Устазла эришгендиле

Джёгетей Аягъы районда школгъа дери учреждениелени устазларыны арасында эришиуле болгъандыла. Бу тукъум зат былайда биринчи кере

бардырылгъанды. «Педагог, саулукълу бол!» - алай атагъандыла устазла кеслерини ашхылыкъгъа, тырмашыугъа алландыргъан байрамларына. Бу иш районну сабий садларында физкультура бла спортха, аны кибик ёсюб келген сабийлени саулукъларын игилендириуге эс бёлюрге кереклисин эсгертгенине ишек да джокъду.

Ким да билгенден, саулукъ эм уллу байлыкъды, анга къайгъырыу, аны ангылатыу не къадар эртде башланса, ол къадар игиди.

Эришиуле сейир халда ётгендиле. Анга къошулгъанла парадда баргъандыла, адетдеча, командала бла танышдыргъандыла, ала эстафетаны элтгендиле, тюрлю-тюрлю конкурслада усталыкъларын, чемерликлерин танытхандыла. Эм сейири уа не болду десенг, командала, спорт тепсеулени кёргюзюб, къарагъанладан бюсюреу алгъандыла. Командала барысы да тыйыншлы хазырланнганларын ангылатхандыла, спорт-кёбчюлюк иш магъаналы эм керекли болгъанын сездиргендиле. Айхай да, хорламлы болгъан командала Хурмет грамотала бла саугъаланнгандыла.