ЙНАШХЫЙУ АГIАНШАРАКВА АТУРЫХ ЙГIАЛАХАТI

Ноябрь а 2 Къарча город йаныргIалу адепортация йаладзыз рчвахъабага адзхъа ансисквша джьабара митинг акIвшитI. Акъарчаква тыргищтара йцIыз асквш 76 йазынарху айззара йалан КЧР а-Хъада ТЕМРЕЗОВ Рашид, РФ а-Федерация а-Совет йалу САЛПАГАРОВ Ахмат йгьи КЪАЗАНОКЪВА Кърым, КЧР-ла афедеральна инспектор хъада ДРАЛЬЩИКОВ Игорь, КЧР а-Правительства а-Председатель УАЗ Аслан, КЧР АуагIа Айззара (а-Парламент) а-Председатель йзаместитель СМАКУЕВ Дагир, ашIыпIа власть органква ргIащтийыгIвчва, ажвлара йгьи адин адкIылараква рунашвачпагIвчва, абзазагIвчва. Амитинг гIахърымтIыскIва Лагъь КIавкIаз амсылманква р-Координационна Квта апредседатель Бердиев ИсмаилхIаджь йгьи аправослав диннкъвгагIв Субтельный Евгений адепортация йаладзыз рыхъазла духIа гIарахвтI, айззара йалаз хъмаштылра дакъикъа йгылтI. – Ауи арыцхIагIа ацIолара амамыр заман йбзазауа хIыла йгIацIагIжьырныс баргвыпI. Адепортация ахьшвашвара амли агIвыма шти йгьырхъазым йащтагIайыз, ауагIа рыхв надыркъвуата акъральгIв хвитнагIаквагьи рхъырхуан, – йхIватI КЧР а-Хъада Темрезов Рашид. – Аполитика репрессия акIвзыршуз мурадта йрыман йтыргаз ауагIахъаква ркультура, рыбызшва, руагIахъара рыдзра. Ауаса йчхIауачву аъаща йташваз акъарчаква рамайчра нхара, ргвбайара, рхъацIара рбзирала йгIащаквхатI. Ауи атлахан йтыргаз атажв-лыгажвква рпачва, апхIвысква рхъапщылаква хъамайгьдзара гIадырбауата афронт йпшцIан, Москва йгьи Ленинград гIадырхвитхуан, Сталинград йгьи Курск рпны агъа йпшIагылан, Будапешт, Варшава, Прага гIадырхвитхуа Берлиндза йцун. Абашта айсра Ду асквшква руацIа акъарчаква рфырра йхIаракIу акъральыгIва ртшхъвагаквала йгIалыркIгIатI, «Совет Союз а-Фыр» хьзы гIазквнадыргаз гьмачIым. Темрезов Рашид акъарчаква рцри шта йангIахъынхIвых ауат йырпылыз йгьи йырцхърагIаз йрызцауа аразыра атурых йшгIалахаз, абанпараква йшрылу гIаликIгIатI. – Зарарта йрадзаз шмачIымгьи акъарчаква агIапсараква йгIарылстI, рхъахв надмыркъвуата рсабиква, рыбызшва, рцIасква гIархчатI, – йхIватI КЧР а-Хъада. ХIреспублика ахабзалыхыгIвчва рыхьызла амитинг йалаз тшырзынайырхатI КЧР АуагIа Айззара (а-Парламент) а-Председатель йапхъахауа йзаместитель Смакуев Дагир. – СахIаткIла ауагIахъа апхыцIа цIахъыртшытI, нхарали айсрали ргIатгараква гIатадымрышвуата рышта йтыргарныс щаквдыргылтI. Акъарчаква йгIархьыдзаз арыцхIагIара анахьанат ауагIахъаквагьи арынашхыйатI, – йхIватI Смакуев Дагир. – Адепортация ацIыхъватшараква жьыхьыдапI, ауагIахъа ръарагIвшара амгIва апны йызшIашваз абаргвыраква, амла йыргатI, йхьшвашваз Квта Азия йгьи Къазахстан рпны абзазара рзымчхIауата адуней рхIваджьтI. УахьчIва йъагIадзазгьи угвы зрыхьшвашвауа апхьадзара – адепортация сабита зыкь 22-гIв шаладзыз ухIварныс хIатлапI. Ауаса ахIбачва йанакIвызлакIгьи йхъарцIун знымзара-зны радгьыл йшгIахъынхIвыхуашыз. Асквш 1957 май агIан ауи ншатI. Акъарчаква рнашхыйара шрыцагIвыршауа гIалыркIгIатI амитинг йгIалалыз ауагIахъа жвлара адкIылараква ргIащтийыгIвчва. КЧР ажвлара адкIылараква р-Совет аунашвачпагIв, КЧР Ажвлара палата йалу, «Кали-Архи» жвлара организация знапIыцIу Кузнецов Владимир йгIачважвара апны акъарчаква ъатыргаз апны нхарала адахIвраква шрымаз, акъральыгIва ртшхъвагаквала рыхьыз шырхIваз гIаликIгIатI. – Акъарчаква щарда рчвыдзтI, ауаса руагIахъара рзыгIахчатI. Адепортация йаладзыз рчвахъабага адзхъа ауи азаман хьанта йацагаз гIахIгвалашвахитI, арепрессия йгIалсыз ахIбачва квырмыш ду рзыхIчпитI. Ауат йрыщтагIайуа абанпараква зынгьи рыцхIагIакIгьи рымбарагIатI, – йхIватI Кузнецов Владимир. Къарча город й-4-хауа апхьарта физкультурала арыпхьагIв, Россия Федерацияла гIатгара зму арыпхьагIв Чекменев Михаил акъарчаква рдепортация сквш 76 ахъыцIызтынгьи, ауи ахьыгIа ауагIа ргвы йштымцIуаш гIаликIгIатI. – Афронт ахъазла тшы, чIахъва, жьы, чгIвыча пха адызкIылуаз, зхъа йамайгьдзауа йынхуз ауагIа рышта йбзазарныс йгьахвитхмызтI, ауаса акъарчаква рпхыцIа йгIанылыз рзычхIатI, – йхIватI ауи. Ареспублика перинатальна Квта аполиклиника знапIыцIу Борсова ФатIима аполитика репрессияква йгIарылцIла Россия ауагIахъаква лдзгIара ду шрадзаз даквгIашIастI. ЙхIыщтагIайуа абанпараква ауи апш чвгьахаракIгьи йанымйара ахIатырла йагIвсыз хвы азыгIбауа апхъала хIчIвырхъара шатахъу лхIватI. «Абазашта» газет аредактор хъада Къвыл Фардауыс йтыргаз алыгажвква, апхIвысква, асабиква ъакIарпсаз амцырарта апны йдрыдзра шырмурадыз гIалылкIгIатI. – Ауаса акъарча уагIахъа щамхъаша йгьырзымыргылтI. Ауат рамайчра нхара, ацIабырг шхъахьхушла йрымаз азхъацIара, рацацхърагIара йгIащаквыржьтI. Амли ахьти зхъадзгылаз Къазахстан йгьи Квта Азия рырхъаква рпны алыгажвква, зхъачва айсра йпшцIаз апхIвысква йгIарыцIагылыз асабиква гIархчатI, 14 сквша руацIа йчхIауачву аъаща йгIалстI, – лхIватI Къвыл Фардауыс. – ХIреспублика ауагIахъаква зымгIва йалачпу турых рымапI, агIвымакъраль амакIыраква, аполитика ахърыкъьараква йгIарылцIла рыцхIагIа щарда рбатI. УахьчIва йхътIыта йыхIхIвитI уагIахъипхьадза ртурых йнашхыйу анапаква шалу – абазакви адгьакви щаквызрысыз КIавкIаз айсра, акъазакъква рыквчIвакьрала арепрессияква, йагIвшахаз нагIвай уагIахъа гIазлысыз абаргвыраква… Зынгьи йнымшахыргIатI ауи йапшу ахьшвашвараква. УахьчIвала аурышвква, акъарчаква, ачеркесква, абазаква, анагIвайква, агрекква, аосетинква хIаларпата йлашару апхыцIа хIазынхитI. ХIыуа дзачIвызлакIгьи атурых адерсква хIылахIкIта ахIбачва тынхата йхIызгIаныржьыз хIхчара хIборчпI, хIайгвара йазхIырхIауа хIбзазара атахъыпI. Лагъь КIавкIаз Федеральна университет аэкономика факультет апхьагIв Керейтов Сабир ашIаквагьи адепортация ахьыгIа шрылархIвауа гIаликIгIатI. – Адепортация йгIалсыз ргIагвалашвахраква уанрыздзыргIвуа угвы хьшвашвахитI. ХIара хIтурых хвы азыгIбауа, хIалакIыта апхъала хIымгIвайсра хIпырапI. Ауи агIан амамыр хчахуштI, – йхIватI ауи. АгIачважвараква рымщтахь амитинг йалаз адепортация йаладзыз рчвахъабага ащапIы ахIврапшдзаква щтIарцIатI.