РЫНХАРА ДЖЬАУАПКIРАЛА ЙДЫРХЪЙИТI

Россия Федерацияла сквшигIадза июнь а 16 амедицина анхагIвы йы-Мш дыртлапIитI. Ауи амш йадахIвуата Къарча-Черкес Республика апынгьи амедицина анхагIвчва йрайхIвахIвтI. ХIреспублика айъазартаква ргIащтийыгIвчва Черкесск акультура Тдзы йгIадрайгватI. Агвыргъьахъв айззара йалан КЧР а-Правительства а-Председатель йзаместитель СУЮНОВ Джанибек, КЧР АуагIа Айззара (а-Парламент) а-Председатель йзаместитель ХАБОВ Руслан, згIвадарахчарала КЧР аминистр ШАМАНОВ Казим, амедицина нхартаква ргIащтийыгIвчва. Агвыргъьахъв айззара йалаз хIреспублика апны азгIвадарахчарала псахрата йакIвшаз, амедицина нхартаква штшауацIырхыз гIахъызтIуаз фильм йапшырныс рылшатI. КЧР а-Хъада Темрезов Рашид йыхьызла КЧР а-Правительства а-Председатель йзаместитель Суюнов Джанибек агвыргъьахъв йгIадгылыз драйхIвахIвтI. – ЙцIыхъвахауа ажвасквшква руацIала КЧР апны амедицина йапщылу апсахра бзиква зымгIвагьи йыгIбитI. ЙалкIгIата, хIреспублика азгIвадарахчаратаква рымлыкв-техника щата агъьчIвра айъазагIвчва швъачIвагIа азъазарагьи йаланархIатI. Медицина цхърагIара задзаз ачымазагIвква рразыра ажваква ауи йаквшахIатхитI. Зуыс йазъазу, йапшым амедицина нархараквала дырра хIаракIы зму ъачIвагIагIвчва хIрыхIазырырныс хIылшатI. СКГГТА йаланакIуа амедицина институт йгьи Черкесск йаныргIалу амедицина колледж аъачIвагIагIвчва ррыхIазыррала уыс ду дырхъйитI. Ауаса хIара ауыла хIыгьгIашIасуам, амедицина нхагIвчва рдырраква йанакIвызлакIгьи йшрыладырхIушла амальква гIахIахвитI. Амедицина анхагIвы йы-Мшла сгвы йгIатыцIуата снашвайхIвахIвитI, згIвадара багъьа швымазтI, – йхIватI Суюнов Джанибек. Къарча-Черкес Республика а-Хъада Темрезов Рашид йунашвала згIвадарахчарала агIатгараква зму, сквшщарда анхара йазтыз «КъарчаЧеркес Республикала гIатгара зму айъазагIв» ЧIахIра хьзы шырквнадыргазла ашвъаква риттI Черкесск клиника-чымазагIвтара айъазагIв САКИЕВ Мурат Анатолий йпа, айъазарта-реабилитация Квта ахирург ЧОМАЕВА Аида Азретали йпхIа датшагьи. «КЧР-ла гIатгара зму азгIвадарахчара анхагIвы» ЧIахIра хьзы рквнадыргатI: Абаза муниципальна район аполиклиника афельдшер АР Земфира МухIамад йпхIа, ареспублика стоматология поликлиника архарджьра хъвшара аунашвачпагIв ДАБАГЪВА Борис Михаил йпа датшагьи. Амедицина анхагIвчва ари атшын ажва пха щарда рзынадырхатI, ауат рынхара агIвычIвгIвыс йызгIвадари йынцIри йшапщылу гIалыркIгIатI. – КЧР АуагIа Айззара (а-Парламент) а-Председатель Иванов Александр йгьи адепутатква рыхьызла сгвы йгIатыцIуата пхата снашвайхIвахIвитI, – йхIватI КЧР АуагIа Айззара (а-Парламент) а-Председатель йзаместитель Хабов Руслан. – Швара уахъгьи тшынгьи ауагIа рызгIвадарахчара швазынхитI, швымч тата, швызгIвадата, швъачIвагIадырра йалахIауа, анхара швазгIашыкъта адуней швгвы анчвгIарагIатI. Сквшщарда джьауапкIрала зынхара йадгылуа, азгIвадарахчара тшауацIнарыхра зхатI алу амедицина нхартаква ръачIвагIагIвчва КЧР АуагIа Айззара (а-Парламент) а-Президиум ачIахIра грамотаквала йгIалыркIгIатI, ауат йрыуапI: ареспублика Перинатальна Квта аклиника-диагностика лаборатория афельдшерлаборант БАЛА Марина МухIамад йпхIа, ареспублика чважь-венерология диспансер амедахща ДАХЪВМА Людмила АбутIалиб йпхIа датшагьи. ЗгIвадарахчарала КЧР аминистр Шаманов Казим айъазагIвчва тшырзынайырхауата ауат руыс шалачпу, джьауапкIрала йадгылра шатахъу йхIватI. – ХIкъральгьи, хIреспубликагьи рунашвачпагIвчва згIвадарахчарала хIреспублика а-Министерства апахь хачIвыта йдыргылуа зымгIва шхъйуш йазхъасцIитI. Ансимшы уыста йшвырхъйауала сшвзыразпI, хIреспублика азгIвадарахчара тшъауацIнахуа швара швалацIара дупI, – йгIаликIгIатI аминистр. КЧР а-Правительства а-ЧIахIра грамотаквала рыхьыз рхIватI: ареспублика саби чымазагIвтара аъачIвагIагIв БИБИЛОВ Аламат Зауырби йпа, ареспублика чымазагIвтара аоперационна медахща ЛАКIАЗ Анна Асльанбакь йпхIа датшагьи. ДзачIвызлакIгьи йынхара бзи йбузтын, джьауапкIрала дадгылуазтын, йгIатгараквагьи щардазлуштI. Ари атшын «КЧР-ла гIатгара зму азгIвадарахчара анхагIвы» ЧIахIра хьзы гIазквнадыргаз Абаза муниципальна район аполиклиника афельдшер Ар Земфира МухIамад йпхIа лынхара ауи йаквшахIатхитI. – Сара сквш 30 цIитI «ЦхърагIара ласы» апны фельдшерта сынхауищтара. СынцIра апны датша ъачIвагIакIла сынхауата сыла йыгьсызгIацIажьуам. ЗъачIвагIа гвылагьи псылагьи бзи йызбауа зынгьи датша уыскI дгьзадгылхуашым. АчымазагIв йпны зымгIва рапхъа йнадзауа хIара хIакIвпIта, хIдырраква, хIцхърагIара агIвычIвгIвыс йынцIра ангIанахчауа гIаншитI. УахьчIва йгIасквнадыргаз ачIахIра хьзы сара швабыжта сайгвыргъьитI йгьи хIапхъахьылагьи рыцIагьи сынхара саквнаргвышхвушта йспхьадзитI, – лхIватI Ар Земфира. Агвыргъьахъв йгIадгылыз рыхъазла КЧР артистква ауарадква рхIватI йгьи йгIахIвытI. Россия Федерация а-Президент Путин Владимир йширыбагъьазла, хIкъраль аполитика апны магIын ду ззалырхуа агIвычIвгIвыс йызгIвадара ахчара, адемография аъаща агъьчIвра ракIвпI. ЗъачIвагIа йазцIабыргу, здырраква хIаракIу, зуыс йазгвалымсым амедицина анхагIвчва щардагIвызтын, ауагIа рызгIвадара аъащагьи бзийызлуштI.