УЫЖВГIАНЧIВИ БИБЛИОТЕКАТА ЙДЫРГIАПСТI

«Культура» уагIахъа проект ацхърагIарала Псыжв апны Мыхц Кьарим йыхьыз зхъу арайон библиотека гIадыршIыцхтI. Ауи ангIахъыртIуаз айззара йалан культурала КЧР аминистр АГЫРБА Зураб, Абаза район администрация ахъада КIВЫЖДЗА Руслан, Абаза район ахъада йзаместитель ХIАРАТОКЪВА Рамед, Абаза район администрация культурали арыпхьарали а-УнашвахъцIарта знапIыцIу МАРТАЗА Зимфира, Псыжв йапхъахауа Гимназия арыпхьагIвчва, апхьагIвчва, ажвлара организацияква ргIащтийыгIвчва. Айззара апны йшгIалыркIгIазла, Псыжв кыт апны йгIандыршаз ауыжвгIанчIви библиотека хIреспублика апны «Культура» уагIахъа проект апкъ йтата йыруыхваз йапхъахауа нхартапI. – Россия а-Президент Путин Владимир РФ а-Федеральна Айззара тшазынайырхауата йгIаликIгIаз ахачIв хъадаква йрыуапI акытква рпны абиблиотека шIыцква ргIаныршара. Ари абиблиотека асабиква ртшауацIыхра йшацхърагIуш, апхьара апны рылшараква йшрыланархIуш кьангьаш гьалам. АуагIахъа проект йахъазымкIва, акультура уысква рпны йгIахIыхъвитI апрезидент грантквагьи. ХIреспублика акультура анхагIвчва рпроектква анкъвакъвра йалашвара ахъазла сынчIва октябрь а 15-дза ауат дрыхIазырра атахъыпI, – йхIватI аминистр. Агырба Зураб апрезидент грантквала анкъвакъвра йтаргуш апроектква йъарылачважвуш айззара йгIахъыртIыз абиблиотека шIыц аконференция зал апны йакIвдыршарныс ажванахъа гIайгтI. ЙгIайззаз акультура анхагIвчва аминистр йхIваз йацыркIтI. – ХIара акультура хIазынхауата акъральыгIва цхърагIараква гIахIымрысабапырквын, хIхъазы йхIзычпуш гьаъам. АлахI йбзирала, ршIыйара, акъыль бзи зму уагIала хIбайапI. ХIкультура, хIсабиква йрыхъвуш тшадхIкIылта йхIчпарыквын, хачIвыта йлыхIхуа гIахIдахIвуаштI. Сара швгIаджвыквцIараква йрыцскIырныс схIазырпI, – йхIватI Агырба Зураб. Абаза район апны уыжвгIанчIви библиотека агIахътIра асабиква ртшауацIыхра ахъазла магIныта йаму гIайхIватI КIвыждза Руслан, акультура нхарта шIыц агIаныршара йацхърагIаз дшырзыразу йхIватI. – УахьчIва йгIахъхIтIуа абиблиотека абаза уагIахъа хIыхьыз хъарата йзыргаз, хIщтIызхыз ауысагIв, агIвгIвы, аршIыйагIв Мыхц Кьарим йыхьыз ахъыпI. Ауи йсуратгьи йгIайыквчважвауа агIвырагьи уангIашылра йкIыдпI. ХIсабиква, хIыршIыйагIвчва ари апш библиотека гIальамат ъарзырчпаз йайгвыргъьауа рхъа йшадынхалуаш, апхьаралагьи ршIыйаралагьи хIшдыргвыргъьуш йазхъасцIитI, – йхIватI КIвыждза Руслан. АгIачважвараква рымщтахь ауатыкв йгIадрайгваз асабиква ауыса джьащахъваква йгIарыпхьатI, ауат согIата акнигаква рырттI. Культурала КЧР аминистр Агырба Зураб йгьи Абаза район администрация ахъада КIвыждза Руслан абиблиотека гIахъыртIуата алентI къапщ пыркъытI. Ауи амщтахь культурали арыпхьарали Абаза район администрация а-УнашвахъцIарта знапIыцIу Мартаза Зимфира абиблиотека шандыргIалыз асасчва йдлырбатI. Абиблиотека акнига фонд байапI. Асабиква ауаъа йырмауаш алитература, Россия абиблиотека пхатшаква рпны йщтIу агIвыраква, анаука нхараква Интернет ацхърагIарала йрызгIарысабапуаштI. Йъапхьауа азал компьютерла, Интернет ласыла йадгалапI. Бзита йзымбауа йымгIапсауата книга йзапхьара ахъазла ахIарыфква зырдууа аргIапсгаква дыргылтI. Апхьара йалагагIвацауа асабиква йырзалырхыз апещгьи швабыж джьащахъвата йандыргIалтI. Ахвыцква ауаъа атурыхква йырзапхьара йахъазымкIва, узырхъвыцуа ахъвмарраквагьи рзадыргалуаштI. Абиблиотека йалачпу асаби хъвшара аъаща асасчва йджьарщадзатI. – «Культура» уагIахъа проект апкъ йтата йгIандыршауа абиблиотека шIыцква асабиква йгIартахъхауа зымгIвала йадгалапI. Асквшква агIвспхьадза арыпхьара программагьи ашIыцраква гIалалитI, асабиква рыхъазла архъвыхраква щардахитI. УахьчIва апхьагIвчва йыртахъу зымгIва Интернет апны йрауазтынгьи, абиблиотекаква мцырата йшгыламызлуш зымгIвагьи йгIахIгвынгIвитI. Ари йапшу акультура нхартаква гIанхIыршарыквын, абиблиотекаква гIазрысабапуаш агалагьи йрылахIуштI, – йхIватI КЧР а-Хъада Темрезов Рашид Псыжв йгIандыршаз абиблиотека агIахътIра йазынайырхаз йхIвахIвра апны. Ауи йшгIаликIгIазла, Псыжв абиблиотека шIыц йашIырпшыта акультура нхартаква уыжвласыла КъарчачкIвын йгьи Устьджьгваты районква рпны йгIандыршуштI.