СТЕПАШИН СЕРГЕЙ: «АРИ АПШ ПШЦIА ПШДЗА ЗДЖЬАРАГЬИ ЙГЬСЫМБАСТI»

«АгIвнабзазарта-коммунальна млыкврхIара гIаршIыцхра йацкIрала а-Фонд» къральыгIва корпорация апны йгIаныршу «Дом образцового содержания» ртшхъвага знак хIреспублика апны цкьата йынкъвыргауа атыдзква йызнымкIва йгIарквнадыргахьатI. Хвысквшала утхъахта Черкесск город, ОктябрьскIа урам йаныргIалу й-305–а-хауа атдзы абзазагIвчва ари апш ртшхъвага гIарырттI. Ауи амщтахь асквш 2018 агIан СКФО-ла йапхъахауата йгIахъыртIыз анышвкъвара йъадынхалуа азавод «Йшвапху ЖКХ анхарта» ртшхъвага знак йанкъвгагIвхатI. СынчIвагьи «АгIвнабзазарта-коммунальна млыкврхIара гIаршIыцхра йацкIрала а-Фонд» къральыгIва корпорация ащаквыргылрала «Дом образцового содержания» ртшхъвага знак Черкесск город, КрасноармейскIа урам й-81-хауа атдзы йаквнадыргатI. Этаж щарда йнадзауа атдзы апшцIагьи аквпшырагьи пшдзата йаныргIалпI, асабиква ъахъвмаруаш аъапI. АуагIа ауаъа йбзазауищтара электроэнергия, апхара щарда азырымшвара ахъазла ауыжвгIанчIви технологияква йрызцатI. Апшвымаква рфатарква йшыртахъу, йаныртахъу йдырпхара ахъазла ахъатачIв рпхагаква гIадрысабапитI. «Дом образцового содержания» ртшхъвага атдзы абзазагIвчва йрытра йазынархаз айззара йалан «АгIвнабзазартакоммунальна млыкврхIара гIаршIыцхра йацкIрала а-Фонд» къральыгIва корпорация ахъпшылра совет апредседатель СТЕПАШИН Сергей, ЖКХ а-Фонд агенеральна директор ЦИЦИН Константин, КЧР а-Хъада ТЕМРЕЗОВ Рашид. Степашин Сергей йагъьта йгIалыркIгIаз атдзы абзазагIвчва тшырзынайырхауата КрасноармейскIа урам й-81-хауа атдзы апны йбазла дшразхаз гIаликIгIатI. – Сара съанатIала схъвдаквцIараква сырхъйауата хIкъраль асубъектква зымгIва сгIархъыкIвшатI, йшвапху агIвнабзазартаква шынкъвыргауа, рыпшцIаква шаныргIалу сдырбатI. УахьчIва хIъану атдзы апшцIа апш йапхъахауата йызбитI. Амашина ргылырта ахъахь саби хъвмарырта гIальамат шыруыхваз джьасщатI, ауи йапхъахауата йызбитI. Москва амэр Собянин Сергей ари ашIыцра йлымхIа йтарысра атахъыпI. Атдзы нкъвызгауа анхарта бзита йшынхауа агIвнабзазарта аъащала йубитI. Араъа йбзазауа ауагIагьи йъату атдзы, рсабиква ъахъвмаруа апшцIа ацкьара гватра ду шазалырхуа кьангьашра гьалам, – йхIватI Степашин Сергей. Ауи йшгIаликIгIазла, хIреспублика апны йамуыхуа абзазартаква псахрала апрограмма дахIврала йдырхъйитI. – Асквш 2017, январь а 1-дза йшварагIварата йщаквдыргылыз агIвнабзазартаква рпшвымаква рыуа щардагIвы фатар шIыц гIарыртхьатI. Асквш 2020 ауат ужвыгьи йгIарылахIара атахъыпI. Апрограмма ари асквш амщтахьгьи йынхуштI, – йгIаликIгIатI Степашин Сергей. КЧР а-Хъада Темрезов Рашид хIреспубликала збзазартаква амуыхуа атгIачва фатар шIыц рзалхрала апрограмма йъацыркIуа ахъазла ЖКХ гIаршIыцхрала а-Фонд аунашвачпагIвчва дшырзыразу йхIватI. Ауи йшгIаликIгIазла, асквш 2016 агIан апрограмма апны йгIадырбаз ахачIвква апIатла гIамдзаскIва йалдыргатI. А-Фонд ацхърагIарала асквш 2018 агIан СКФО-ла йапхъахауата анышвкъвара адынхалрала гIахъыртIытI. – ХIреспублика атыдзква раъаща агъьчIврала анхараква щардапI. ЖКХ гIаршIыцхрала а-Фонд ацхърагIарала апхъала хIчIвырхъитI, КЧР абзазагIвчва йцкьу, йлашару атыдзква йрыцIабзазара ахъазла йхIтлакIьуа хIчпуштI. Асабиква ъахъвмаруаш, тшъарбжьуш рзыхIчпуштI. УахьчIва хIъану атдзы абзазагIвчва швыгIвнабзазарта цкьата йъанкъвыжвгауа ахъазла сшвзыразпI, – йхIватI Темрезов Рашид. Айззара апны датшагьи йгIачважватI йагъьта йгIалыркIгIаз атдзы аъаща йахъпшылуа «Плаза» компания аунашачпагIвчва, абзазагIвчва. Ауат атдзы, апшцIа ацкьара ансимшгьи йшазынхауа гIархIватI, асасчва йшырзыразу гIалыркIгIатI. Степашин Сергей йгьи Темрезов Рашид апшцIа йахъазымкIва атдзы ауацIа шаныргIалугьи ргвапхатI.