ЙАНАЗАМАНУ ТШАЗРЫХIАЗЫРРА АТАХЪЫПI

ЙазакIу акъральыгIва рхъвыхраква (ЕГЭ йгьи ОГЭ) асквш 2009 йгIашIарышвта хIкъраль апхьартаква, агимназияква, алицейква йгIарылгауа ансисквша йырхъыситI. Йапхъахауата архъвыхраква асквш 2001 агIан Чувашия, Марий Эл, Якутия республикаква, Самара йгьи Ростов областьква рпны агIпредметкIла йакIвшатI. Ансисквша ауат архъвыхраква йырхъысуаз йрылахIауа йгIамгIвайсуан. ЙащтагIайуаз асквш акъральыгIва рхъвыхра жвиц регионкI ахъыстI. Арат архъвыхраква арыпхьарала РФ йаминистрыз ФИЛИППОВ Владимир ауыжвгIанчIви арыпхьара рахIа йаквыргIапста йщаквйыргылын, йапхъахуз архъвыхраква джвыквырцIатI. УахьчIвала апхьагIвчва аквтанай апхьарта йгIалгарныс, ауи амщтахь йхIаракIу апхьартаква йрыцIалхырныс ахъазла амаль амамкIва ЕГЭ йахъысра атахъыта йцатI. СынчIва акъральыгIва рхъвыхра йазрыхIазырра шакIвшауа хIхIырдырра ахъазла Къарапагва йтагылу арыпхьара Квта хIцатI. Араъа апхьагIвчва рдырраква швабыжта йхIагIапI, акъарапагваква арайон йгьи ареспублика олимпиадаква рагIан апхъагылараква йырзынадзитI. СынчIва араъа й-11-хауа класс гьрымам, й-10-хауа акласс апхьагIвчва агIгIвы йнадзитI, й-9-хауа акласс йапхьауагьи агIгIвы ракIвпI. АчкIвынчви ахIвсси дасу йара йыквыргIапсу анархара лырххьатI, апхьарта амщтахь йырмагIынхара ртахъу щаквдыргылхьатI. Ауи апш щаквыргылра лыхра ан-абачва йырхъазымкIва арыпхьагIвчва рпхдзгьи ймачIымкIва йалапI. Зсаби апхьарта дгIалгауа зымгIва рапшта, КIЬЫЩМАХВАРГIА Мурати Анжелики джьауапкIра йгьи гвалагIваласра рылапI. Ауат рпхIа Полина сынчIва й-9-хауа акласс дгIалгитI, лапхьара швабыжта йбзипI. Ауыгьи й-9-хауа акласс йгIалгауа зхъысуа ОГЭ зкIуаш дрылапI. Полина архъвыхраква злалкIуаш урышв бызшва, математика, обществознание, биология шракIву багъьата йщаквлыргылын, ауат апредметквала рыцIа цIолата тшылрыхIазыритI. Апхьарта дшгIалгауа Черкесск къала йтагылу, арыпхьагIвчва ъадрыхIазыруа аъачIвагIа гIацIгарта – Къарча-Черкес педагогика колледж дыцIалырныс лмурадпI. Ауи ъачIвагIа гIацIылгарквын, лцри кыт дгIацапахта арыпхьагIвта дынхарныс лгвалапI. Полина экзамен злалкIуаш апредметква ракIвымкIвагьи, физика бзи йшылбауа гIахIалхIвтI, арыпхьагIв КIЬЫЩМАХВА Дина Дольат йпхIа джьащахъвара щарда длырдыритI. Къарапагва кыт сынчIва й-11-хауа класс апхьагIвчва гьрымам, зымгIвагьи й-9-хауа акласс йгIацIцIхын, йапшым аколледжква йапхьитI. ХIыззнайуа асквш ЕГЭ зкIуаш БУЛКIАЙ Амра Мурат йпхIагьи дрылапI. Ауи й-11-хауа акласс дгIалгата, йхIаракIу аъачIвагIа гIацIгарта дыцIалырныс лмурадпI. Амра йшылхIвауала, й-1-хауа акласс дангIай арыпхьагIв ймагIну анылдыр йгIашIарышвта, ларгьи арыпхьагIвта дынхарныс лгвы йталкIын, лгвтара псайспадза дазцитI. Ауи биологияла рарыпхьагIв ХIАРАТОКЪВА Льольа МхIамат йпхIа йгьи аурышв литература дзырдыруа ЙУАН Баблина Мурат йпхIа йалкIгIата дырзыразпI. Амрагьи лынбжьагIв Полина лапшта арыпхьагIвчва ъадрыхIазыруа йхIаракIу апхьарта дангIалгара амщтахь бзидздза йылбауа, дъайыз, дъарыгIзаз Къарапагва кыт дгIахъынхIвыхта йгIадзынгылуа асабиква алрыпхьара лтахъыпI. АгIвыхIвссагьи райцIбачва апхьара йаквгIазшIыртитI. «Йампхьауа насып гьйымам, йапхьауа, акъыль зму, йапхъала уыста дызлалуа йзымайрата йырхъйуштI, абзазара апны зымгIва хвду йыквырцIуштI», – рхIвитI ауат. Ауат ЙазакIу акъральыгIва рхъвыхраква йанырхъысуашдза заманта йрыму гьмачIым, апхьагIвчва зымгIвагьи й-11-хауа аклассдза йазымпшуата дырра цIола раура шатахъу рхIвитI.