САЙЛАВЛАР МОГАРЫ УЙГЫНШЫЛЫКТА ОЗДЫЛАР

8 сентябрьде - Давыс беруьвдинъ бирлик куьнинде республикамызда ямагатшылык коьз-салувдынъ Мониторинглев куьби - РФ Президентиндеги гражданлык ямагатшылыкты оьрлендируьв бойынша Советтинъ эм «Гражданлык коьз-салув» сайлавлар праволарын коршалав бойынша Ассоциациясынынъ агзалары иследилер. Олар - аьдемнинъ праволары бойынша советтинъ агзасы Владимир Ряховский, россиялык адвокатлар Гильдиясынынъ вице-президенти Владимир Самарин, «Гражданлык коьз-салув» Ассоциация советининъ агзасы Олег Иванников, орыс тилли адвокатларынынъ Халклар ара ассоциациясынынъ агзасы Виктор Наумов, «Миллет ямагатшылык мониторинги» Ямагатшылык козгалысынынъ элшиси Андрей Кононов. Э ксперт кебинде РФ Оькиметлик Думасынынъ депутаты Михаил Старшинов та куллык этти. С айлавлардан сонъ, КЧР Ямагатшылык палатасынынъ негизинде олар пресс-конференция озгардылар. Амалламады КЧР Ямагатшылык палатасынынъ председатели Вера Молдованова ашты. Мониторинглев куьбининъ агзалары сайлавлардынъ барысы акында оьз ойлары ман боьлистилер. - Сайлавлардынъ барысында эш бир етиспевлик болмады. Менимше, Карашай-Шеркеш еринде сайлавлар йогары оьлшемде оздылар. Бу республикадынъ Ямагатшылык палатасынынъ агзаларынынъ уьлиси. Олар коьз-салувшылар ман уьйкен куллыкты юргисткенлер. Олар оьзлерининъ праволарын эм борышларын билетаган эдилер. Буьгуьнги куьн айлак уйгыншылыклы кепте озды, демеге болаяк, - деди РФ Президентиндеги гражданлык ямагатшылыкты оьрлендируьв эм аьдемнинъ праволары бойынша Советтинъ мониторинглев куьбининъ етекшиси Владимир Ряховский. Онынъ белгилевинше, мониторинглев исши куьби Карашай-Шеркеш Республикасында озган сайлавлардынъ барысын тергевлер эм ой-токтаслар акында Россия Федерациясынынъ Президентине билдируьв уьшин доклад аьзирлеек. «Гражданлык коьз-салув» Ассоциациясы Советининъ агзасы Олег Иванников республикадынъ яшавшыларынынъ сайлавлар участогына келуьвлерининъ йогары коьрсетими сайлавлар ашык эм дурыс кебинде озганы акында шаат болганын белгиледи. Соны ман биргесине ол республикада сайлавлар кампаниясына аьзирлик бойынша уьйкен куллык бардырылганы акында айтты. «Карашай-Шеркеш Республикасында сайлавлар законлы эм конкурентли кебинде озувы уьшин мунда республикадынъ Сайлав комиссиясы, аьдемнинъ праволары бойынша аппараты, КЧР Ямагатшылык палатасы уьйкен куллык озгарганлар. Ямагатшылык палата 504 коьз-салувшыды аьзирлеген, олар аьр сайлав участогында болганлар. Олар да оьз аьрекетлери мен сайлавлардынъ тамамларын беркиттилер», - деди О.Иванников. Онынъ айтувынша, уйгынлавшылардынъ яшав эм административлик сулыбы яшавшыларга сайлавларды кызыклы этпеге себеп болган. Россия адвокатлар Гильдиясынынъ вице-президенти Владимир Самариннинъ белгилевинше, баьри сайлав участокларында ийги, йогары коьнъиллик авасы туьзилген эди. Коьплеген участокларда оьнершилер келгенлердинъ коьнъиллерин оьз йырлары ман, биювлери мен коьтерип турдылар. Сайлавлардынъ барысына эм оларга аьзирлик исине йогары белгиди мониторинглев куьбининъ оьзге агзалары да бердилер. Олардынъ айтувларынша, республикадынъ эш бир сайлав участогында да бузувлар белгиленмегенлер. Сайлавлардынъ йогары оьлшемде озувларынынъ бас себеби - ол республикадынъ яшавшыларынынъ белсинликлери, деп мониторинглев куьбининъ агзалары бир авыздан белгиледилер. Пресс-конференциядынъ ызында Вера Молдованова ааьрекетке берилген йогары белги эм сайлавларга коьз-салувлары уьшин экспертлерге разылыгын билдирди.