ЙАПХЪУ АУЫСКВА ЙРЫКВЧВАЖВАТI

Къарча-Черкес асоциальна-экономика тшауацIыхра йазынархата йакIвшаз алачIвара йалан СКФО-ла РФ а-Президент йгIащтийыгIв МАТОВНИКОВ Александр, КЧР а-Хъада ТЕМРЕЗОВ Рашид акъральыгIва власть органква рунашвачпагIвчва, ахабзахчара органква ргIащтийыгIвчва, агородкви арайонкви рхъадаква. Матовников Александр йгIайззаз тшырзынайырхауата СКФО аштаква дгIархъыкIвшумцара ауат рпны ажвлара-политика аъаща, асоциальна-экономика уысква штшрыхайыргIвазаз гIаликIгIатI. – Ажва аламкIва, рыцIа гватра ззалхчIву Россия Федерация а-Президент Путин Владимир а-Федеральна Айззара йрызцауа йтшазынархара апны йгIаликIгIаз ахачIвква ракIвпI. Ауаъа йгIарбапI йацхIырхъйуш ауысква, аинфраструктура, арыпхьара, азгIвадарахчара, аэкология, анаука датшагьи ахъвшараква йрылагIжьуаш аинвестицияква. Ауат зымгIва атшауацIыхра йазынхуштI. Ауи йгIалцIла «О национальных целях и стратегических задачах развития Российской Федерации на период до 2024 года» Унашва йгIанахIвауа йалкIгIу гватра азалшвхырныс тшшвзынасырхитI, – йхIватI СКФО-ла РФ а-Президент йгIащтийыгIв. АлачIвара апны Къарча-Черкес асоциальнаэкономика тшауацIыхрала дгIачважватI КЧР а-Хъада Темрезов Рашид. Ауи апромышленность, азгIвадарахчара, арыпхьара, атуризм, асоциальна уысква датшагьи анархараквала йрылшаз даквгIашIастI, ареспублика атшауацIыхра йаквшахIату агIарбараква гIаликIгIатI. ЙгIауахвырквын, асквш 2012 угIалагата асквш 2016-дза ареспублика апны йдырхарджьуа йаквшвауа сом 14,5 миллиардла йалахIатI. А гропромышленна комплекс даквгIашIасуата хIреспублика а-Хъада йшгIаликIгIазла, апсабара аъаща йгьи акъральыгIва цхърагIара рбзирала акытмлыкврхIара хъвшараква рпны йхIагIу агIарбараква йырзынадзатI. ЙцIыхъвахауа ацысквшала акытмлыкврхIара пкъыгIваква бзидздза йрылахIатI йгьи асквш 2017 агIан сом миллиард 32 ахв дырхарджьтI. КЧР а-Хъада йшгIаликIгIазла, афедеральна квта ацхърагIарала йгьи социальна магIны зму аинвестиция проектква абзазара йъаларжьуа рбзирала апромышленность апны атехнология шIыцква йрызцитI. Ауи йгIалцIла йцIыхъвахауа асквш апромышленна рхарджьра аиндекс процент 108 йаъарапI. СКФО аштаква рпны апромышленна рхарджьрала Къарча-Черкес йхпахауа агыларта амапI, Россияла – й-17-хауа атып. Ауыхвара хъвшара даквгIашIасуата йшихIвазла, асквш 2011 угIалагата азгIвадарахчара, арыпхьара, аспорт, агазцагакви адзцагакви, амгIваква йырпщылата уыхвара 420 гIаншатI. СКФО-ла РФ а-Президент йгIащтийыгIв Матовников Александр йшгIаликIгIазла, Къарча-Черкес асоциальна-экономика аъаща йащтацауата тшауацIнахитI. Ага ауаса йаъазтынгьи, рыцIа гватра ззалхчIву ахачIвква щардапI. АлачIвара амщтахь Матовников Александр ареспублика ахабзахчара органква рунашвачпагIвчва дрынйатI.