ЙГIВЫРАКВАЛА АГIВЫЧIВГIВЫС НХАГIВЫ ДЩТIИХУАН

Октябрь а 11 жвасквша цІытІ агІвгІвы, ажурналист бергьльы, абаза литература апны абзагІвра ащата щтІазцІаз, абаза газет атшауацІыхра къару абгала йазынхаз МУРАТЫКЪВА Николай Цацу йпа адуней йхІваджьищтара. «Абазашта» газет аредакция уахьчІва анхагІвчва ауат асквшква хъамкІыхла йхІыгІвстІ, пІатІу ду зквхІцІуз, ахІба пшдзата йхІпхьадзуз КІольа щымтигІадзапхьадза акабинетква дырнашылуамца заджвипхьадза сальам гІахІайымхкІва йынхара дшаламгуз хІгвы пхата йгІатахатІ. ЙанакІвызлакІгьи дацІарпхха йгІвычаз, знашх хътІыз, зымшыркъвараква къвыпIчІыз ауи агІвычІвгІвыс бзирала дгІахІгвалашвахуата щардала хІйыквчважвитІ, зынгьи дыгьхІхъаштылуам. Сквш 27 дыртата абаза газет апны зынхара джвыквызцІаз Муратыкъва Николай анцІрала ауи дапщылахатІ. Йара йшихІвахлуз апшта, дгІазлашваз агвып – Джьгватан Къали, ТхІайцІыхв Бемырза, ХІачвыкъва ЗамахІщари, Ерыжв Умар, СымхІа СултІан, ЧвзыкІьа ШахІымби, ЛагІвычв Джьамльадин урылата уымжурналистхарныс закІытагьи йгьуылымшарызтІ. Акъальам знапІы йыцІахъвмаруаз агІвгІвчва рпхьынцІыгІва йыцІашваз Николайгьи ауат дырзынадзарныс йгвы йтайкІыз йзырхъйатІ. Ауи Къарча-Черкесла зыхьыз бергьыльхаз джурналистхатІ, дыгІвгІвхатІ, Россия ажурналистква йгьи агІвгІвчва радкІылараква днарахвтІ, «РФ-ла гІатгара зму акультура анхагІвы», «КЧР-ла гІатгара зму ажурналист» чІахІра хьызква дрынкъвгагІвын, сквшщарда «Коммунизм алашара» (Абазашта») газет аредакторква дырзаместительта дынхатІ. Абаза бызшвала йгІацІцІуа агазет сквш 40 йацта йазтыз Николай Цацу йпа ауагІа йраргвандзаз дыршІыйагІвын, ауи йкабинет гвбжара змата акыт йгІатыцІыз гІвыджь–хгІвы гІвнамкІва мшкІы гьымцузтІ. Зынгьи йгвалымсмыз ажурналист ауат йгвы аквкІта дрыздзыргІвуан, тшызлагІайзынадырхуз ауысква йгІвыраквала йгІащтІихуаз йахъазымкІва цхърагІарагьи щардагІвы йырзыгІанйыршун. Муратыкъва Николай абаза литература дызлалалыз бзагІврапІ. Ауи кыти-кытла уагІа бзита йтаз йгІвыраква йырфыр хъадахатІ. Ауат адикІылхта книгата йангІацІищтх акІвпІ абзазара апны рахІа хвы змата йпхьадзуз рахІагьи йанбергьыльха. «Адгьыл апшвымаква», «Кърар», «Борч», «АгІвы йпхара адгьыл аршышитІ» – абар ауи йкнигаква хъата йритыз. Зсабихъа айсра сквшква йрыквшваз, зынгьи йымбаз Абашта айсра Ду йаладзыз йаба (адуней дангІаквыл йаба ар дызшІыртхьан) дгІазгвалашвуз, ауи знымзара-зны дгІайхуаштІхІва йызпшра КІольа йгвы арычкІвынтІ, зымгІва рыхъазлагьи рыцхІащара йылата дгІабзазатІ. Ага ауаса йаъазтынгьи, ауи зхІаль багъьаз, зуыс йанакІвызлакІгьи йнардзаз, амц йгьи ахъамгвыгІвра йырпшІагылуаз, кърар змаз, борчта йыквицІаз зынгьи йамайжьуз дгІвычІвгІвысын, дабаза хъацІан, йгІариква рыхъазла дшвапхан, дынбжьагІв цІабыргын. Адгьыл хъынхІвитІ, азаман мгІвайситІ. ЙгІацІаситІ ажурналист шІаквагьи. Ауат хІуагІахъа ртурых йамшгІвырахата архив йщтІу абаза газет азкІкІраква йызнымкІва йахъдрышвтлуштІ. Агазет ащата щтІазцІаз, атшауацІыхра къару ду алазцІаз абанпара ауат йызлардыруаш ргІвыраквала ракІвпІ. Ауат йрылапІ Муратыкъва Николай Цацу йпа йкъальам цІара йгІаннаршаз апублицистика гІвыра швкІпхьадзарагьи. Ауат агІвгІвы бергьльы йыхьыз анцІрала ахъмаштылра йшгІалахаз йаквшахІатпІ.