«ЙГIАХIЦХЪРАГIАРНЫС ЙХIАЗЫРПI»

КЧР а-Хъада ТЕМРЕЗОВ Рашид Москва апны акыт млыкврхIарала РФ аминистр ПАТРУШЕВ Дмитрий дйынйатI. Анйара апны йцIыхъвахауа асквшква йащтацауата тшауацIызхуа Къарча-Черкес акыт млыкврхIара, хIызту асквш апны ауи анархарала ахачIвква йрыквчважватI. Темрезов Рашид КъарчаЧеркес апны ацIлауатраква ртшауацIыхра, йабаркIыта ашвырква ъапшцIырщтуа аквтаква йгьи ашвырква рщтIацIартаква руыхвара апны цхърагIара гIаддрадзарныс аминистр тшизынайырхатI. Ауи йшгIаликIгIазла, амлыкврхIартаква рпны апшта, ауагIагьи ацIлаква щардата йларцIауа йалагатI. Патрушев Дмитрий йгьи Темрезов Рашид «Акыт асквш» апкъ йтата йакIвдыршуш анхараква йырпщылу ауысквагьи гIащтIырхтI. – ХIара хIыхъазла йхъаду амгIваква рырчIаджьра, адзцагаква руыхвара, акыт йынхауа аъачIвагIагIвчва йрыцкIра акIвпI, – йхIватI КЧР а-Хъада. – Ауи ауысквала РФ а-Правительства, йалкIгIата акыт млыкврхIарала а-Министерства, гIахIцхърагIарныс йхIазырпI.