Сентябрь а 10 Черкесск город «АдзыгIвбжьа ЙачIва» культуратшпсщара парк йаныргIалу Амфитеатр апны Совет Союз а-Фыр ХАБЕКОВ Умар ХIамид йпа
йхъыцIуашыз асквшышв
йазынархата хъмаштылра айззара акIвшатI. Ауи
йалан КЧР а-Правительства а-Председатель
УАЗ Аслан, КЧР АуагIа
Айззара (а-Парламент)
а-Председатель йзаместитель СМАКУЕВ Дагир, адепутатква, КЧР
а-Хъада йгьи а-Правительства р-Администрация знапIыцIу йзаместитель ПИВОВАРОВА Надежда, ажвлара организацияква рунашвачпагIвчва, ХIабаз район
администрация агIащтийыгIвчва, Хабеков Умар
йцриква, йаргванква,
агород абзазагIвчва.
Айззара ангIахъыртIы КЧР а-Правительства
а-Председатель дгIачважватI.
– ХIкъраль атурых йалалыз амшква, агIаншараква, ахьызква тшанырзынахIырхара Абашта
айсра Ду апны хIуагIахъа фырра ду шгIадырбаз гIахIгвынгIвитI.
ХIкъраль ауагIахъаква
зымгIва йырзацапшу атурых хIхаквлагIвчва рыхьызквагьи хIарыф дула
йъалагIву хIхъа аладупI.
УахьчIва йхIыртлапIауа
хIхаквлагIв, Совет Союз
а-Фыр Хабеков Умар
хI-Псадгьыл гIархчауата
зхъа щтIазцIаз, хъацIара
ду гIазырбаз айсыгIвчва
бергьыльква дрыуапI. Ауи
швара гьйымдыруазтI,
йунашва йацIаз айсыгIвчва рапхъа дгыла хъамайгьдзара гIайырбауата дайсытI. Асквшква,
асквшышвква агIвсыргьи, хIкъраль афашизм
йачвызхчаз афырква рыхьызква ауагIа зынгьи
йгьырхъаштылуашым, –
йхIватI Уаз Аслан.
Хабеков Умар йыхьыз
нкъвызгауа Къарча-Черкес педагогика колледж
адиректор РЫЖОВ Николай асабиква патриотра рылата, хIкъраль
атурых, Абашта айсра
Ду афырква рыхьызква
рдыруата ргIадзныргылра магIныта йаму даквгIашIастI. Ауи аколледж йапхьауа астудентква Хабеков Умар йхъмаштылра йазынарху айззараква йчвахъабага адзхъа
йшакIвдыршалауа, йхътIу апхьара сахIатква шадыргалуа гIаликIгIатI.
КЧР ауагIахъаква
рыжвлара организацияква р-Совет апредседатель КУЗНЕЦОВ Владимир йгIайззаз тшырзынайырхауата араса
йхIватI: «Европа ауацIала заджвгьи йызгIашIамрысыз агъа далазрыхъвашаз Совет Союз ауагIахъаква ракIвпI. ХIабачва, хIабадучва рацзакIыра, рхъамайгьдзара,
рхъацIара хIкъраль ду
гIархчатI. Ауи зынгьи
йхIхъхIраштылра гьатахъым».
Айззара апны, Хабеков Умар щарда гIанйымцIызтынгьи, хъацIарала
йыхьыз шйыргаз, йхIаракIу акъральыгIва ртшхъвагаква шгIайквнадыргаз
йгIаквчважватI. Хабеков
Умар йыхьыз хIреспубликала апхьартакви аурамкви йырхъырцIатI,
Москва область апны Ременское город й-8-хауа
апхьартагьи ауи йыхьыз
нкъвнагитI, Черкесск апедагогика колледж апшцIа, АйгIайра парк «а-Фырква р-Аллея» рпны а-Фыр
йчвахъабага гылапI.
Ари ахъвлапын Хабеков Умар йхъмаштылра
йазынархата йадыргалыз аконцерт апны ауатыкв йгIаталыз ареспублика филармония артистква, ашвахIвагIвчва
апатриотра, ауагIахъаква райгвара, ацзакIыра
магIныта йрыму узырдыруа ашва пшдзаква
рхIватI. Айззара ацIыхъва йаннадза ХабековргIа рткъвым ахIбачва
рцри йхъыцIуашыз асквшышв артлапIара адызгалыз, ауи дъархъмаштылуа ахъазла ареспублика аунашвачпагIвчва
йшырзыразу рхIватI
Получайте свежие новости на электронную почту
Комментарии