ТУРЫХ БАЙА ЗМУ АКЫТ

ХIреспубликала акыт дуква йрыуу Гвымлокт сквш 280 руацIа мгIва ауыра гIамнадатI. Ашвъаква йшдырцIабыргуала, Гвым дзыгIв атшпква абазаква йапхъахауата йангIачIва асквш 1738 агIан акIвпI. Ауи азаман гьтынчмызтI, ауагIахъа хвыцква запыт йыргвыквсуан, йхъырщгIун, рбзазарта йтырцун. Апхъала йаъаз айсраква йгIарылцIла агвымквагьи радгьыл йахвитымкIва рбзазартаква щардазджьара йырпсахра атахъхатI. Ауаса, ауат ага рыцхIагIа, джьабагIа рбазтынгьи, хIапхъанчIвиква йапхъахауата чIвгIван ъаладрысыз ашта пшдза йазгIайхтI. Й-XVIII-хауа асквшышв КIавкIаз апны акытква ангIаншуз зджьара чIвгIван ладрысра апхъала ачIварта йапшуан, йдырхъвыхуан. Гвым гIанзыршаз хIапхъанчIвиквагьи ауыла йгьымгIващатI, бзазартата йгIалырхыз апсыхIва уызгIвымсхыз шIыпIапI. ПшахъыцхIартапI, шIапхартапI, адзыгIв аргваныпI, рахвы, уаса ъаухчуш ахIвыртаква щардапI. Ачвагъвартаква псылапI, адгьыл йадынхалуа йрызхъитI. Апхьахьаква йшгIадырбауала, йапхъахауата Гвым дзыгIв атшпы чIвгIван лазрысыз ТрамргIа ракIвпI. Ауат урыгIвста Гвым дзыгIв арма тшпыла рыцIа йкIьасата йгIачIвалхыз йрыуапI ЛоургIа ркыт. Асквш 1989 йгIацIцIыз «Абазины» книга йшанула, асквш 1860-ква рагIан унагIва 87 йнадзуз Лоукти унагIва 35 йнадзуз Трамкти аларцIан, Гвымлокт гIандыршатI. Гвымлокт йгIалцIыз кытпI Къвайдангьи. Асквш 1920 аквтаква рагIан абайачва, ахIчва рыхьызква акытква йырхъырххуа йалагатI. Абарауи ашвхIаусыгIвала «Гвымлокт»-хIва ауагIа йырдыруа абаза кыт ду Красна Восток ахьыз нкъвнагитI. Ауищтарагьи йбзазитI, ахъацIара гьарыдзуам хIара хIкыт. АГВЫМКВА РХЪАЦIАРА Агвымква хъацIарала рыхьыз дыргатI. «Гвым хъацIа» – анырхIвауа, ауи йгIанырщтитI «швари щтахьла тхъари зымдыруа ахъацIа». Ауи апшта тшгIадырбун агвымква йызлаз айсра щарда рпынгьи. Швъала йгIадырцIабыргта йшыгIдыруала, апаштыхI йыр йрылата йайсыз агвымква рпхьадзара 40 аъара йнадзитI. Ауат йрыуата 26-гIв офицер чын рыман. Ажва ахъазла, Лий ШахIымгьари полковник чын дазынадзатI, «АхъацIара ахъазла»-хIва йызныз амедаль датшагьи ртшхъвага щарда гIайквнадыргатI. Амилиция аюнкер Хъабльахь Джьамальби йшиху Георгий йджьуар апщстепенькIгьи йылан. ГIап Джьамаль йшиху Георгий йорден йхпахауи йпщбахауи степеньква гIайквнадыргатI. Гвым йауата датшагьи быжьгIвы йшиху Георгий йорден гIатыргатI, «АхъацIара ахъазла» хьапщ медаль–гIвыджь, арызна медаль – цгIвы; «АйсыгIв кърар ахъазла» медаль – заджвы. Россия рыцхIагIа аназгIайрыз агвымква хъатакIла йыгьгIанымхузтI, зынла тшгIащтIырхуан. Ауи апшта, асквшква 1877–1878 рагIан йакIвшуз Аурышв-Трыкв айсра апны Гвым йауата 25-гIв хъацIара ду гIадырбатI. Ауат йрыуапI Лачвыш Гьальды, Мартаза Асльан, Тебердыкъва ЙахIйа, ХвытI Къасбот, ОгвызргIа Дельу йгьи Къанамат, Пщуна Къамбот датшагьи. Йгьызным абазаква уагIахъала абджьар рымата радгьыл, рхъахвитра йрызгылра ъадзатахъхузгьи. Ащхъа уагIахъаква зымгIва ртурых рахIа йнашхыйу бгъьыцта йгIалахатI КIавкIаз айсра. Ауи ъадзакIвшуз джьабагIата йырбаз йахъазымкIва, ауагIа рыцхIагIа дута йырзалтI айсра йацIыхъватшарахаз амхIаджьыррагьи. ХIуагIахъа йрыуата щардагIвы рыштаква рчвыдзтI, агIвымакъральква рбзазартахатI. Гвым йауаз абаза хъачваква асквшква 1904–1905 рагIан йакIвшуз Аурышв-Япон айсра апынгьи аурышвква щъа багъьата йрыцIагылата, 32-гIв йнадзауата йайсытI. ХъацIара рылата, кърар багъьа рымата тшгIадырбатI офицерта йгIацапахыз ГIап Джьамаль, Шармат Зама, Къахвын Мустафа, Къамби Идрис. ХIкъраль апны Гвым ахъачва аламкIва айсракIгьи гьакIвымшатI. Граждан айсра агIан Кисловодск йгIандыршаз атшчва рбригада 150-гIвы йнадзун. Ауат унашва рхъицIун Байкъвыл ЧухIайыб, атшчва рэскадрон дакомандирын Къарабаш МхIамат. Ауат йрыцын джьгарта тшгIазырбаз, Гвым йауаз Айбаз МхIамат, Къвнач Бильаль, Шармат БатахI, Лоу Михаил. ХъацIарала зыхьыз дзырхIваз абаза хъачваква йшрылшузла авласть шIыц гIаргтI, абзазара щаквдыргылтI. Ауат рыхьыз хIарыф дула Гвым атурых йангIвылапI, абанпараква йгьырхъаштылуам. Рхъа гьдмырпудтI йащтагIайуаз абанпараквагьи. Абашта айсра Ду агIан агъа йпшIагылтI гвым хъачвата 514-гIв. Ауат йрыуата 285-гIвы хI-Псадгьыл рхчауата рхъа щтIарцIатI, 70-гIвы йапшым артшхъвагаква гIарквнадыргатI. Айсра йаладзыз хIмамыр бзазара ахъазла рхъа йгьамайгьдзатI, ауат рыхьыз, рхъацIара абанпараква йгьырхъаштылуам. Асквш 1942 агIан анамыцаква хIышта йангIатал ащхъа щапIква–Архыз, Марыхв агьиква рпныла Закавказье йцарныс ргвыгъан. Афашистква рмурад пIай йапшIагылыз хIайсыгIвчва агъачва мгIва гьрырымтуазтI, йрылахысуамца ухъа-схъа йамцIырпсун. КIавкIаз щхъаква зхчуз Огвыз Зульа алакшара чвгьакI апны йхъа щтIайцIатI. Айсра зысквш йгIалагаз Гвагв Мусса йыхыгIвпачвагьи афронт йпшцIалтI, ахыгIвгьи р-Псадгьыл рхчауата рхъа щтIарцIатI. АпшыхвыгIвчва ркомандир, алейтенант ХIаткъва Александр асквш 1944 агIан Латвия апны дгIарщытI. Джьмакъвыл ШахIымби айсра зтшын йалгаз Берлин апны дщхатI. Ауат рапшта хI-Псадгьыл ахъахвитра йазгылаз йрыуата зхъа щтIазцIаз гьмачIым. Асквш 1942 агIан захIварала айсра йырчвцаз Бежан Кьарим Сталинград дтыцIын, айбащра мчква дрылата Прагадза дымгIвайстI. ХъацIарата йгIайырбаз ахъазла «Слава» ордента хпа, «ЙачIва Къапщы» орден, медаль щарда гIайквнадыргатI. Аджьбакь Тама айсра аналга Москва а-Кремль ддрайгван, айбащра чвгьакI апны фырра ъагIайырбаз ахъазла Ленин йорден гIайквнадыргатI. Ауат йрапшта АйгIайра гIазраргваныз агвым хъачва Огвыз Рамазан, Къардан ГIальым, ЧвзыкIьа МухIарби рхъацIара ахъазла йхIаракIу артшхъвагаква гIарырттI. Ртшхъвага щарда рымата айсра йгIахъынхIвыхтI ХвытIргIа БадакIара, ЗукIанай, ХIамидби, ГIап Заудин, Мартаза ХIатIахв, КълычргIа Мазан, Асльамбакь, Гьабан Тахвтар, ДзыгIва МухIадин, Огвыз Александр, ХIапIатI Рамазан датшагьи щардагIвы. Ауат рпны абгата йаъаху ХвытI ЗукIанай йакIвпI. ХъацIара гIадырбатI Афганистан апны зинтернационал борч зырхъйаз хIычкIвынчвагьи, Чернобыль апхаста ацIыхъватшараква ашIазкIуаз йрылаз хIкытлагIвчвагьи. Гвым йауата жвицыгIв Афганистан айсра йалан. Ауат йрыуата уахьчIва йыгьхIылахым Агырба Роман, Джьмакъвыл Рауф, Кълыч Борис, ХвытI Олег, Эгьзакь Эдик. РызгIвадара йгьамайгьдзатI Чернобыль ауау тшауацIназымрыхыз ГIвкIьатI СахIатби, ХвытI Виктор, Агырба Валерий, Хъакъвпщ Мырзабакь. Ауат адуней йгьыквхым. УахьчIва йхIыцта Гвымлокт а-Мш йайгвыргъьитI Афганистан апынгьи, Чернобыль апынгьи кърар змата зборч зырхъйаз Аджьбакь Аслан, Ар Рамазан, Ахмат Данил, ГIап Муъайад, ДжьмакъвылргIа Владимир, Мусса, Олег, Джьанымбей Юдин, КълычргIа Джьамльадин, Ромео, Нагай Алибек, ОгвызргIа Таймураз, Муъайад, Пщуна Банчук, ХвытI НурмхIамат, ЧбытI Иналь, ДзыгIва КIазбек, Чагва Нурби. РынцIра айсра къвырльыкъвхара йарттI подполковник чын йазынадзаз Джьмакъвыл МагIаруф, Хъакъвпщ Игорь, йгIвбахауа ранг акапитан ХвытI Юрий. РайсыгIв борч нардзата йдырхъйан тшпсщара йчIвахтI аполковник, Россияла гIатгара зму ауыхвагIв Лоу Константин, йгIвбахауа ранг акапитан ЧвзыкIьа Ромео, тшпсщара даъапI зынцIра шабгу ахабзахчара йазгылаз аполковник Лачвыш Роман, аподполковник ХIапIатI Альтаир. УахьчIвала ахабзахчара органква йрылата къвырльыкъв зхауа хIычкIвынчвагьи гьмачIгIвым. Ауат йрыуапI хI-Псадгьыл ахчара ъачIвагIата йгIалызхыз аполковник, хIреспублика айсра комиссар Темыр Арсен, ахабзахчара органква йрылу аполковник ХвытI Валерий, аподполковник ХвытI Рустам. АКЫТ АХЬЫЗ ДЫРГАТI Щарда цIуата агвымква йырхъазымкIва, абаза уагIахъа шабгу хIыхьыз пшдзарала йдзырхIвауа хIкытлагIвчвагьи рыхьызква гIахIымхIвакIва йгьауашым. Ауат йрыуапI Россияла гIатгара зму акыт млыкврхIара анхагIвы ПатI Валентина, апхьахьа, ахIаракьатчпагIв, Адуней апсыуа-абаза конгресс аунашвачпагIв Эгьзакь Мусса, Ставрополь край а-Дума адепутат, ахIаракьатчпагIв АргIашокъва Валентин, агенералква Огвыз МухIамади Хъакъвпщ Индраили, апхьахьаква Аджьбакь Къарабит, Лоу Иналь, ХвытI Владимир, Огвыз Виталий. УахьчIва йыгьхIылахым нхарала зкыт ахьыз зыргаз хIыгIвычIвгIвыс дуква Кълыч Мурат йгьи Чагва Мамруз. Ауат йъагIадрийыз, йъапхьаз акыт акъагIара, атшауацIыхра къару ду аларцIатI, ауагIа рзыразта ахрат йцатI. Гвым дзыгIв атшпы йгIадзынгылта хIкультура, хIлитература, хIазъазара ртшауацIыхра къару ду алазцIаз ауагIа гьмачIгIвым. РыршIыйарала хIуагIахъа рыхьыз дыргатI апхьахьа ду Кълыч Рауф, агIвгIвчва ТхIайцIыхв Бемырза, ЧвзыкIьа ШахIымби, Россияла гIатгара змаз азъазара анхагIвы Кълыч Къанокъва, асуратчпагIвчва Мартаза Нурали, Бзасажв Марат, амакъымршIыйагIв Шармат МухIарби. Айсра апхъалагьи ауи амщтахьгьи амлыкврхIарта амцIпIландзыкIьа Гвым архъаква зырхарджьыз, арахв, ауаса, атшква рахъшахъыщтра йазынхаз ахъачвагьи ахIвссагьи кърар рымата, ргIвычIвгIвысагIара надмыркъвуата акыт абзазара агъьчIвра къару ду аларцIатI. Ауаса нхарала зыхьыз зыргаз, унашвачпагIв багъьата, адгалагIв бзита, ахIба пшдзата акыт атурых йгIалахаз йрыуапI Пщуна Быда, Огвыз Бубакьыр, Макъвауа КIазбек, Шармат Мусаби, ХвытI Мурат, Кълыч КIарнин, ХIвран Дзадзу, Мартаза Амарби, ДзыгIваргIа Джьальагваща, Цуна, ХIапIатI Роза, Быджь Джьанчыкъ, Джьгватан Тамара, Чква Назыкь, Пщуна Тамара, Узден Хвыца датшагьи. ГВЫМ ЗРЫПШДЗАУА УАГIАПI Гвым апсабара пшдзапI, ахIауа цкьапI, араъа йгIацIцIуа адзы ъазагIвапI. Ауатква зымгIва ауагIа рызгIвадара йахъвитI йгьи араъа асабиква багъьата, мчхъата йгIадзынгылитI. Ауаса апсабара йгIаунатуа азгIвадара уахьымпшыкIва йгьауам. АлахI йбзирала, хIкыт айъазагIвчва гIальаматквагьи гIатыцIтI. Ауат Гвым йахъазымкIва, анахьанат ашIыпIаква рпынгьи нхарала рыхьыз дыргатI. Ауи апшта зыхьыз рхIвауа айъазагIвчва йрыуапI СССР азгIвадарахчара анхагIв бзидздза Аджьбакь МухIамад, Россияла гIатгара зму айъазагIв Лачвыш Владимир, Къарча-Черкесла гIатгара зму айъазагIв ГIвкIьатI Тамара, йбергьльу атерапевт ХвытI Борис.