ШАМБА ТАРАС МИРОН ЙПА

Октябрь а 13 сквш 82 дыртата адуней йхIваджьтI къраль щардала зыхьыз бергьльыз, ажвлара-политика уыснкъвгагIв, аюридическа йгьи аполитика наукаква рдоктор, апрофессор, абхаз-абаза уагIахъа р-Дуней Ассоциация (МАААН) сквшы гIважва райхIа йапрезидентыз ШАМБА Тарас Мирон йпа. Ауи асквш 1938, июль а 29 СогIвым апны дйытI. Ломоносов Михаил йыхьыз зхъу Москва къральыгIва университет дапхьатI, КПСС а-ЦК апны йаныргIалыз аспирантура дгIалгатI, асквш 1975 агIан доктор диссертация йхчатI. СССР а-Верховна Совет дадепутатын. Ауи дъанхаз ахабзахчара йгьи апартия органква рпны йыхьыз ртшхъвараламкIва зынгьи йыгьрымхIватI. Юриспруденцияла, ауагIахъа азазаъащаквала дыздынхалыз агIвыраква 500 йрайхIапI. Апхьахьа жвлара академията агIба дрылан. Ауат йрыуапI ООН апны йгIаныршу информатизацияла а-Дуней Академия, наукала йгьи азъазарала а-Дуней француз Академия, адгьаква р-Дуней академия датшагьи. Тарас Мирон йпа цысквша Россия къральыгIва хвгIахвтра-экономика университет йапхъахауа проректорта, уадыргIвана ректорта дынхатI, анотариусква рпалата далан, хъатачIв нотариальна контора нйырхун. Ауи «Россия Федерацияла чIахIра зму аюрист», «Россия Федерацияла чIахIра зму адвокат» хьызква дрынкъвгагIвын. Абхаз Республика а-Конституция лызхыз дрыуапI, апрезидент анкъвакъврала далхра дагIаджвыквцIагIвын. Абхаз Республика акъральыгIвара рыбагъьарала уыста йырхъйаз хвы азырбауата «Ахьдз Апша» орден й-I-хауа астепень гIайквнадыргатI, ажвлара рпны «Апсны ауагIа рпрезидент»-хIва йыпхьун. Тарас Мирон йпа абхаз-абаза уагIахъа р-Дуней Ассоциация унашва ъадзахъицIаз асквшква руацIала адуней шабгула абазакви апсыуакви радкIылрала уыста йырхъйаз хвы аквцIауачвапI. Ауи йгIаджвыквцIарала хбызшвакIла йгIацIцIуа «Абаза» журнал абазакви апсыуакви уагIахъакI йшгIарылцIыз гIаднаргвалашвахитI. Шамба Тарас СССР а-Верховна Совет данадепутатыз КIавкIаз алахь йазхъвыцуа дполитик уасаражвта тшгIайырбатI. Абхаз-абаза уагIахъа р-Ассоциация (МАААН) гIаныршарагьи згIаджвыквцIараз Тарас Мирон йпа йакIвын. Ауи Апсны Абашта айсра анакIвшуз асквшква 1992–1993 рагIан агIвымакъральква йбзазуз адиаспораква йызнымкIва СогIвым, Черкесск, Нальчик, Трыкв, Сирия, Германия, Иордания, Египет, Голландия, Испания, Африка рпынква дрынйатI. Апхьахьа агIвымакъральквала, Россияла йщардаз йынбжьагIвчва ращтаныкъварагьи й-Псадгьыл хвыц атшауацIыхра йазынайырхатI. Ауи агIвычIвгIвыс уасаражв Апсны дачвыхъарата Москва дбзазазтынгьи, дъагIадзынгылыз йцри шта бзидздза йбун. Уыста йымазлакIгьи гIанижьуанта данйыз атшын йаба йыпшцIа дазцахуан. Тарас Мирон йпа йани йаби адуней йъадзаквыз йборч нардзата йырхъйатI. Ауат адуней анырхIваджь амщтахьгьи Апсны дангIайлакIгьи апхъапхъа ауат рнышвынтараква квырмыш рзичпун. Тарас Мирон йпа хъацIара ду злаз, хъара йпшуаз дполитикын. Ауи йакIвпI йапхъахауата апсыуакви абазакви рыщайдза шазакIу гIалызкIгIаз, агIвуагIахъакI аргваныта йащтаныкъвара ахъазла уыс щарда зырхъйаз. Апхьахьа, аюрист бергьльы Шамба Тарас аполитика гIаншаракви апсахракви дшырзаъу гIаддырдырра ртахъыта йапшым ателекомпаниякви йбергьльу агIацIщтракви ржурналистква йызнымкIва интервью гIайыквырхтI. Ауат Тарас Мирон йпа йхъвыцща, йдырраква рцIолара йанакIвызлакIгьи йджьарщун. Ауи динтернационалист дууын, асквш 1992 агIан аосетинкви аингвыщкви рапшIагылра ащаквкIра Шамба Тарас къару ду алайцIатI. Ауи «Абазашта» газетгьи данбжьагIв цIабыргын. Аредактор хъада Къвыл Фардауыс телефон длызгIаста, абазаква руысква шакIвшауа дазымцIгIауата йгьымцузтI. Сквш 25 руацIа Шамба Тарас унашва зхъицIаз МАААН а-Исполком амайчрала къраль 52 рпны йбзазауа абхаз-абаза диаспораква тшадыркIылырныс рылшатI. Ауат йрыуата гвымчIвара гIазырбауа зымгIвагьи анйалитI, хачIвы ацлырхитI, йащтаныкъвитI. АпхъагылагIв йхъарапшра, йамайчра нхара, дипломатрата йгIайырбуз Абхаз Республика акъральыгIвара щаквыргылра йгьи Къарча-Черкес Республика апны Абаза район гIаныршара ймачIымкIва йацхърагIатI. Ауи йапшу аполитик гврыхва йакIвын асквш 1998 агIан МАААН а-Исполкоми Малый ООН апредседательи ранйара адызгалырныс зылшушыз. Ауаъа акIвпI анахьанат ауысква йрыцта Абаза район гIаныршара шатахъугьи багъьата йъалачважваз йгьи атдзыхьыз «Абаза» зыкь 35-гIв йъанкъвыргауа Каир апны конгресс акIвыршарала щаквыргылра ъанарахвыз. Тарас Мирон йпа дъапх ъ а ламгIв айсыгIвх аз ашвапхаква ужвыгьи щардата урыквгIашIас ауаштI. Адунейла абазакви апсыуакви йырхъардугу Шамба Тарас Мирон йпа асквш 2005 июль агIан «Большая Медведица» йачIва гвып йрылата сквш мильуанпхьадзара руацIа хIадгьыл йазыкIкIауа йачIвакI йыхьыз ахъырхIвалгIатI. Ауаса йанаъазара, ауи йыйачIва йгIахъыцIуа анурква анцIрала йчвыркъьачврысуаштI.