ТУВРАЛЫКТЫНЪ ЯГЫ БОЛГАН

Туьнегуьнлерде аьлемет аьдем, меним ердесим, полковник Роман Абдуллович Еслемесов яшавдан тайды. Р ом ан А б д у л л о в и ч Эркин-Юрт авылында тувган, 1998 йылда РФ м Вд - нынъ Ростовтагы юристлик институтын, 2002 йылда РФ МВД Академиясын окып битирген. 2002 йылдан алып 2011 йылга дейим Ямал-Ненец автономлы областининъ ишки ислер Управлениесининъ Ямал район боьлигинде аьрекетлеген. Полициядынъ отставкада полковниги, ол РФ МВД-нынъ Сый грамотасы ман, коьплеген медальлер мен эм белгилер мен савгаланган. Олардынъ санында «Кызмет кылувда отличие уьшин» деген 1, 2, 3 дережели медальлер, «РФ МВД-на 200 йыл», «Минсиз кызмет кылув уьшин» деген медальлер. Роман Абдуллович яшавга карасы ман баскаланган. Оны баьриси де суьйгенлер. Онынъ кылыгында халк баьтирининъ баьри де касиетлери болганлар. Оьз исине алал болувы уьшин, Роман Абдулловичке авылда белги и сериалдын' бас геройынынъ аты ман Анискин деп айтканлар. Онын' бактысында кызыклы ислер коьп болганлар, ол коьплеген кыянатлыкларды ашыклаган. Кыянатшылар дуныясында Роман Абдулловичтен коркканлар, оны ман санасканлар. Туьзлик болмаган аьллерде авыл аьдемлери ога келип, анълавлык эм демев излегенлер. Боьтен де, 90- ншы йылларда, кыянатлык оьршигип кеткен заманда. Эм ол эш биревди де конъилин тоьмен этип артына кайтармаган, ярдамласкан, энъ авыр маьселелерди шешкен. Тувралыктынъ, аьдилликтинъ ягы болганы уьшин, ердесимизди ак юректен суьйгенлер. Аксакаллар онынъ эткен баьри ислерин макул коьргенлер. Оьзинде де авыр финанслык маьселелери тувганда да, ол «Орак-эли - Эркин-Юрт - Ураковский» деген китапты баспадан шыгарув уьшин амал тапкан. Сол китап бизим авылымыз акында биринши публицистлик шыгарма болады. Китапта окувшыга каратылган соьзинде ол булай дейди: «Узактагы Керуьвде болган заманда, тувган отягамнынъ йылувлыгы энъ куьшли аязларда да меним янымды йылыткан. Авылдасларымнынъ юрек йылувлыгы энъ де авыр оравлыкларды эм кыйынлыкларды аткармага ярдам эткен». Оькинишке, амаллары болган авыл яшавшылары шет кагылып калдылар. Китап уьстинде мени мен бирге Эрки-Юрт авылынынъ яшавшылары, аьлимлер Ш.А.Курмангулова, А.Х.Курмансеитова, газетадынъ редакторы А.Ю.Атуова, окытувшы Р.Баймурзов аьрекетледилер, бизде баска ярдамшылар да болдылар. Эм китап ярык коьрди. Бир йол бизим Анискин орам бойлап бараятырганда, ога карсы бир яс бала йылап келеятырганын коьрген. Еслемесов баладан: «Не зат уьшин йылайсынъ?» - деп сораган. Яс бирев онынъ хаьтерин калдырганы акында айткан. «Сен оьш алмадынъ ма?» - деп Роман каты сораган. «Ол меннен уьйкен эм куьшли», - деп яваплаган бала. «Хаьтеринъди калдырган аьдемнен оьш алув уьшин сага пистолет берейим ме?» - деп сораган Анискин. «Йоо-к, сол заманда сен мени туткынга алаяксынъ!» - деп баладынъ сейири калган. «Соьз йок! Ама сенинъ йылайтаганынъ яман!» - деген Роман. «Не зат этейим?» - деп сораган бала. «Йылама! Бар, спорт пан каьрле! Куьш йый! Сенинъ хаьтеринъди калдырган аьдемди енъеексинъ!» - деген Роман. Эм онынъ соьзлери яс баладынъ эсинде калганлар. Соьле сол бала полициядынъ офицери болган. Уьйкен болмаган Эркин-Юрт авылы оьзининъ язувшылары ман белгили. Авылдан атлары айтылган он язувшы эм шайир шыккан, олардынъ етеви - Россиядынъ язувшылар Союзынынъ агзалары. Авылда коьп белгили аьскерши аьдемлер де бар. Эки юзден артык аьдем Уллы Аталык кавгадынъ фронтларында яв ман йигитлерше согыскан. Олардынъ арасында он уьш ясындагы партизан кыз, Кавказдынъ кешуьвлери уьшин согысларда ян берген Крымхан Мижева. Бизим авылдан 14 полковник шыккан, олардынъ экеви туьрли йылларда туьрли республикаларда военкомлар болып ислегенлер. Роман Абдуллович олардынъ арасында коьзге илинген, оьзиншел болган, айырым касиети мен баскаланган.