ЙАПХЪАХАУА ЙЫНХАРА АУАГIА ЙДЙЫРБАТI

Черкесск йаныргIалу «Чарли» кинотеатр апны анйара джьащахъвакІ акІвшатІ. КВН йгIахъвмаруаз, амшыркъвагIв бергьльы, арежиссер, асценарист, апродюсер ТАНИЯ Теймураз йапхъахауата йахъихыз «Спасибо деду за Победу» зхьзу мшыркъвара нархара зму афильм ауагIа йыддырбатI. Афильм апхъала ауи агIацIщтра йацхърагIаз «Сатурн» фирма агIащтийыгIвчва йдучвамыз ларпшра программа адыргалтI. Апрезентация йалаз анкъвакъвраква рпны йапхъагылагIвхаз «Сатурн» йгIацIырщтуа афачIвква согIата йрырттI. «Ридада» уагIахъа саби хореография ансамбль асолистква Карасова Юлдуз йгьи Ашкацауа Ислам, Мамхагъ Карина ауатыкв дрыпшдзатI. Ауи амщтахь Теймураз Тания йгIайззаз ажурналистква разцIгIараква джьауап риттI. – Сара афильм щарда цIуата йахъысхырныс сгвы йтан, ауаса режиссер дыгьсмауазтI, ауи йгIалцIла режиссер ъачIвагIа гIацIызган, схъатала садынхалхтI, – дымшыркъвауа йхIвитI ауи. – Черкесск город апны ауи пычIвта агIарбара ъаджвыквхIцIаз сара сыхъазла магIын ду амапI, йауа ухIварыквын, йбыжьбахауа акласс араъа сапхьатI, агIагвалашвахра пхаква сгвы йтаркIвапI. Черкесск город съадзабзазуз щарда тшазызбжьатI, уагIа щардагIв срабадыртI. Ари анхарагьи ссабихъа гIагвалашвахраква йырпщылапI. Айчважвараква рымщтахь йгIайззаз Теймураз йыдзхъагылата сурат йыцхъырхтI, ауи йпикъыз аторт йызтахъыз зымгIва йыршIашварныс рылшатI. Афильм апны Бероев Егор, Алферова Ксения, Хагба Кесоу йгьи Онежен Алексей афыр хъадаква ртурасквала йгIахъвмартI. Ауи гIазквчважвауа зынцIра шабгу агород йбзазаз, жвасквша йырту Сандрик йандуи йабадуи ъабзазауа акыт апны агIаншараква ракIвпI. Йабаду Абашта айсра Ду атлахан агъа дшипшIагылыз, ауи хъацIарата йгIайырбаз мшыркъвара турасы йтагылата йгIахънатIитI. Абашта айсра Ду агIаншараква ауи апш нархара амата йангIахъутIуа швабыжта усакъхара атахъыпI, йауа ухIварыквын, айсра агIаншара чIвыхьква ахІбачва гьарпагьаджьта рхъмаштылра йалапІ, ауаса ари амальла йгІаныршу афильм йгIадзынгылуа абанпараква рыцІа йырзаргванпІ. «Спасибо деду за Победу» фильм гылартата йакIуаш азаман йгIахIнарбахуаштI.