Бу кюнледе Железноводскеде РФ-ны Президентини Шимал Кавказ федерал округда Толу эркинликли келечиси Александр Матовников бла РФ-ны эл мюлк министри Дмитрий Патрушев РФ-ны Шимал Кавказны ишлерини хакъындан министри эмда ШКФО-ну субъектлерини башчылары бла эл мюлк экспортну юсюнден кенгеш бардыргъандыла.
Джыйылыугъа КъЧР-ни Башчысы Темрезланы Рашид, республиканы биринчи вице-премьери Байчораланы Эльдар, КъЧР-ни эл мюлк министри Боташланы Анзор да къошулгъандыла.
«Шимал Кавказны эл мюлк промышленностну айнытыргъа джараулу хауа болумун эсге ала, округ эл мюлк продукцияны чыгъарыуну кенгертирге кереклисин айтыргъа джыйылгъанбыз. Эл мюлк продукция кереклисича бир тыш къраллагъа сатылыб башласа, джангы иш орунла къураллыкъдыла. Джамагъат иш къоллу болса, ишсизлик да анга кёре аз боллукъду», - дегенди Александр Матовников.
Ол, дагъыда, тыш къралладан келген ашарыкъ продукциягъа тыйгъыч салыннганы амалтын ШКФО-гъа Эресейни бютеу регионларына, башха къраллагъа да эл мюлк продукциясын табдырыргъа мадар чыкъгъанын чертиб сёлешгенди. Ол билдиргенден, бюгюнлюкде тыш къраллагъа джиберилген эл мюлк продукцияны юч этиб экиси Азербайджандан, Гюрджюден, Ирандан, Армения бла Къазахстандан барады. 2018-чи джылны эсеблерине кёре, тыш къраллагъа экспорт этилген эл мюлк продукциядан ШКФО-гъа 215 миллион доллар хайыр тюшгенди. Тауукъ, къой эт, будай, нартюх дегенча затла болгъандыла аланы кёбюсю», - деб хапар айтханды А. Матовников.
«Эресей Федерацияда чыгъарылгъан эл мюлк продукцияны 9 проценти Шимал Кавказда ёсдюрюледи, аладан да 10 проценти ёсюмлюк ёсдюрюу бла, 8 проценти да малчылыкъ бла байламлыдыла. Аны бла бирге кемликле да бардыла - ШКФО-да эл мюлк продукция 2 процентге азайгъанды. 2017-чи джылны битимине кёре мюрзеу, къудору ёсюмлюкле 1,28 миллион тоннагъа кем, аны кибик тууар малла, тонгузла, къанатлыла, къойла бла эчкилени саны алгъындан азды», - дегенди РФ-ны Президентини ШКФО-да Толу эркинликли келечиси.
РФ-ны эл мюлк министри Дмитрий Патрушев Шимал Кавказ федерал округ эл мюлк затла чыгъарыуда къралда 6-чы орунда болгъанын чертгенди.
«2024-чю джылгъа регион эл мюлк продукцияны экспортун 3,5 кереге ёсдюрюрге керекди. Андан тюшген хайырны да 1,3 миллион долларгъа чыгъарыргъа тыйыншлыды. Эресейчи эл мюлк экспортда ШКФО-ну юлюшю 2,8 процентди», - дегенди ол.
Эресейни Шимал Кавказны ишлерини хакъындан министри Сергей Чеботарёв билдиргенден, Шимал Кавказны бютеу продукциясы эресейчи эмда халкъла арасы рыноклада «Кавказда этилгенди» («Сделано на Кавказе») деген бир белги (бренд) бла теджелликди. Бу белги бла чыгъарылгъан продукцияны ёсдюрюуню, асырауну, тутууну эмда сатыуну бир джорукъ бла этерге кереклисин чертгенди ол.
КъЧР-ни Башчысы Темрезланы Рашид кенгешде республиканы агропромышленность комплекси округну экспорт кючюне къошулургъа хазырлыгъын айтханды. Регион тыш къраллагъа экспортха минерал, гара суу, эт, будай, келир заманда тюрлю-тюрлю кёгетле теджерикди.
Бюгюнлюкде Эресейни Шимал Кавказны ишлерини хакъындан министерствосу «Кавказда этилгенди» деген энчи белгини тюрюн, аны эни бла чыгъарыллыкъ эл мюлк продукцияны ёсдюрюу бла халкъла арасы рыноклада теджеуню юсюнден иш бардырыб башлагъанды.
Комментарии