Бу кюнледе Къарачай-Черкес Республиканы Башчысы Темрезланы Рашид, республиканы къурулуш бла ЖКХ-ны министри Евгений Гордиенко, Черкесскени мэри Руслан Тамбиев бла бирге, талай объектге къарагъанды.
Ала «Комфортная городская среда» деген проектни тамалында джарашдырылгъандыла. Аланы бири РТИ заводну микрорайонунда орналгъан Родина паркды. Паркны джарашдырыуну оноуун Темрезланы Рашид былтыр этген эди. Республиканы ара шахарында джашагъанла да ол проект ючюн чёб атхан эдиле.
Бу проект ючге бёлюнюб этиледи. Бусагъатда сабий площадка орнатылгъанды, спорт бла кюреширча джер да джарашдырыла турады. Эндиги джыл фонтан зонаны реконструкциясы этилликди. Фонтанла бусагъат заманнга кёре боллукъдула. Аны бла да къалмай, уллайгъан къауум солурча джер да джарашдырыллыкъды.
Андан сора Темрезланы Рашид Черкесскени Красноармейская орамында орналгъан юйню джарашдырыла тургъан арбазына да барыб къарагъанды. Алайда джашагъан адамла Башчы бла сёлешген заманда арбазны айбат этиуде излеген затларын айтхандыла. Темрезланы Рашид алайда айтылгъан затланы оноуларын этерге буюргъанды.
Комментарии