ЙМУРАД ПШДЗАКВА ГIАЙДАХIВЫРГIАТI

ЗчкIвынхъа гIазымгвалашвахуа гIвычIвгIвыскIгьи дгьаъамзапI. Саргьи сгIвылакI йыгьрыцIцIуам йапшым агIаншара джьащахъваквала йырчвыз счкIвынхъа. ХIзаман агIапын шгIаталуаз хIалагунта хIабльа-хIабльа топасрала хIанкъвакъвуан, дасу йурам апны топтарыгьажь, тшкъачIвах хIасуан, хIапхъныгIвуан, сагIындакъ аухIщтуан, аджьакъвыжв рыцIа хъара йызрыпссгIуз дджьахIщауа хIипшуан, азаджв йыбгъа азаджв хIаквчIвунта рыцIа хъара йцауа дымчхъата дхIпхьадзун. Апхын ангIаталра Гвым дзыгIв тшкIвабара хIцунта дзыцIахьла хъара йзыдзцауа, хIахъв аущтрала йымчхъу гIахIрыбергьыльуан. Агънылагьи хIабачва рчрыкъвыжвква хIыртагыла аджьанахква, атларыджаква хIымата сыла йхъгIваз атобаква хIыршIапсан, рыцIа хъара йтагIвзуа, ласыта йгьи йкIамхIауата агIашIасырта йнадзауа дайгIайта йхIпхьадзун. Апшыхьпшычв йылата, гвлахIарата йхъвмаруаз хъыхь, хъыфцыф ззырхIвуз гьхIымдыруазтI, хIызгIвадата хIгIадзынгылуан. Ауи азаман аркъажвра йа абзазара йанымгIалуа датша хIальква гIазырбуз мачIыгIвдзан, ахабза мыгIвхъгараквагьи ангIаншуз зынзамызан. Заманипхьадза йара алкIгIараква амапI. Хабза пшдза ъагIвну аунагIва апны саби пшдзагьи гIадзынгылитI. Зхъахв здыруа ачкIвынчва ркъару здыргалуаш рауитI. ЦIабыргыта, ужвы унагIвипхьадза телевизор гIвнагылапI, компьютер рымапI, сотова телефон гIазымрысабапуа дгьаъамзапI. АхIвсса апшдзара уысква рыцIа йхъырхитI, амакъымква йрыздзыргIвитI. АчкIвынчва йапшым «айсра» хъвмарраква йрылапI. Ауаса йцIыхъвахауа асквшква, ателефонква рчIащыгIвара тыцIта гIацIцIуаштI, щардагIвы йапшым аспорт квпшыраква тшрыдыркIылитI. Ауат шахмат йаситI, футболла, волейболла, баскетболла йанкъвакъвитI, йабакIитI, рщаласра гIадырбитI. УахьчIва швзабасырдыруаш аспортсмен шIа ХЪАБЛЬАХЬ Алан Аслан йпа йхабар пшдза даладухауата йгIасазхIвыз Красна Восток кыт алагъьла сальамшвъанкъвгагIвта йынхауа йанду Хъабльахь Фазильат лакIвпI. – Нальчик йбзазауа, йызжвипщсквшу хI-Алан «Нана бгIасгвалашватI» йхIван, сибарныс дгIайтI, ауи ртшхъвагата йгIатигахьу убанда, – лхIватI Фазильат лгвыргъьара сыцагIвылшауа. Сара Фазильат лунагIва сцата Алан данызба пхаракI снанауахвтI. Съанардылыз апещ чкIвын апны саргван дгылата хIайчважвара анджвыквхIцIа уалагата ацIыхъвадза урышв ажвакI гIалаймыршвауата, дгIашIанамкIуата абаза цкьала, йбзазара шакIвшауа гIасайхIвтI. «Акыт йтата аурышв бызшва тшазырщуи ари ачкIвыни шпашIуырпшуаш, амара йасхатI, АлахI дгIайхчатI»-хIва сгвыла сйызхIвахIвуан. Алан йаба Аслан акыт дйытI, араъа дгIадзынгылтI, йан Альбина ПервомайскI дауапI, дкъабардпI. Ауат унагIвара йаналал амщтахь рпхыцIа йъагаз Нальчик город йбзазитI. Аслан ФСИН (Федеральная служба исполнений и наказаний) апны дынхитI, йхъапщыла Альбина ареспублика чымазагIвтара апны дмедахщапI. Ауат хгIвысабичва рымапI: Алан – й-8-хауа, Артур – й-4-хауа аклассква йапхьитI, Арианна хысквша дыртапI. – Сара Нальчик йтагылу й-25-хауа апхьарта й-8-хауа акласс сапхьитI, сшчкIвыныз аспорт схънахтI. Жвасквша саныртал «ФАЙТ – зона юношеских ММА» хвитта абакIрала атшыбжьараква сцауа салагатI, – йхIвитI Алан аспорт штшадикIылыз сахайыргIвазауата. – Швабыжта сырзыразпI хвитта абакIра «амадзаква» сырзызбжьауа, ргвышхвагIвта йсзалуа абжьагIв ъазаква Мешев Алим йгьи Бадраков Рашид. Алан йшгIасайхIвызла, атшыбжьараква йрылу ачкIвынчва 40-гIв йнадзитI. Щыбжьанщтахьла асахIат а 15 йгIашIарышвта асахIат а 18-дза атшыбжьараква дцитI, зынгьи дыгьгIахьшвум. АбжьагIвчва дыззырбжьауа гIапсара йымдыруата йырхъйитI. – Аспорт бзи йуымбауата атшыбжьараква уыгьзыцушым, адахIвраква угьырзынадзушым, – йхIвитI Алан. – ЙзачIвуысызлакIгьи апшта, аспортгьи заман щарда уыквнахитI, ауаса ауи закIылагьи сапхьара йгьазарархум. Алан йхъмаштылра йгIалахатI йапхъахауата дызлалыз Нальчик йакIвшаз грэпплингла анкъвакъвра. Ауи амщтахь Махачкала, Грозна, Владикавказ, Домбай, датшагьи ашIыпIаква рпны йакIвшаз анкъвакъвраква дрылан. – Анкъвакъврата уызлалхьу рпны рыцIа угвы йгIатахайа? – сицIгIатI ачкIвын. – Анкъвакъврипхьадза щтакI гIаннажьитI, – йхIватI Алан. – Швабыжта сгвы йгIатахатI Домбай йакIвшаз грэпплингла Россия анкъвакъвра. Домбай апшдзари ахIауа цкьи къару чIыда гIасыларцIата гIацIцIуаштI, ауи анкъвакъвра апны йгIвбахауа гыларта гIатызгатI, чIахIра швъа йгьи медаль гIасквнадыргатI. Сгвы йгIатахатI Ингвыщ Республика йакIвшаз хвитта абакIрала Россияла атурниргьи. Ауаъа тшпсщара сымамкIва 4-н сайсытI. Ахын сайгIайтI, йпщынхуз амцIасра апны зуыртла йщтIыхыз ачачан рахIа дымчхъахатI. Алан дызлалхьу анкъвакъвраква рпны чIахIра швъата, дипломта йгIайквнадыргахьу гьмачIым. Ауаса апхъахьыла ртшхъвагата йыззпшуа рахIагьи йщардапI. – СгIатгараква йрыщату, ргвышхвагIвта йсзалуа абжьагIвчва йгьырхъазым, – йхIвитI Алан. – Швабыжта сырзыразпI квырмыш ду ззысчпауа сани саби. Ауат рзамангьи, йсыквдрыдзуа ахчагьи йампшуата сдыргвышхвитI, сгIатгараква йрайгвыргъьитI. АшIаква йрыуата мурад пшдзакI змам дгьаъамзапI. – Апхьарта сангIалгара Астрахань йтагылу айсра академия сыцIалырныс, аспорт апынгьи адунейла йызнымкIва счемпионхарныс смурадпI, – йгвтара гIасайхIвтI Алан. ЗуагIахъа рыбызшви рцIаскви зща йалата йгIадзынгылуа, йщаквкIу, зажва багъьу Хъабльахь Алан ймурад гIайдахIвуазтын, йшвапхала йгIадзынгылуаш щардагIвхуштI. Йаргьи йыхьыз бзирала йанырхIвара йыщайдза ъану Красна Восток кыт, дазрыпхьаз, мгIва тамам дыквызцIаз, цIагылагIв багъьата йзалыз йани йаби ргIапсара шымдзыз гIайырцIабыргуаштI, дыздыруа зымгIвагьи йыладухуштI.