Сюдю приставланы къуллугъу къуралгъан кюнден башлаб не тюрлю да борчун тёлемеген адамла бла иш бардыргъанлай турады.
Алиментлерин тёлемей, юйдегисин инджитгенле бла кюрешиу - ол кеси бир энчи темады, къралда уллу джарсыуланы бириди. Ай медет, Къарачай-Черкесияда да алиментледен баш джанлатыб джюрюгенле джетишедиле. Сёз ючюн, 2020-чы джылны аллындан бери Сюдю приставланы федерал къуллугъуну КъЧР-де Управлениеси алимент тёлетиу бла байламлы 764 ишни (исполнительное производствону) тамамлаб, джабханды.
Бу джылны 10 айыны эсеблерине кёре, энтда 1402 аллай ишге къарала турады. 2019-чу джылны бу кёзюуюнде ол сан 1470-ге джетиб эди. Алимент тёлемегенлени 504-сюне къаза салыннганды (ачха бла тергелген хайырларындан алимент тёлеб барырча этилгенди). Алимент борчундан джанлагъан 69 адамны да излей турабыз. Аны кибик 57 адамны административ джаны бла, 65 адамны да аманлыкъчылыкъ (уголовный) джаны бла джууабха тартыргъа деб иш бардыра турабыз. Алимент тёлеую болгъанладан 47-нге , Терслеу кодексни 157-чи статьясына кёре, терслеу иш ачылгъанды.
Алиментден бугъунургъа кюрешгенлеге къаршчы мадарла дагъыда бардыла. Сёз ючюн, 873 адамны тыш къралгъа барыргъа эркинликлери кесилгендиле, 437 адамны дагъыда талай затха эркинликлерине закон джаны бла къатылыннганды. Былтыр, сёз ючюн, ол сан 243 эди. Алай бла ол къауумгъа салыннган къазаны ачха бла ёлчеми 4,6 миллион сом болады. Иш хакъындан алимент тыйыб барыуну юсюнден бегим алыныб тургъан адамланы ишлеген джерлеринде бухгалтерияланы тинтиб, бизни бегимибиз толамыды деб къараргъа да барды эркинлигибиз. Аны бла да къалмай, алимент тёлеуге тюшген адамланы банкда счётундан анга деб ачха бёлдюрюрге, мюлкюн, рысхысын регистрациягъа тюшюртмезге да боллукъдула сюдю приставла. Узун сёзню къысхасы, алимент борчун тыйыншлысыча тындырмаучулагъа къаршчы сюдю приставла
законодательствода болгъан мадарланы барын да хайырландырыб, тюзлюк ючюн кюрешедиле.
Къарачай-Черкесияда джашагъан адам, алиментни тёлетир ючюн, сюдю приставлагъа къалай, не халда тюберге боллукъду? Сюдю приставланы ишлеген джерлерине барыб айланмагъанлай, «Запись на приём» деген сервис бла хайырлансагъыз, кесигизге табды. Ол джумушну Управлениени сайтында (ros.fssp.gov.ru) «Интернет-приёмная» деген электрон сервисни юсю бла этерге юренигиз. Хапар билирге эмда тарыгъыуну айтыргъа «Личный кабинет сторон исполнительного производства» деген сервис бек джарайды. Сюдю приставланы КъЧР-де Управлениесини сайтындагъы «Узнай о своих долгах» деген сервис аны бла да къалмай борчунгу официал сайтдан чыкъмагъанлай тёлерге да мадар береди. Дагъыда Управлениени район, шахар бёлюмлеринде гражданла бла, организацияла бла да байламлылыкъ джюрютюрге деб телефон номерле ачылгъандыла. Ол номерле Управлениени сайтында джазылыбдыла. Мындан алда, абыстол (ноябрь) айны 20-да, республиканы джамагъатына билдириб, «Горячая линия» да къурагъан эдик. Ол кюн акъыл-балыкъ болмагъан сабийле ючюн тёленирик алиментлени юслеринден бара эди сёз. Кеси да Сабийни бютеудуния кюнюне джораланыб этилген джумуш эди. Бир кюнню ичине онла бла адамла, телефон бла сёлешиб, джарсыуларын айтхан эдиле.
Бу сёзюмю ахырында Сюдю приставланы федерал къуллугъу территориал органларыны алиментле бла байламлы ишлерине багъа бериуню джангы мадарлары бла хайырланнганын чертерге излейме. Ачылгъан ишлени (исполнительный производстволаны) ичинде алимент тёлетиу бла байламлыла къаллай бирдиле деб, ол кёзден багъа бериледи. Акъыл-балыкъ болмагъан сабийлени эркинликлерин джакълауну игилендириуге джораланнган ишди, айхай да, ол. Бизни регионда аны эсеби процентле бла айтылгъанда 82,9 болады. Къралда джюрюген орта тергеуден мийикди кеси да. Алай болса да алимент борчун тындырмагъан адамла бла кюрешни сабыр этер акъылыбыз джокъду – иш алкъын кёбдю. Ол себебден акъыл-балыкъ
болмагъан сабийлени эркинликлерин джакълау Управлениебизни баш борчларыны бири болгъанлай къалады.
Орусланы Рамазан,
Сюдю приставланы федерал къуллугъуну
КъЧР-де Управлениесини тамадасы,
КъЧР-ни баш сюдю приставы.
Комментарии