«ШЫНТЫ ГЕНЕРАЛ ЭДИ»

= в ~ «ШЫНТЫ ГЕНЕРАЛ ЭДИ» ралык музей-заповеднигининъ выставкалар залында генерал-лейтенант Омск ракета Аьскерининъ етекшиси, 60-ншы ракета дивизиясынынъ командиры, аьскершилик аьзирлик бойынша 27-нш и ракета Аьскерининъ етекшисининъ орынбасары Алексей Александрович Касьяновка багысланган выставка ашылды. Алексей Александрович 1940 йылдынъ 1 июнинде Краснодар крайынынъ Адлер каласында тувган. 1941 йылда анасы ман Карашай-Шеркеш юртынынъ Прикубан районынынъ Николаевское селосына коьшкен. 1959 йылда Аьскер сыдыраларына шакырылган. Сонъ Пермьде ракета аьскерлерине кишкей офицерлердинъ курсларын кутылып, Марий АССР-нинъ ракеталар кесегине туьскен эм сонда 16 йылды кызмет кылып, - техник-лейтенанттан полктынъ командирине дейим оьскен. 1971 йылда Дзержинский атлы аьскершилик академияды кутылган. Аьскершилик йоллары оны Саратов областине, Оренбургка, Владимирге аькеткенлер. Сонъгы заманларында Омск ракета Аьскерининъ етекшиси этилип салынган, эки йылдан отставкага кеткен. 1996 йылда кавыфсызлык соравлары бойынша губернатордынъ маслагатшысы болган. Алексей Александрович «СССР Савытлы Куьшлеринде кызмет кылувы уьшин» 2 эм 3 дережели орденлер мен, «Аьскершилик сыйы уьшин» орден мен эм коьплеген медальлер мен савгаланган. Алексей Александрович 2019 йылдынъ 19 июнинде оьлген. Москва областининъ Владимир каласында коьмилген. Амалламада Алексей Александровичтинъ ян косагы, улы, тувганлары, йолдаслары, бирге окыганлар, конъысылары, Дагестан Республикасыннан, Москвадан конаклар, Черкессктинъ «Йигитлик» излев отрядынынъ элшилери эм етекшиси Зоя Псху, СМИ куллыкшылары катнастылар. Йыйылганларды музейдинъ илми бойынша директорынынъ орынбасары Ханафи Хасанов хошлады эм тувганларына музейге дайымлык кулланувга генералдынъ 64 санда оьзлик затларын (аьскершилик кийимлери, савгалары, кызмет кылувы акында альбомлары эм с.б.) бергенлери уьшин разылыгын билдирди. «Бизим республикадан Алексей Александровичтей кеспили аьдемлер шыкканы оьктемликти тувдырады. Биз оьз ягымыздан регионымыздынъ тийисли улы акында эстеликти, онынъ оьзлик затларын, аты сый ман айтылсын уьшин баьри затты этеекпиз. Музейге кулланувга онынъ затларын сенип бергенинъиз уьшин савболынъыз. Бизим юртымыз энди де сондай йигит генералларды тувдырар эм олар бизим кишкей Тувган элимизге эм Россияга пайдаларын аькелерлер, деп сенемен», - деди ол. «Мен Омскта аьскершилик училищеде окыганман. Алексей Александрович пен айлак ювык айкасканман, ол мага атамдай болып турган. Ол уьйкен юрекли, танъ, намыслы аьдем эди. Ол кабинетлерде олтыратаганлардан тувыл, шынты генерал эди. Сондай аьдемлер коьп болсалар, бизим яшавымыз да артык ийги болаяк эди», - деди айлак сезимли кепте выставкадынъ ашылувына Дагестан Республикасыннан конакка келген яс аьдем. А.Касьяновтынъ аьптесининъ улы - Александр нагашакасы баьри тувганлары уьшин оьктемлери, коьрим алгандай аьдем болганын белгиледи. «Аьскершидинъ куллыгы айлак кыйын. Ама сол йолды ол оьзи сайлаган. Озган йылда нагашакамнынъ яшавдан кетуьви бек оькинишли болды, ама ол дайым бизим юреклеримизде яшаяк. Онынъ эстелигин оьмирлендиргенинъиз уьшин, сав болынъыз», - деди А. Касьяновтынъ йиени. Алексей Александровичтинъ аьскершилик династияларын улы - Россиядынъ Коршалав министерствосынынъ 4-нши орталык илми-тергев институтынынъ Управлениесининъ етекшисининъ орынбасары, полковник Олег Алексеевич алып барады. Ол да Касьяновлардынъ тукымларында энди де бир генерал, полковниклер эм баска мертебелерге етискенлер коьп болувын билдирди. «Бизде оьктемсигендей зат бар. Озган йылда меним санаганым ман Касьяновлардынъ аьскершилик династиясы аьскершилик кызмет кылувга 212 йылларын бергенлер. Атам да сондай эсапты юргистетаган эди. Суьйткенде, бизде оьктемсигендей эм ымтылысымызды караткандай зат бар. Бу выставка стенди яс аьдемлерге Аталыкка кызмет кылув сыйлы болувды эм кайдай бийиклевлерге етисип болувды коьрсетеек», - деди эм музейдинъ куллыкшыларына разылыгын билдирди. Сондай болып, амалламада эскеруьвлери мен Алексей Александровичтинъ ювык аьел дослары, онынъ колында кызмет кылганлар, мектепте бирге окыганлар боьлистилер.