председатель Ассоциациии крестьянско-фермерских хозяйств Карачаевского района, Глава КФХ



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный