СКФО В Северной Осетии в 2024 году появятся прямые авиарейсы в Нижний Новгород СКФО Сельхозкооперативы в КБР набирают популярность Актуально Региональный этап Всероссийской олимпиады по истории российского предпринимательства прошел в КЧР на базе КЧГУ Актуально Глава КЧР Рашид Темрезов в Приэльбрусье встретился с активистами Общероссийского движения детей и молодежи «Движение Первых» Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева

ЙГIАДЗЫНГЫЛУА АБАНПАРА ШВАПХАТА ЙЫРЗАЛИТI

19.02.2020 200
ЙГIАДЗЫНГЫЛУА АБАНПАРА ШВАПХАТА ЙЫРЗАЛИТI
Азаман агIвспхьадза асквшква апхъала хIыргарыгьи, дзачIвызлакIгьи йынцIра апны щта гIанызжьыз агIаншараква йгвы йгIатахитI. ХIынцIра аура абзазара йапшым ахачIвква хIпахь йгIанаргылитI, ауат рырхъйара хIара йхIнапIыцIапI. ХIкъраль йапшым азаманква рагIан фырта тшгIазырбаз ачкIвынчва рпхьадзара швабыжта йщардапI. Ауат Абашта айсра Ду апны йайсытI, Чернобыль пхаста ацIыхъватшараква дрыдзуата рызгIвадара йамайгьдзауата хъацIара гIадырбатI, Афганистан апны ринтернационал борч дырхъйауата рыхьызква атурых йгIаларжьтI. УахьчIвала Афганистан айсра йалаз хIкъральгIвчва ауи йанаквчважвахуа рхъвыцщаква гьаквшвум. Ага ауаса йаъазтынгьи, ауи агIаншара хIкъраль атурых йабгъьыцпI. ХIреспублика йтыцIта 1200-гIв райхIа Афганистан айсра йайсытI, ауат йрыуата 42-джь рхъа щтIарцIатI. Ауат йырзынарху ачвахъабага Черкесск «Аллея Славы» апны йаныргIалпI. СквшигIадза Афганистан айсыгIвчва йырзынарху афильмква ахъырхитI, апхьагаква гIацIырщтитI, ауат хъацIарата йгIадырбаз, гIазабта рыла йыцIсыз ауыжвгIанчIвиква ахадыргIвазитI. УахьчIва швйабасырдырырныс стахъыпI Афганистан айсра гIвысквша йалаз БЫДЖЬ СултIан Николай йпа. СултIан асквш 1966 агIан ЙынджьыгьчкIвын кыт дйытI. Акыт апхьарта агIкласскI дангIалга ХIабаз квтанай апхьарта дыцIалхтI. Ауаъа дангIацIцI Черкесск апны сварщик ъачIвагIа гIацIигатI. Асквш 1984 агIан къвырльыкъвхара Туркмения, Ашхабад город дыргатI. – Ашхабад хымызкI атшыбжьараква хIанырхъыс, Афганистан йыргуз айсыгIвчва сахIварала срылалын, Кундуз хIыргатI. ГIвысквша скъвырльыкъвхара салгандзыкIьара ауаъа сайсытI, – хIатладза йхIвитI СултIан. Ауи съадзайачважвуз Афганистан апны йбаз, дызлаз гIаншараквакI гIайгвалашвахырнысла санйыхIва, йшичвыбаргву, ауат асквшква шакIвшаз даквчважварныс шитахъым сыласхIватI. «Айсра бзикIгьи гьаъам, сара согнеметчикын, хIыгIвзачва щарда гьгIахънымхIвыхтI, лдзгIара щардагьи хIадзатI, ауаса сара АлахI сгIайхчан, сгIахъынхIвыхтI», – нашхыйадза джьауап гIайтхтI ауи. СултIан йтгIачва йырзыгIайгIвуаз асальамшвъаква рпны Монголия къвырльыкъв йхауата акIвын йшаницIуз, Афганистан айсра дъапшцIу ахъазла йан ФатIимат лгвы акъвпра гьитахъымызтI. Ауи йшихIвауала, апхъала ауагIа рпатриот бжьара рыцIа йбагъьан, йыззайсуаз, йыззхъарцIуз зымгIва магIын ду азырбун. – Сара хIкъраль санызшIнат, хачIвыта спахь йгIанаргылыз синтернационал борч сырхъйатI. Ага сквшщарда ахъыцIызтынгьи, зынгьи сгьамайгIваджьхтI, – йхIвитI багъьата СултIан. СултIан «Войну-интернационалисту от благодарного афганского народа» йгьи «70 лет Вооруженных Сил СССР» медальква гIайквнадыргатI. СквшигIадза февраль а 15 Афганистан хIкъраль айсыгIвчва ангIатырдах дыртлапIауата хIреспублика ауацIала йапшым анйараква адыргалитI. ЙызнымкIва ауи ЙынджьыгьчкIвын квтанай апхьарта апны йакIвдыршуз айззараква ддрайгватI. УахьчIвала СултIани йхъапщыла Мадини гIвпачва гIадзындыргылитI. АхIба КIазбек дынхитI, айцIба Азамат ъачIвагIагIацIгарта дапхьитI. Ауи йшихIвауала, йпачва йара йыла йыцIсыз рбарныс гьитахъым. АчкIвынчва раба йфырра рхъа аладухитI. Быджь СултIан йапшта Афганистан йайсыз хIайсыгIвчва рыцхIагIарата йырбаз ауыжвгIанчIвиква ахагIвазара атахъыпI. Афганистан апны зинтернационал борч джьауапкIра ду рылата йзырхъйаз, хъацIари фырри гIазырбаз айсыгIвчва йгIадзынгылуа абанпараква швапхата йырзалитI.
200 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный