Черкесск къалэм дэт, щэнхабзэмкIэ Унэм Урысейм и Лъэпкъ гвардиер къызэрызэрагъэпэщрэ илъэс зэрырикъуар щагъэлъэпIащ. Къулыкъум и лэжьакIуэхэм яхъуэхъуну пшыхьым къеблэгъащ КъЧР-м и Iэтащхьэмрэ и Правительствэмрэ я Администрацэм и унафэщIхэр, Правительствэм хэтхэр, республикэм и хабзэхъумэ къулыкъухэм я унафэщIхэр.
Къызэхуэсахэр къулыкъу пщэрылъхэр зыгъэзащIэу хэкIуэдахэм дакъикъэкIэ яхуэщыгъуа нэужь, КъЧР-м и Iэтащхьэмрэ и Правительствэмрэ я Администрацэм и унафэщI Салпагаров Елдар къэпсэлъащ.
Ар къулыкъум и лэжьакIуэхэм я махуэщIымкIэ яхъуэхъуащ икIи я пщэрылъхэр нэгъэсауэ зэрагъэзащIэм къыхэкIыу фIыщIэ яхуищIащ.
— Сывохъуэхъу къалэн къыфхуэувхэр зэрызэфIэфхыну къарурэ лIыгъэрэ къыфкъуэкIыну! Нэхъыщхьэр — къулыкъу нэужьым дэтхэнэри узыншэу, псэууэ унагъуэм фахыхьэжынращ, — жиIащ абы.
ИужькIэ Салпагаровым «Къэрэшей-Черкес Республикэм щIыхь зиIэ и юрист» цIэ лъапIэр республикэм лъэпкъ гвардием и лэжьакIуэхэм яритащ. Республикэм и Iэтащхьэм и УнафэкIэ, апхуэдэ щIыхьыцIэр хуагъэфэщащ полицэм и полковникхэу Цуров Маратрэ Чомаев Эдуардрэ. КъинэмыщIауэ, я лэжьыгъэкIэ нэхъ къыхэжаныкIа лэжьакIуэхэм Къэрэшей-Черкесым и Iэтащхьэм къыбгъэдэкIыу фIыщIэ тхылъхэр хуагъэфэщащ.
АдэкIэ къызэхуэсахэм псалъэ гуапэкIэ захуигъэзащ КъЧР-м и Правительствэм и тхьэмадэ Уэз Аслъэн. Абы къыхигъэщащ структурэщIэм мыхьэнэшхуэ зиIэ къалэнхэр пщэрылъ зэрыхуащIар. Абыхэм ящыщщ терроризмэм, экстремизмэм пэщIэтыныр, зэпIэзэрытыныгъэр хъумэныр, цIыхухэр куэду здызэхуэс щIыпIэхэм я шынагъуэншагъэр хъумэныр, нэгъуэщIхэри.
— Си фIэщ мэхъу Къэрэшей-Черкесым и шынагъуэншагъэмрэ зэпIэзэрытыныгъэмрэ гъэбыдэным хэлъхьэныгъэшхуэ зэрыхуэфщIынур, — жиIащ Уэз Аслъэн.
Абы КъЧР-м и Правительствэм къыбгъэдэкIыу щIыхь тхылъхэр яхуигъэфэщащ республикэм и лъэпкъ гвардием и лэжьакIуэхэм.
КъинэмыщIауэ, къызэхуэсахэм хъуэхъукIэ зыхуагъэзащ республикэм щыIэ федеральнэ инспектор нэхъыщхьэ Дральщиков Игорь, Къэрэшей-Черкесым и прокурорым и къуэдзэ Гербеков Алий, ди хэгъуэгум и лъэпкъ гвардием и унафэщI Салпагаров Рэшид сымэ.
Пшыхьыр махуэщI концерткIэ зэхуащIыжащ.
Комментарии