СКФО Северный Кавказ возглавил рейтинг самых спортивных регионов страны Актуально КЧР осудили на 6 лет автомеханика из Краснодарского края за мошенничество  СКФО   В Северной Осетии очищают реку Терек СКФО В КБР состоится молодежный слет «Мосты дружбы» Актуально 6 молодых ученых региона получили гранты Главы КЧР в 2023 году

ЙУАГIАХЪА РЫХЬЫЗ ПШДЗАТА ЙЫРГИТI

03.11.2020 123
ЙУАГIАХЪА РЫХЬЫЗ ПШДЗАТА ЙЫРГИТI
РыцIа бзазара бзи йазыпшгIауата агIвыма шIыпIаква рпны тшанзыргIалыз абаза чкIвыныргIа рпхьадзара гьмачIым. Ауат йъанызлакIгьи абаза уагIахъа рхъа дырдууа, рыхьыз пшдзата йшдыргуш йащтапI. УахьчIва швйабасырдырырныс стахъыпI асквш 1986 агIан Черкесск город ййыз, асквш 2007 йгIашIарышвта Апсны къральыгIва телерадиуакомпания апны администраторта йынхауа ХАРЦЫЖВ Рустам Ильас йпа. Черкесск йаныргIалу йхпахауа апхьарта йгIалгаз Рустам йыквлагIвчва дгIархьымшвауа, адырраква шйауаш дащтата йапхьара хъвдаквцIараква йнардзата йырхъйун. Апхьарта дангIалга тгIачвала йайкьангьашын, Апсны къральыгIва университет «прикладная математика» хъвшара дыцIалтI. АгIвыма шIыпIа йызхъазыта йтанагаз ачкIвын ласы гIвзачва йкIытI, йбзазара йащтацауа йщаквйыргылтI. Ауниверситет апхьара йымаджьащахъвата, йъанатIахарныс йгIалихыз амадзаква дрызгIашыкъта тшырзибжьун. Апхьара апны адырра цIолакви адахIвракви змаз ачкIвын йпщбахауа акурс дапхьауата ателерадиуакомпания нхара ддрайгватI. – Сара сынхара швабыжта йсгвапхитI, схъвдаквцIараква джьауапкIра ду рпщылапI. Акомпьютерква зымгIва рынхаща щаквсыргылитI, агIатраква апымшвтуата йакIвшара ахъазла асеть сахьпшитI. Сызлу агвып швабыжта ацацхърагIари абагвынгIвыри хIызбжьапI. ДзачIвызлакIгьи йуыс йнардзата йшйырхъйуш дащтапI, – йхIвитI ачкIвын. Рустам ателебара апны дынхауа акIвымкIвагьи «Ка-50» рок группа апны гитара даситI йгьи уарад йхIвитI. Ауи агвып Сочи, Москва, Ростов, Владикавказ, Краснодар городква рпны йакIвшаз аконцертква рпны дахIврала йгIахъвмартI. – Сара гитара швабыжта бзи йызбитI. Ауи сасуа сара тшызбжьахтI. АчкIвынчва тшазхIкIкIитIта шIыцракI хIазыпшгIитI, ангьльыз, урышв бызшваквала йхIхIвуш ауарадква гIалхIхитI, йапшым апроектква хIрылалитI. Ауат йрыуапI «Песни нашей Победы» проектгьи. Ауаъа айсра уарадква гIадыршIыцхуан. Имам Галимсултанов йхIвуз «Абхазы, абхазы» уарад схIватI, – йгIайгвалашвахитI Рустам. АчкIвын дыздгылуа ауысква йнардзата йырхъйитI. Йынхара хъвдаквцIараквагьи ауарадхIварагьи йацапшыта йгIайдахIвитI. УахьчIвала Харцыжв Рустами абхаз пхIвыспа Тванба Мактини унагIвара гIандыршан, ракъыль аквшвауа йбзазитI. АчкIвын йтгIачва дырчвыхъаразтынгьи, машинанкъвцагIвта йынхауа йаба Ильас, ангьльыз бызшвала йазрыпхьауа йан Елизавета, йащайцIба Азамат зынгьи йгвы йыгьтыцIуам. Ауи атшпсщара мшква рагIан ауат йбарныс йцри шта дгIайитI. Аби ани рпа адахIвраква гIайырбауа дъабзазауа йайгвыргъьитI. – Апсны апны съанатIалагьи сбзазаралагьи зымгIва щаквгылапI. Ауаъа ауагIагьи срыщцатI, апсабарагьи швабыжта йпшдзапI. Къарча-Черкес Республика сцриква збарныс сгIайитI, ауаса сбзазара ахъазла Апсны рыцIа йгIалсхитI, – йхIвитI ауи. ХIхаквлагIвчва йъабзазалакIгьи абаза уагIа йшгIарылцIыз зынгьи йгьырхъаштылуам. Рустамгьи Апсны апны хIуагIахъа рыхьыз пшдзата йыргауа, рыхв щтIихуа тшгIайырбитI.
123 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный