ТРЫКВ АБАЗАКВА ХIЫСАСЫН

Щарда мцIуата Трыкв йгIаныршу абаза-абхаз культура квтаква р-Федерация йгьи Черкесск апны «Алашара» АНО ахъвшара ацынхарала ангIалра мачвы ацIарцIатI. Ауи йазынархаз анйара «Абаза» жвлара организация аофис апны йакIвшатI. Анйара йалан Трыкв йгIатыцIыз абазаабхаз культура квтаква р-Федерация аунашвачпагIв АКУСБА Атанур, Стомбыль апны «Абаза» культура квта аунашвачпагIв ЙАШБА Шамиль, абхаз-абаза Дуней Конгресс (ВААК) йхIаракIу а-Совет йалу МАКЬАР Ведат, Трыкв апны Абхаз Республика ащтийыгIв ХАРАЗИЯ Вадим йгьи ауи йцхърагIагIв БАГАТЕЛИЯ Астамур, Къабард-Балкъар Республика апны ВААК ахъвшара а-Совет аунашвачпагIв ПШЕНОКОВ Владимир, «Апсадгьыл» абаза жвлара организацияква радкIылара акоординатор МЫХЦ Рамазан, Черкесск апны «Алашара» АНО ахъвшара аунашвачпагIв МЫКВА Мурат, абаза ахIбачва р-Совет агIащтийыгIвчва. – Аурычра мзыла сшвайхIвахIвитI, абзираква швызгIанагыргIатI, – йхIватI ажва змаз Акусба Атанур. – Араъа йайззаз хIайщчва Трыкв йбзазауа швайщчва рсальам швызгIагIгтI. УахьчIва араъа хIанйара, хIайчважвара йшхIтахъыз апшта йгьауырахум, заман хIмачIпI. Ауаса ари хIанйара йапхъахауа чIвырхъапI, хIапхъахьыла хIащтаныкъвара, хIацынхара тшауацIнахуашта хIгвы йгIанагитI йгьи ауи апш мурад хIымапI. Акусба Атанур унашва зхъицIауа абаза-абхаз культура квтаква р-Федерация ахачIвква дрыквгIашIастI. Ауи йшгIаликIгIазла, Трыкв апны абазаквагьи апсыуаквагьи йадкIылата «абаза»-хIва йрыпхьитI. Абазаква ъабзазауа апны акультура квтаква гIандыршатI, ауат рынхара а-Федерация йаднакIылитI. А-Федерация гIандыршищтара жвасквша цIитI, ауи хачIвыта йамапI абызшва, ахабзакви ацIаскви ргIащаквыжьра. Ауи акIвымкIвагьи, рапхъанчIвиква рпсадгьыл атурых рдырра, рцри шта апны йбзазауа абазаква рабадырра, ращтаныкъвара ахачIв хъадаква йрыуапI. – Йаъан Трыкв йтанагаз хIайщчви хIари хIанащтанымкъвуз заман, ауи баргвыра щарда анапщылаз, – йхIватI ажва змаз Трыкв апны Абхаз Республика ащтийыгIв Харазия Вадим. – УахьчIва заджвгьи хIыгьгIашIайкIыхуам, зымгIва хIара йхIнапIылапI, хIащтаныкъвара тшауацIнарыхра хIазынхара атахъыпI. АхIбачва рыхьызла асасчва тшырзынайырхатI «Абаза» жвлара организация аунашвачпагIв йзаместитель Чагва Щорс. – УахьчIва йхIызгIайыз зымгIвагьи АлахI днашвзыразхатI. – йхIватI ауи. – Ари анйара зымгIва хIыхъазлагьи амагIны дупI. Абхаз-абаза Дуней Конгресс гIаншищтара Трыкв, Къабард-Балкъар йбзазауа хIайщчва КъарчаЧеркес йту абазаква йгIахIыщтаныкъвитI. Ауи швабыжта йхIгвапапI, хIаргьи Трыкв, Абхазия хIцалитI. ХIайщчва гвхътIыла ащтаныкъвара шыртахъу хIылахIхIвитI. УахьчIва йгIаджвыквхIцIауа ауыс хIацзакIыта йнахIырдзара атахъыпI. Ажва гвапаква асасчва йырзынайырхатI абаза ахIбачва р-Совет аунашвачпагIв Аубакь МухIадингьи. АгIачважвараква рымщтахь Трыкв, Абхазия, Къарча-Черкес рпны абаза, апсыуа жвлара организацияква рацынхарала ангIалра мачвы ацIарцIатI. Ауи йшгIанахIвауала, ршIыйара злу чкIвыныргIа йрыцкIрала, анаука-практика конференцияква акIвыршарала, датшагьи анархараквала йацынхуштI. Йара ауи апш ангIалра рыцырчпатI КБР апны КIавкIаз ауагIахъаква ркультури ртурыхи рдыррала «Абаза» Квта йгьи Абхаз культура Квта. АнгIалра мачвы анацIарцIа амщтахь Трыкв йгIатыцIыз асасчви Черкесск апны «Алашара» ахъвшара аунашвачпагIв Мыква Мурати асогIаква амырдатI. Асасчва йгIарыртыз асогIаква йрылан Абхаз Республика йапхъахуз а-Президент Ардзынба Владислав йсурат. – Апсны акъральыгIва гIащаквзыргылхыз Ардзынба Владислав йсурат шшвщарду здыритI, ауаса Трыкв йгIатыгIгаз асуратгьи швымазлара хIтахъыпI, – йхIватI Акусба Атанур. Ацынхарала ангIалра мачвы ацIацIара йазынархаз анйара йалаз зымгIвагьи ауи ауыс бзиква шащтагIайуаш, ащтаныкъвара штшауацIнанарыхуаш, Трыкв йту абазаква, апсыуаква, хIреспублика йбзазауа абазаква апызщылуа ахац шарыбагъьуш кьангьашра шазгIарымгуа гIалыркIгIатI. Трыкв йгIатыцIыз асасчва анйара йалаз разцIгIараквагьи йауацIыхта джьауап гIарырттI. Ауат Трыкв апны абаза бызшва йшадрыпхьауа, чкIвыныргIа аспорт йадкIылазтын, рцIасква шырхчауа датшагьи йырзынархан.