ЙАГЪЬУ АНХАГIВЧВА АРТШХЪВАГАКВАЛА ЙГIАЛЫРКIГIАТI

Июль а 11 КЧР АуагIа Айззара (а-Парламент) а-Председатель ИВАНОВ Александр зъачIвагIа йазцIабыргта хIышта атшауацIыхра сквшщарда гвхътIыла йазынхауа апхьахьаква, арыпхьагIвчва, амедицина анхагIвчва, агIвгIвчва, ахIаракьатчпагIвчва, аспортсменква, акъральыгIва йгьи ажвлара уыснкъвгагIвчва хIреспублика ахабзалыхра орган йхIаракIу артшхъвага – а-Парламент а-ЧIахIра грамота риттI, адепутатква рыхьызла артшхъвагаквала йгIалыркIгIаз драйхIвахIвтI. – Йапшым анархараквала хIреспублика апхъаламгIвайсра йазынхауа швкъаругьи швзамангьи швырмайгьдзауата швхъвдаквцIараква швырхъйитI. Ауи ахъазла зымгIвагьи сшвзыразпI, – йгIаликIгIатI Иванов Александр. КЧР АуагIа Айззара (а-Парламент) а-Председатель йзаместитель Хабов Руслангьи хIышта атшауацIыхра йазынхауа аъачIвагIагIвчва апхъахьылагьи адахIвраква рзитахъта драйхIвахIвтI. Ари атшын КЧР АуагIа Айззара (а-Парламент) а-ЧIахIра грамота 28-гIв йрырттI. Артшхъвагаква зквнадыргаз йрыуапI: афилология наукаква рдоктор, апрофессор Бекизова Лейла Абубакьыр йпхIа; «Салон красоты «Элит» аунашвачпагIв Карминская Ольга Анатолий йпхIа; «Инвалиды войны» Афганистан айсра аветеранква йгьи айсра аныкъвадыкъваква р-Россия жвлара организация КЧР-ла ахъвшара апредседатель Жданов Геннадий Игорь йпа; КЧР АуагIа Айззара (а-Парламент) адепутат Шевхужев Анатолий Фуъад йпа; «Дикая дивизия» спорт клуб апрезидент Кубанов Азамат Мурат йпа; КЧР амамыр судьяква рынхара адгалрала а-УнашвахъцIарта знапIыцIу Тебуев Дагир Пилял йпа; афинансквала КЧР а-Министерства абюджет азазаъащаквала ахъвшара аунашвачпагIв Батчаев Уасман Орысби йпа; ЛагъьКIавкIаз къральыгIва академия (СКГА) «Бухгалтерский учет» кафедра аунашвачпагIв Узденова ФатIима Магамед йпхIа; СКГА «Финансы и кредит» кафедра адоцент Урусова Августина Бильаль йпхIа; Черкесск город й-13-хауа Гимназия адиректор Цекъва Радина Рабизон йпхIа; Светлое кыт аквтанай апхьарта ашварагIварадара уысквала адиректор йзаместитель Байчоров Назир Уасман йпа; Черкесск город й-17-хауа Гимназия арыпхьара-бжьара уысквала адиректор йзаместитель Джанкезова ФатIима Амыр йпхIа; Преградна станица й-3-хауа аквтанай апхьарта арыпхьагIв-адгалагIв Текеева ФатIима Магомет йпхIа; Черкесск город й-7-хауа апхьарта апычIв классква рарыпхьагIв Охвта Адиюх МхIамат йпхIа; Сарытюз кыт аквтанай апхьарта физкультурала арыпхьагIв Биджиев Хаджи Абуюсуф йпа; «Сатурн» фирма анхара уысквала адиректор КапI ИсхIакъ Амульадин йпа; КЧР апны ахIаракьатчпара йацкIрала а-Квта адиректор йзаместитель Амирокъва ГIалимат СултIан йпхIа; ахIаракьатчпагIв Гладских Надежда Виктор йпхIа; ахIаракьатчпагIв Подсвиров Виктор Михаил йпа, КЧР а-Хъада йцхърагIагIв Каминская Яна Сергей йпхIа; «Торгтехника» ООО агенеральна директор Грамматикопуло Павел Георгий йпа; «Республиканский кадастровый центр» нхарта адиректор Кубанов Магомет СултIан йпа. ХIреспублика аунашвачпагIвчва ауагIа рызгIвадарахчара йазхъвыцуата айъазартаква рынхара ашIыцраква гIаларжьитI, ауат рынхагIвчва йрыцыркIитI. Иванов Александр хIреспублика акъральгIвчва рызгIвадара йахъпшылуа, йрайъазауа аъачIвагIагIвчвагьи агвы йгIатыцIуата драйхIвахIвтI. Ауи хIреспублика ахабзалыхра орган йхIаракIу артшхъвага – КЧР АуагIа Айззара (а-Парламент) а-ЧIахIра грамота риттI Къарча-Черкес ареспублика клиника чымазагIвтара амедахща Хвапсирокъва Марина Исльамгьари йпхIа, Устьджьгваты район аквта чымазагIвтара айъазагIв хъада йзаместитель Лайпанова Светлана Абдулкьарим йпхIа, «Айъазара-реабилитация Квта» республика къральыгIва медицина нхарта айъазагIв Пронько Марина Геннадий йпхIа, КъарчачкIвын район аквта чымазагIвтара амедахща Лепшокова ФатIима Халит йпхIа, «Забота» саби Тдзыинтернат апны йгIаныршу амедицина-социальна реабилитация хъвшара амедахща Токова Тамара Исмаил йпхIа, Къарча-Черкес ареспублика клиника чымазагIвтара айъазагIв-ревматолог ХъныхIв Зарема Назар йпхIа. Ари атшын хIреспублика ахабзалыхра орган йхIаракIу артшхъвага – а-Парламент а-ЧIахIра грамота зыртыз йрапшта, хIреспублика атшауацIыхри акъагIари къару рылазцIауа дырра цIола зму, йшвапху аъачIвагIагIвча щардагIвы йнадзитI. Ансимшы зхачIвква гвхътIыла йзырхъйауа дзачIвызлакIгьи рмурад пшдзаква гIардахIвуа йлашару, йтынчу мгIвала йчIвырхъарагIатI.