ЙАМЫРДУШ ШВАПХА ПШДЗА ДЫРХIАТI

Россия Федерация а-Президент Путин Владимир й-Унашва дырхъйауата йцIыхъвахауа асквшква хIкъраль аштаква зымгIва рпны асабигIзарта шIыцква руыхвитI, апхъала йынхуз гIадыршIыцхитI. Ауи акIвымкIвагьи абжьагIвчва рынхара шIыцра, псахра щарда гIалалитI. Айшыста йухIвушызтын – ахвыцква йъарыдынхалуа арыпхьара нхартаква азаман тшгIахьдмыршвауа апхъала йчIвырхъитI. Арат амшква Псыжв йаныргIалу «Звездочка» сабигIзарта апны Абаза муниципальна район йаланакIуа арыпхьара нхартаква ръачIвагIагIвчва рыхъазла семинар адыргалтI. Ауи йалан Абаза район арыпхьарали культурали а-УнашвахъцIарта знапIыцIу Мартаза Зимфира, арайон сабигIзартаква рунашвачпагIвчва, абжьагIвчва, ан-абачва. Асеминар йгIадгылыз асасчва асабигIзарта шаныргIалу, ахвыцква апахь йшхъвмаруа йапшытI. Ауат йырбазла йразыта КIарма Юлия МухIамад йпхIа йылбжьауа зымгIва рацкIыс йайцIбу асабиква ргвып апны йхътIу атшыбжьараква шакIвшауа дырхъвыхтI. Ари абжьагIвы швапха бзи лымапI, асабиква дшрыдынхалуа джьащахъвапI. Агвып «сасра» йрызгIайыз Машенька йылчвыдзыз Колобок йазыпшгIарныс абжьагIвгьи асабиквагьи атурых «йалалтI». МгIва йъадзаквыз абжьагIвы абна йгIайуаз амзагIв цIлаква йхIагIуи йсагIуи, йдууи йгьи йхвыцуи ауи асабиква йдлырхIватI. ХъвмарщакI йалазшва ачкIвынчви ахIвсси зыхьыз рдыруаз ахIврапшдзаква, агIвна псауышвхIакви абна швыркви гIашIырпхьадзатI. МачIкI йангIапса атшрычIвайраква акIвдыршатI, йапшым агеометрия пкъыгIваквала тдзы «рчпатI». ЙхътIу атшыбжьара ъадзакIвшуз КIарма Юлия асабиква йралхIвуаз зымгIва дырхъйун, азцIгIараква таразта джьауап гIартуан. АхачIвква зымгIва таразта йдырхъйата Колобок ъагIараухыз ахъазла Машенька ахвыцква чIва рызгIалгтI. ЙащтагIайуа йхътIу атшыбжьара адызгалыз Къвныжв Диана Руслан йпхIа ахвыцква дшрыдынхалуа асасчва йыргвапхадзатI. Ауи ахвыцква лыцта «Цветалия» къраль йцан Цветик-Семицветик гIархчауата йапшым ахачIвква дырхъйатI. Ауат атурыхква рфырква бзита йшырдыруа, ажвгIванд шчIыхву, ахъчы штIатIу, амара шгIважьу гIадырбатI, ашвырква ъабзазауа рхIватI, рмагIныла йапшIагылуа ажваква ршвапхаква гIаргтI: хьшвашва– пха, ду–хвыц датшагьи. Пщысквша–хвысквша йырту асабиква ашвъабгъьы апны арма – агъьма, цIахьы–хъахьы нархараква ъану йымгIващауата йъагIадырбаз асасчва йджьарщатI. Йайшысу азаман ауацIала абжьагIвчва нархара щардала йшынхаз, пкъыгIва щарда шгIадрысабапыз, асабиква ауат зымгIва шрымаджьащахъву, рдырраква шцIолу зымгIвагьи йгIалыркIгIатI. Ауат асабиква пшката йшырзаъу, абжьагIвчви ахвыцкви азхъацIара шрызбжьу уыла йгIацIашвитI. Тхэквондо спорт квпшыра асабигIзарта апны йкIьыду арыпхьара нархараква йрыуапI. Ауаса арат атшыбжьараква асабиква зымгIва цитI, щыбжьан амщтахь рыцIа згвы аквкIта йадынхалырныс зтахъу ауи апш лшара рымапI. Аспортзал апны асеминар йалаз тхэквондола асабиква шырбжьауа йапшытI. Ауат йрыдынхалуа Хатуова Арина Зауыр йпхIа джьауапкIрала дыздгылуа лынхара апны лзаман сабапта йшгIалрысабапуа убитI. Ахвыцква йазалху рфашаква ршвыта йапшым априемква гIадырбатI. Асеминар асабиква рконцертла йхъыргIвахтI. РахIа йахIбачвугьи, ахвыцдзаквагьи ауатыкв йызлагIаталыз агIахIвраква швабыжта йпшдзан. Ауатыкв йгIаталуаз ахвыцква гIахIврипхьадза рфашаква рпсахуан. Ауат атурых йгIалху запш фырта йгIамхъвмарйа? Амимун хвыцква, ацгви ахIвынапкви, а-Буратиноква, аковбойква ртшква йрыквчIва агIахIвыщаква гIадырбатI. АпшыгIвчва ауат напIасра ауырала йнардастI. Мартаза Зимфира асабигIзарта аунашвачпагIв МалхIваз Маргарита Сальымгьари йпхIа йгьи «Звездочка» анхагIвчва зымгIва аразыра ажваква рзыналырхатI. – Швара адахIвраква швшырзынадзуш йазхъасцIитI, швгвып абагвынгIвыри ацацхърагIари шшвызбжьу убитI. Швынхара шIыцра щарда алажвжьитI, ршIыйара швылата амаль джьащахъваква гIашврысабапитI. Ари ауыс апны асабигIзарта аунашвачпагIв МалхIваз Маргарита лалацIара дупI, йынхарныс зтахъу, ашIыцраква йырзычIвырхъауа гвып адылкIылырныс лылшатI. Швынхара шакIвшауа анчви-абачви йдшвырбаларныс стахъыпI, ащардагIв йгьырдырам рсаби амш ауацIала йшйыдынхалуа. Ауат асабигIзарта йакIвшвыршауа айззараква, агвыргъьахъвква йгIашврайгвала, – лхIватI Мартаза Зимфира. Абаза муниципальна район йаланакIуа асабигIзартаква рунашвачпагIвчва асеминар шакIвшаз, шIыцра щарда шырбаз гIалыркIгIатI. – Ансимшы нхара ду шакIвшвыршауа, асабиква къарута йрыдыжвгалыз, дыррата йрылашвцIаз уахьчIва йбергьыльхатI. Абжьара программа йалу зымгIва швырхъйитI, асабиква швшрачважвуш жвдыритI, швапхата йшвырхIауа швапхъахьыла йшалахIуш йазхъасцIитI, уахьчIва ари йыгIбаз зымгIвагьи хIынхара апны йгIахIыхъвуштI. Асабиква рныбыжь йаквыргIапста дыррата йрымазлара атахъу зымгIва рыладшвыркIырныс швылшитI, – лхIватI ЙынджьыгьчкIвын кыт асабигIзарта аунашвачпагIв Цекъва Светлана. Асеминар йгIадгылыз йацшIакIта асабигIзарта амузыкала анхагIвы ТхIакIвахв Айщат Мусса йпхIа аразыра ажваква лзынадырхатI. Ауи лынхара апны йгIалрысабапуа ауарадкви амакъымкви асасчва зынгьи йрымгIаскIва йгIацIцIтI. ТхIакIвахв Айщат йшылхIвазла, асаби уарадква згIвуа акомпозиторква драбадыритI, ауат рынхараква лара йапхъахауата йшгIаладзушла дыргвынгIвытI. Гвыргъьахъвипхьадза йазынархата йазалху ауарадква зну адискква лымапI. Лынхара апны агIахIвракви ауарадкви гIван йыгьгIалрысабапуам, дашIамсуа ашIыцраква дырзыпшгIитI. Ауи лгIахъвыцраква асабигIзарта аунашвачпагIв МалхIваз Маргарита йанакIвызлакIгьи йрыцылкIитI, агвыргъьахъвква джьащахъвата, сабапра алата йшакIвшуш, асабиква хъызкъьалуаш амальква йацыта йгIарауитI. Агвыргъьахъвква рагIан асабиква рфашаквагьи магIын ду рымапI. Ауат рконцерт апны йгIахъвмарыз афырква зымгIва йазалху афашаква рышван. МалхIваз Маргарита йшылхIвазла асабигIзарта адзахгIвы ЧквтIу Катя абжьагIвчва ргIахъвыцра шIыцква зымгIва ршIа йгIатылымщтуата йылдзахитI. Швабыжта луыс дазъазапI, джьауапкIра йгьи ршIыйара ду лылапI. АсабигIзарта йынхауа зымгIва агвыргъьахъвква шдрыпшдзуш, рынхара апхъаламгIвайсра шайауаш ацIыхъва йтагылапI. Азаджв НажгIвыршIыдза лтдзы ащапIква лрыхIазыритI, датша заджвы – ашыхIв йгIалху апхъанчIви амгIаква, дасу йнапIы ззычпу зымгIвала афашаква ррыхIазыррала йылцхърагIитI. «Звездочка» сабигIзарта анхагIвчва гвып ацацхърагIари абагвынгIвыри рызбжьата йшынхауа асасчвагьи ан-абачвагьи йгIалыркIгIатI. Акъыльаквшвара ъану, адырраква йырзычIвырхъауа, ахвыцква рансимшы шджьащахъвахуш йазынхауа, асабиква руачIвымш шгвлахIарахуш йащту анхагIвчва апхъахьылагьи адахIвраквала йрызшазт