ЙМАКЪЫМКВА АУАГIА ЙРЫЛАЗЛУШТI

Июль а 24 йбергьльу акомпозитор ДАУЫР Аслан Али йпа йхъыцIуашыз асквш 80 йазынархата Черкесск город акультури азъазари рколледж апшцIа йгылу йчвахъабага адзхъа айззара акIвшатI. Ауи йалан культурала КЧР а-Министерства аунашвачпагIв АГЫРБА Зураб, КЧР-ла гIатгара зму акультура анхагIвы ДАУЫР ДжьагIафар, амедицина наукаква рдоктор ДАУЫР Борис, КЧР АуагIа Айззара (а-Парламент) адепутат, «Адыгэ Хасэ» жвлара организация аунашвачпагIв АСЛАН Али, Россияла адыгьаква руагIахъа-культура автономия апрезидент ОХВТА Александр, Дауыр Аслан йыцапхьаз, йаргванква. Айззара акIвзыршуз Дауыр ДжьагIафар акомпозитор, амузыкант, арыпхьагIв Дауыр Аслан хIреспублика, хIкъраль ркультура атшауацIыхра къару ду шалайцIаз, ршIыйара злу чкIвыныргIа рарыпхьара дшазынхаз дгIаквчважватI. – Аслан дсабита амузыка дхънахтI. Ауи амакъымква шгIаншауа, уарад шаларцIауа йанакIвызлакIгьи йымаджьащахъван. Акъвабыз абжьы йгвапхун. КъарчаЧеркес Россия йалалищтара йцIыз асквш 400 Москва апны йандыртлапIуз асквш 1957 агIан Аслан Къарча-Черкес акультури азъазари рынхагIвчва дрыцта агвыргъьахъв далан. Ауаъа акIвпI йыршIыйара мгIва тшангIахънатIы. Ауи азаман зыхьыз дута йгаз акомпозитор Мурадели Вано Дауыр Аслан амузыка дшазычпу йылибгIатI, агIвыджь райчважвара амщтахь ачкIвын дкомпозиторхарныс йтахъхатI. Йымкъвахуата Аслан Ставрополь музыка училища дыцIалтI. Дирижерта дшапхьузымца аучилища апны унашва зхъицIуз астудент уагIахъа ансамбль ахъазла макъым алайцIауа далагатI. УрышвихъымгIва йазынайырхаз ауарадква щардагIвы йыргвапхун. Аучилища бзидздзата йапхьуз Дауыр Аслан Лагъь КIавкIаз ауагIахъаква ршIалахIвара гIайрысабапуамца дугьи хвыцгьи йыргвапхуз макъым гIанйыршун, йырхъаштылхуаз ауарадыжвква псы гIархъайцIахуан. Акомпозитор бергьльы Дауыр Аслан Ставрополь училища дангIалга Чайковский Петр йыхьыз зхъу Москва къральыгIва консерватория йшвъаква риттI. Апхъапхъа адирижер класс дрылан, уадыргIвана композиторта дапхьатI, – йгIайззаз йгIадйыргвалашвахтI Дауыр ДжьагIафар. Дауыр Аслан аконсерватория дъадзапхьуз йбергьльу амузыкантква – Нейгауза Генрих, Растропович Мстислав рконцертква дцун, ауат рыршIыйара цIолата тшахайыргIвазун. РшIыйарала зыхьыз зыргаз акомпозиторква Волков Максим, Галахов Олег, Калистратов Валерий, Чалаев Ширвани, Дунаевский Максим, Рыбников Алексей Дауыр Аслан бзита дырдыруан, ауат зымгIва аконсерватория апны йацапхьатI. Ауи агIан аконсерватория йынхуз СССР ауагIа рартист, Ленин йсогIа гIазквнадыргаз Щедрин Родионгьи Дауыр Аслан дшмузыкант бергьыльхуш йхIвалун. Акомпозитор шIа КIавкIаз ауагIахъаква ршIалахIвара йгIахъихыз «Щхъа хвашвакI» анкъвакъвра, уадыргIвана Москва къральыгIва хор репертуар йаларцIатI. Анкъвакъвра ажюри знапIыцIаз йбергьльу акомпозитор, Ленин йсогIа алауреат, Социалист нхара а-Фыр, СССР ауагIа рартист Свиридов Георгий Дауыр Аслан къарча, къабард, осетин йгьи грузин уагIахъа шIалахIвара йгIаквху ауарадква анйагIа, араса йхIватI: «Дауыр Аслан йуарадква пшдзапI, гвтынчра гIауыларцIитI….». Акомпозитор шIа ауаса дъагIадыртшхъваз швабыжта йгвапахатI йгьи дукI йнамихуата аконсерватория дшапхьаркIвуз акомпозиторква р-Союз даларцIатI. Дауыр Аслан аконсерватория дангIалга йцри шта дгIахъынхIвыхтI, Черкесск город музыка училища арыпхьагIвта, директорта дынхатI. Ауи адыгьаква ркультура зырбайаз уарадта йалайцIаз гьмачIым. Ауат йрыуапI «Адыгьаква», «Акыт ашваква», «Щхъа гIахIвра», «Истамбул мгIва» гъыбза датшагьи. Дауыр Аслан йхъыцIуашыз асквш 80 йазынархаз айззара апны культурала КЧР аминистр Агырба Зураб йшгIаликIгIазла, йбергьльу акомпозитор, адирижер йыршIыйара чкIвыныргIа йырхъмаштылуата рбжьара, рарыпхьара магIын ду амапI. – Дауыр Аслан сквшщарда унашва зхъицIаз амузыка училища апны чкIвыныргIа амузыка йазибжьара йахъазымкIва, ауагIахъаква бзи йырбаз уарад щарда гIанйыршатI. Къарча-Черкес йгьи Россия утыцIта аконцертква адигалуан, Къабард-Балкъар, Адыгея, Абхазия, Трыкв, Иордания, Сирия датшагьи агIарып къральква рпны йуарадква згвапхауа щардагIвыпI. ХIара Дауыр Аслан йыхьыз зхъу акультура нхарта йшацхIкIуаш хIазхъвыцитI. Дауыр Аслан дызхъмаштылуа ахIбачвагьи чкIвыныргIагьи сшвзыразпI, – йхIватI аминистр Агырба Зураб. «Адыгьа намыс», «Саратина», «Увези ты меня при луне», «Когда узнаешь ты» ашваква уагIахъа уарадхатI. Къарча-Черкес а-Гимн амакъым Дауыр Аслан йалайцIатI, ажваква КЧР ауагIа руысагIв Созаруков Юсуф йчIвыпI. Ачеркесква р-Дуней ассоциация агимнгьи Дауыр Аслан йакIвпI йалазцIаз. Дауыр Аслан йгIанйыршаз аршIыйагIвчва гвыпква ГIвадахь Россия апны ашвахIварала рыхьыз дыргатI. «Даханагъва» ахIвсса рансамбль КIавкIаз ауагIахъаква йыргвапхадзаз агвыпква йрыуапI. СКФО-ла йбергьльу ашвахIвагIвчва рпхьадзара йалу, КБР-ла гIатгара зму артист Тхагалегова Светлана «Даханагъва» ансамбль апны акIвпI лыршIыйара амгIва ъагIаджвыквылуа. Акомпозитор Дауыр Аслан хIкъраль, хIышта рпны ршIыйара злу чкIвыныргIа рарыпхьара, акультура ртшауацIыхра къару ду ъалайцIуз рыхъазла артшхъвагакви ачIахIра хьызкви гIайквнадыргатI. Ауи Россия Федерация йгьи Абхазияла гIатгара зму азъазара анхагIвы, «Къабард-Балкъар Республика ауагIа рартист» чIахIра хьызква дрынкъвгагIвын. Россия, Къарча-Черкес йгьи Ставрополь край акъральыгIва согIаква гIайквнадыргатI. Дауыр Аслан асквш 1999, мартI а 8 сквш 59 дыртата адуней йхIваджьтI. Ауи сквшщарда дъанхаз Черкесск акультури азъазари рколледж йыхьыз ахъырцIатI. Аскульптор Кемрюгов ХIатыза Дауыр Аслан йквпшыра амата йгIаличвыз ачвахъабага аколледж адзхъа йдыргылтI. Айззара апны йгIачважватI ахабзалыхыгIвчва, ажвлара уыснкъвгагIвчва, Дауыр Аслан йыцапхьаз ахIбачва. Ауат акомпозитор, арыпхьагIв Дауыр Аслан пхата дгIаргвалашвахтI, йыхьыз зпщылу акультура тынхаква рхчара, йшвапхала чкIвыныргIа ргIадзныргылра магIныта йрыму гIархIватI. Дауыр Аслан йаргванква акомпозитор ансисквшагьи айззара ъайзадыргалуа, дъархъмаштылуа ахъазла йшырзыразу рхIватI. ЙгIайззаз Дауыр Аслан йчвахъабага апны ахIврапшдзаква щтIарцIатI.