РУЫСГЬИ РЗЫБУШТI, АНХАРА ТЫПКВАГЬИ ГIАНДЫРШУШТI

ГУМБАРГIА Мурати МухIамади раба Олег йшвапхала ръачIвагIала юристхатI. АхIба Мурат Абхазия апны амилиция апхьарта дгIалган, хысквша ауаъа ауацIа уысквала аорганква дрылата дынхатI, ауи йацйырцауата Чурсин В.Д. йыхьыз зхъу Ставрополь институт апны юристта дапхьатI. УахьчIва ауи ареспублика филармония апны дюристпI. МухIамадгьи йара ауи аинститут юристта дгIалгатI, РФ а-Минюст КЧР-ла а-Унашвачпарта апны дынхун, ауаса дгIакъвыцIхтI. Ауи йашвхIаусыгIвахаз агIвайщчва йрымаджьащахъвата тшыздыркIылыз ауыс акIвпI – арпхарта апны уатралыцI гIархарджьра. – Ауи апш мурад анхIчпа сара съанхуз сгIакъвыцIхтI, йауа ухIварыквын, рпхарта уыхвара анхарта амщтахь, атшпсщара мшква рагIан йуылымшуш уыспI, ауи уадкIылата уадынхалра атахъыпI. Мурат агIвуыскIгьи йзадкIылитI, сара акыт сгIайхын, арпхарта уыхвара джвыквхIцIатI, – йхIвитI МухIамад. ГумбаргIа Олеги Бэлли рпачва йгIаджвыквырцIаз ауыс йацыркIтI, йдыргвышхватI. АчкIвынчва арпхарта Черкесск йа Псыжв апны йыруыхварныс рылшушын, ауаса ауат ХъвыжвчкIвын кыт апны рабаду йхакв гIалырхтI. АтгIачва Абхазия апны быжьсквша раъара йбзазатI, ауи йгIалцIла рабаду йхакв мцыран. ГвынгIвырапI заман ауыра заджвгьи дъамбзазаз ахакв, атдзы бзидздза уахьпшра шатахъыз. Айщчва ауи йыгьгIашIанамкIытI, уахьчIвала йшрылшуз апшта апшцIагьи атыдзгьи агвындыргIвытI. – Ужвыгьи йчпачIву гьмачIым, – рхIвитI ауат. – Ауаса хIхакв шаъази йшцази гьузашIырпшуашым. ГумбаргIа арпхарта уыхвара асквш 2017 декабрь йджвыквырцIатI, ауи хвсоткакI гIацIанакIитI. Ауат закIы-гIвба мзыла ауыхвара нхараква йрылгарныс йаквдырпшуан, ауаса амонтаж, апрысылра, адгьыл рыхIазырра заман бзи рыквнахтI йгьи йагIвсыз асквш ок тябрь агIан акIвпI йанлацIа. – Йара арпхарта аквпшыралагьи, абльынква гIазлыху апкъыгIваквалагьи уыжвгIанчIвипI, – йхIватI МухIамад. – Ауаса алацIара, арашвара, дзы ацIачвара, ацIагахра рыхъазла автоматика амалькIгьи гьгIахIрысабапуам, зымгIва напIыла йхIчпитI. Сквшщарда закIгьи ъалахIымцIуз адгьыл тшпснащатI, къуат ацIапI. Ауи ахIатырла анышв закIгьи гьадхIымгалтI, химия пкъыгIвакIгьи аргван йыгьхIымгатI. Йара агIайыра хIапшхвыпш гIаквчIвауа йаналагауа йатахъу адыгIгалитI. МухIамад йажваква йрызхъауцIушта йаъапI. Йауа ухIварыквын, арпхарта апны сатырта йлаз анаша ацIахь ахIвра гIакIылсуан. Адгьыл химия пкъыгIвала йадынхалзарквын, хIвракIгьи шгIамиуашыз гвынгIвырапI. Айщчва тшыздыркIылыз ауыс йшгIаквчважвузла, йгIадрысабапуаз ажваквала йагрономызшва урызхъвыц ауашын. – Швара швюристпI, тшыздшвкIылыз ауыс швъачIвагIа йачвыхъарапI. Арпхарта ауацIа шаъазлушла, агIайыраква шлашвцIушла, швшрыдынхалуашла аджвырагIв шврайкьангьашума? – сырцIгIатI ачкIвынчва. – МчыбжьигIадза агроном дхIызгIайитI, – йхIватI Мурат. – ХIара йхIхъазымкIва ауи рпхарта зму зымгIвагьи дрызцитI. ХIанлацIуш, ауи шхIчпуш, йамхIхуаш абгъьычкIвынква датшагьи ауысквала дгIахIылабжьитI. СквшыкI – гIвысквшакI цIрыквын, хIара-хIара зымгIва хIзынардзушта хIгвыгъитI. АчкIвынчва адгьыл адынхалра швабыжта йрымаджьащахъвапI, ркъарула йдырхарджьта йгIацIаргахыз анаша йшайгвыргъьаз ажва гьалам. ЙагIвсыз асквш адзын агIан ауат йапхъахуз ртшыгIвра гIацIаргатI, ауи хтоннкIи бжакIи айхIа йнадзун. – Адзын йгIацIаугауа атшыгIвра рыцIа ймачIхитI, – йгIаликIгIатI МухIамад. – АгIапын агалагьи йшщардазлуш кьангьаш гьазгIагIгуам. АчкIвынчва пIатIражанагьи гIадырйырныс рмурадпI, ауаса ауи ахъазла йгIвбахауа рпхарта дыргылра атахъыпI. Йауа ухIварыквын, анаши апIатIражани ргIарйыщала йгьапшым, йара рпхартакI апны йлауцIа гьауам. – Ауи йгIалцIла уахьчIва йхIыму арпхарта датшагьи закI гIадзхъахIыргылхра хIтахъыпI, – йгIацицIахтI Мурат. – Адгьылта йхIыму ауи хIылнаршитI. Ауаса рпхарта ргылра ахча бзи агитI, йаннуырхауагьи акврыдзраква щардапI. Йазалху программала къральыгIва цхърагIара гIахIмадзауата хIкъару аквхъушта йухIварныс баргвыпI. ГумбаргIа уахьчIва йындырхауа арпхарта дара ркъарула йыруыхватI, къральыгIва цхърагIаракIгьи ацIыхъва йыгьтамгылтI. АгIайыраква йрыдынхалуагьи дара ачкIвынчва ракIвпI. – АлацIараква рагIан хIыгвлачва бзита йгIахIцхърагIатI, рпхарта анхIуыхвузгьи йгIахIыцIагылтI, – йхIватI Мурат. – Ауи ахъазла швабыжта хIырзыразпI. ЙгIвбахауа арпхарта хIыргылырквын, гIвыджьла ауи шхIзынмырхуш гвынгIвырапI. АгIайыра апIатла йахънаумырхIвауата йлацIара, дзы ацIачвара, йпкъра, йшIахIвара атахъыпI. АпIатла тыцIта йхIчпауа зымгIва хIгIапсара арыдзуаштI. Аратква йгIарылцIла йгIвбахауа рпхарта хIыргылырквын, нхагIвчва хIшырзыбжазлуш ажва гьалам. ХъвыжвчкIвын акытква райхIара йрапшпI, уъанхуш гьаъам. ЗджьакIы Черкесск, Невинномысск нхара йцузтынгьи, айхIара ахча тшыткI гIапшцIыргауата йъанхуш гьрауам. ГумбаргIа йгIвбахауа арпхарта дыргылзарквын, цгIвыкI раъара акыт йтымцIуата нхара рауашын. ХIреспублика апны «Начинающий фермер» программа нхитI. Ауи апкъ йтата ачкIвынчва къральыгIва цхърагIара гIарадзазарквын, дара руысгьи тшауацIнахуашын, анхара тыпквагьи гIаншушын.