ЙМУРАДКВА ДШЫРЗЫНАДЗУШ ЙАЗХЪАХIЦIИТI

Зуыс бзи йызбауа – адахIвраква дырзынадзитI. УахьчIва швйабасырдырырныс стахъыпI «Ростехинвентаризация – Федеральное БТИ» Къарча-Черкес Республикала ахъвшара апны «инженер-землеустроитель» ъачIвагIала йынхауа, ЙынджьыгьчкIвын кыт абзазагIв УША Шахмырза Кьарим йпа. Шахмырза асквш 1984 агIан ЙынджьыгьчкIвын кыт дйытI, асквш 1990 агIан шIыцта йдыргылыз апхьарта дыцIалтI. Ауи апхьарала адахIвраква йыман, аспорт бзи йбун. АчкIвын йхвбахауа акласс дапхьауата, боксла атшыбжьараква дцарныс йтахъхатI. Ауи азаман акыт апны ауи апш атшыбжьараква гьаъамызтIта, йаба Кьарим ХIабаз апны боксла асабиква йрыдынхалуаз абжьагIвы ХIамыкъва МухIамад дйызйырцатI. АчкIвын йыдынхалуаз абжьагIвчвагьи йызнымкIва йпсахтI, ауаса апхьарта дгIалгандзыкIьара боксла атшыбжьараква гькIайымрышвтI. Анкъвакъвраква рпны йызнымкIва апхъагылара гIатигатI. УахьчIвала Шахмырза боксла аспорт амастерра дакандидатпI. Асквш 2001 агIан ауи Къабард-Балкъар къральыгIва кытмлыкврхIара академия дыцIалын, «инженер-землеустроитель» ъачIвагIа гIацIигатI. Академия данапхьуз Шахмырза футбол дхънахуа далаган, ужвы йъагIадзазгьи дгьакъвыцIуам. Апхьарта дангIалга, асквш 2006 агIан ауи къвырльыкъвхара Буйнакск дырган, асаперква рбатальон дрылашватI. АчкIвын ауаъа хъацIара гIайырбатI, асаперква руыс амадзаква абгата йылайкIтI. Шахмырза дызпхьаз инженер ъачIвагIала йынхара асквш 2008 агIан йджвыквицIан, ужвы йъагIадзазгьи йуыс дазцIабыргпI. – Адгьылква рмажаква тамамта йгIарбара, атыдзква ршвъаква агвныргIвра швабыжта йуыс баргвыпI. Агород апны ауи рыцIагьи йаквыргъвгъвапI. Агвлачваква рымажаква рзыщаквмыргылуа асуд йанабатадауагьи гIаншитI. Зныбыжьла йнаскIьахьу абзазагIвчва ршвъаква руыс зкву ангIаргвынуыргIвуа чхIара уылазлара анатахъхауагьи гьмачIым. Сквшщарда зшвъаква йырхьымпшуа абзазагIвчвагьи щардапI, – йхIвитI Шахмырза. Ауи йшихIвазла, рынхара сквшигIадза ашIыцраква гIалалитI. АбзазагIвчва радгьылква ршвъаква аныргIалра уыс щарда апщылапI. Адгьылква рэлектронна карта адынхалщала апсахраква ахальатIква щардата йащтагIайитI. Амажаквала амакIыра гIарылцIитI, амажаква анаквылуа щардапI. Апхъала аэлектронна карта зларчпуз апрограмми ауыжвгIанчIвии ргIарбараква гьаквшвум. – АуагIа амлыкврхIара йащтата рыгвлачва рмажа надрыскIьата адгьыл дара йангIарыцIаркIхуагьи гIаншитI, ауи амакIыра гIалцIитI. Ауи йапшу агIаншараква рагIан абзазагIв йадгьыл амажаква шбергьльула ашвъа йымата тшангIахIзынайырхара ауыс майрата йалхIыргитI, – йхIвитI ауи. Шахмырза йшихIвазла, таразта йщаквгылам апрограмма йгIанарыцIсуа амакIыраква абзазагIвчва анапшIанаргылуа гIаншитI. Ауаса йызцауа асквш 2012 апхъала йызланхуз апрограмми ауыжвгIанчIвии ъаквымшвауа акIвпI. Ашвъаква раныргIалра ъабаргву ахъазла щардагIвгьи ацIыхъвадза йырзынамырдзауа сквшщарда ртдзы рыхьызла йгыламкIва йбзазитI. – Агород ауацIа уадгьыл апны уыхвара акIвуыршарныс ахъазлагьи швъа щарда атахъыпI. Амажа адзхъа уыхвара уыргылра ахъазла уыгвла уйанымгIалуата йгьауашым. Ауи зымчпауа руыхвара йаналагара рыгвлачви дари амакIитI, – йхIвитI аинженер. Шахмырза йынхара азыгIальаматра шазйыму уылаухIвитI, ауи йуыс йапщылу амадзаква зымгIва дрыхагIвазапI. ЙызнымкIва йдырраква йрылайырхIауа Пятигорск, Краснодар, Ставрополь йакIвшауа асеминарква дрылан. Дызлу агвып швабыжта хвы йыквырцIитI. АчкIвын заман хвит анйауа футбол даситI. Ауи ЙынджьыгьчкIвын кыт абзазагIвчва йгIандыршаз «Абанпара» футболасыгIвчва гвып дрылапI, ауат ареспубликала йгIвбахауа агыларта гIатыргатI, ХIабаз район йакIвдыршауа анкъвакъвраква рпны йызнымкIва йапхъагылагIвхатI. Шахмырза йшихIвауала, йынхара амщтахь афутболасра йгвы пшыхь танарыситI. – ЙцIыхъвахауа асквшква акытква рпны афутболасыгIвчва бзита тшгIащтIырхуа йалагатI, кытипхьадза ргвыпква гIаныршапI. Сквш 35 йгIашIарышвта рыцIа йахIбакву аветеранква ргвып йрыланакIитI. Саргьи сынчIва йгIашIарышвта ауат срылапхьадзахатI. Ауи агвып апны «Абанпара» афутболасыгIвчва зымгIва хIрайцIбапIта, апша хIагIвызата хIнагIвгIагIвитI, – дымшыркъвауа йхIвитI Шахмырза. «Абанпара» футболасыгIвчва гвып дара рхъатачIв фашаквагьи, рдамыгъагьи рымапI, ауи ачкIвынчва аргвышхвитI. Шахмырза йынцIра апны йаба Кьарим йазалху гыларта йымапI. Ауи дхвыцищтара цIагылагIв багъьата, кьангьашагIвта дизалитI. – Сара схвыцта бокс тшыбжьараква рымщтахь ХIабаз сгIатыцIхта сангIайхуаз ацхIа адзхъа саба дсызпшлун. ЙанакIвызлакIгьи ауи днаспшIалуан. Саба сара дшсхъгвыргIвауа йымхIварыгьи йгвы йту йылаквала йудыруан. Ужвы йъагIадзазгьи саба йнашх аквызцIуш шсымчпуш йанакIвызлакIгьи схъа йтапI, зынгьи йгвы сшамсуаш ацIыхъва стагылапI. Саби сани швабыжта сырзыразпI, сынцIра аурала рбжьагажваква сыцгIамгIвайситI, – пхадза йхIвитI ачкIвын. Шахмырза йанакIвызлакIгьи йнашх щтIыхта, дымшыркъвауа, йыгIвзачва дыргвынгIвуа акIвпI дшаъу. Ауаса, йынхара апны йаннадзара швабыжта джьауапкIра ду гIайырбитI, дызцынхауа агвып швапха гIайхъырхитI. ЗынцIра ащтацауа ачкIвын йапхъахьыла ужвыгьи ймырхъйас уыс йымата йпхьадзитI. ХIаргьи ауи ймурадква дшырзынадзуш багъьата йазхъахIцIитI.