Карашай-Шеркеш Республикасынынъ бас каласы Черкесскте «Ясыл арал» тыншаюв паркында орам фитнеси мен (street workout) каьрлев уьшин тренажерлары болган спорт майданы ашылды. Тожестволы амалламада КЧР Ямагатшылык палатасынынъ председатели Вера Молдованова, КЧР ден карувлык культура эм спорт министрининъ орынбасары Мурат Агиров, проектти яшавга эндируьвде спонсорлык ярдамын эткен «Кавказ Продукт» ООО-нынъ директоры Аслан Харцызов, Карашай-Шеркеш Республикасынынъ еринде проекттинъ йорыкластырувшысы, КЧР Ямагатшылык палатасынынъ агзасы Али Мазукабзов катнастылар.
– Буьгуьн биз спорт майданын ашувда катнасып турымыз. Ол калада ашылган экинши майдан болады. Оны ашувдынъ баславшысы «Трезвая Россия» федераллык прект болады. Сосындай майданларды ашувды Черкесск каласынынъ мэриясы макул коьреди. Эм арбатын да олардынъ ашылувына себеп этеек,– деди торжестволы амалламада Черкесск кала мэрининъ орынбасары Руслан Урусов.
Онынъ белгилевинше, каладынъ басшылыгы спортты эм савлыклы яшав келбетин яйылдырувга айырым эс этеди. Суьйтип, Черкессктинъ мэри Руслан Тамбиев 2017 йылда сосындай 10 майданды ашув акында токтас алган. Олар кала бюджетининъ акша амалларына Черкесск каласынынъ коьп шарлаклы уьйлерининъ каралдыларында салынаяклар.
– Бизге савлыгы берк болган, ишкишиликке, наркоманлыкка бет бермейтаган яс-явка керек. Биз бирге спорт пан каьрлеекпиз. Неге десенъиз яс аьдемлер бизим келеектегимиз болады. А спорт яс-явкадынъ оьрленуьвине эм келеек аркалардынъ савлыгын саклавга себеп этеди,– деди Р.Урусов.
«Трезвая Россия» федераллык проектининъ етекшилери мен бирге РФ Ямагатшылык палатасынынъ агзасы Султан Хамзаев проекттинъ мырады савлыклы яшав келбетининъ мардаларын яйылдырув экенин белгиледи. Онынъ айтувынша, федераллык проекттинъ калыбында спонсорлардынъ демев этуьви мен Россия Федерациясынынъ регионларында 20-дан артык майдан ашылган.
Черкесскте ашылган workout-майданында онавга ювык туьрли тренажер бар. Мунда калай яс оьспирлер болсын, солай ок ясы уьйкенлер де спорт пан каьрлемеге болаяклар.
Торжестволы амалламадынъ ызында Ставрополь каласынынъ «Офбитс» командасынынъ спортшылары майданда оьз усталыкларын коьрсеттилер.
Комментарии