Актуально Представители молочной отрасли КЧР могут принять участие  в Национальном Молочном Конгрессе    Актуально Глава КЧР Рашид Темрезов поздравил с 98-летием ветерана Великой Отечественной войны Ивана Прокопова СКФО Преимущества покупки пластиковой сетки у OPT Relation СКФО 1. Технические характеристики, сертификация продукции и регистрация технических характеристик СКФО В республиках СКФО на 61% вырос спрос на образование с господдержкой

«УУЫС ШВАБЫЖТА БЗИ ЙУБАРА АТАХЪЫПI»

03.11.2020 125
«УУЫС ШВАБЫЖТА БЗИ ЙУБАРА АТАХЪЫПI»
Асквш 1976 йгIашIарышвта хIкъраль ауацIала амашинанкъвцагIв йы-Мш дыртлапIитI, акъраль аэкономика атшауацIыхра апны уыс ду зырхъйауа аъачIвагIагIвчва йрайхIвахIвитI. УахьчIва швйабасырдырра стахъыпI амашинанкъвцагIвчва рсатыр дрылата сквш щарда йынхауа АГБА Руслан Роман йпа. Ауи асквш 1982 агIан МалоабазинскI кыт дйытI. АчкIвын йсабихъа йыквлагIвчва рапшта йан, йаба, йащахIба цхърагIагIвта дырзалуа, йащайцIба дикьангьашагIвта, дйыргвышхвауа йгатI. АчкIвын апхьарта апны йалкIгIата физкультура апхьара сахIатква бзи йбун. РарыпхьагIв Джьгватан Анатолий Абдул йпа пхата йгвы дгIатахатI. – Апхьара асквшква йырпщылу агIагвалашвахраква дзачIвызлакIгьи йынцIра аурала йыцгIамгIвайсуазапI. Йшспхьадзауала, апхьарта апны акIвпI асаби йдунейпшыщагьи йазыгIальаматраквагьи ъащаквгылуа. ХIара хIарыпхьагIвчва зымгIвагьи рхъвдаквцIараква джьауапкIрала йадгылуа, адырра цIолаква шхIауаш йащтата йхIыдынхалуан. Ауат дзачIвызлакIгьи пхата сгвы йгIатахатI. География, история апхьара сахIатква сымаджьащахъвата тшрызсрыхIазыруан, ауаса зымгIва рацкIыс физкультура бзи йызбун. Волейбол хIасуан, арайонла йакIвшуз анкъвакъвраква рпны йанакIвызлакIгьи апхъагылара гIатыгIгун. ХIарыпхьагIв Анатолий Абдул йпа хIгIатгараква драйгвыргъьун, ахъвмарща амадзараква хIрыхайыргIвазун, гвыпла хIабаркIыта хIабагвынгIвуа хIасуазтын, хIшайгIайлуш гIахIайхIвлун, – йгIайгвалашвахитI ачкIвын. Руслан апхьарта дангIалга Невинномысск къральыгIва технология институт дыцIалтI. Ауи дхвыцищтара йаба ймашина данахьпшуаз, йанйырчIаджьуаз дицхърагIарныс бзи йбун, ауи йгIалцIла, амашинаква рырчIаджьра йъачIвагIа гIалихтI. АчкIвын аинститут дангIалга, къвырльыкъвхара ПриморскI край дыргатI, инженерна-сапер архъв дрылашватI. – Асаперква руыс швабыжта джьауапкIра ду алапI, рдырраква ауагIа рынцIра апщылапI. Аминаква шагIвыржвауа, ауат ршварагIварара шдрыдзуа хIырзырбжьун. ГIващагIара алущтызтын амина ушагIвнажвуш йанакIвызлакIгьи уазхъвыцитI. Ага ауаса йаъазтынгьи, швабыжта йсымаджьащахъван, ауаъа йсауыз адырраква абзазара апны зынгьи йгIасымрысабапырквын рыцIа йагъьпI, – йхIвитI ауи. Руслан къвырльыкъвхара дангIахъынхIвых амщтахь йхъапщыла Оксани йари Невинномысск йбзазарныс йатыпахтI. Ауаъа ауи йапшым аъачIвагIаквала дынхатI. Ауаса ауат закIгьи йгвы йыгьнамдзузтI. Асквш 2011 агIан Черкесск йаныргIалу «Юг-транс» апны автовоз даквчIвата йынхара джвыквицIатI. – СызквчIваз автовоз машина аура метр 20 йнадзитI. Ауи йангылу амашинаква зараркIгьи рмадзауа уъарщтиуа йнауырдзара атахъыпI. АмгIва уахъгьи тшынгьи уыквпI, амашина тдзыта йузалитI. Ауаъа анхара баргвыра щарда апщылапI. Ага ауаса йаъазтынгьи, сара швабыжта йсгвапхитI. ХIкъраль йапшым ашIыпIаква гIамыгIдитI, агородква гIбитI, уагIа щардагIв хIрабадыритI. Машина ду уаквчIвата мшигIадза амгIва уыквызлара ахъазла ууыс швабыжта бзи йубара атахъыпI, – йгIаликIгIитI ачкIвын. Руслан йшихIвазла, «Дервейс» завод ъадзанхуз ауат йгIацIырщтуаз амашинаква Россия ауацIала амашина тйыртаква йгун. – Сара аинститут апны йсауыз адырраква амашина рчIаджьра апны йгIасыхъвахитI. ХIышта йачвыхъарата хIанаъу КIавкIаз йтыцIыз йанакIвызлакIгьи хIацацхърагIитI, змашина птшыта амгIва атшпы йгылу зынгьи хIыгьйыгIвсуам, йхIылшауала цхърагIара дхIрадзитI. АмашинанкъвцагIвчва йазалху рация хIымапIта ауыла хIайчважвитI. ЦхърагIара хIазыбжазтын тшырзынахIырхитI, амгIва апны шварагIвара ъану рахIхIвитI. Аруль ануыму амгIва уыла ахъыуымхуата уымгIвайсра атахъыпI, – йрыбагъьитI Руслан. УахьчIвала Руслан Невинномысск йаныргIалу «СВ-авто» апны афура даквчIвата дынхитI. Ауи атичIв пкъыгIваква Россия ауацIала йатирыпитI. АчкIвын амашина даквчIвата, тынчта йуыс йырхъйауа дащцан датша нхара дапщылазларныс гьитахъым. – Сара аруль сымата йапшым ауарадква срыздзыргIвуа сымгIвайсырныс швабыжта бзи йызбитI. СызгIвсуа ашIыпIаква шапшым гвы рыститI, ауат рпшдзара гIалскIгIитI. Сынхара сгвы йазаргванпI, – йхIвитI ауи. УахьчIвала Руслани йхъапщыла Оксани гIвыпхIчва – Милани Альбини гIадзындыргылитI. Аба мчыбжьыкI аъара мгIва дыквта, дгIапсата йунагIва данадгылхра, йгвыргъьауа йгIайпыралуа йгIариква йгIапсара йхъдраштылхитI. Аруль змата мгIва йыкву дзачIвызлакIгьи ръачIвагIа амшла хIрайхIвахIвитI, йанакIвызлакIгьи хайырла рунагIваква йадгылхра рзыхIтахъпI.  
125 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный