РПСАДГЬЫЛ ЙАЗЦIАБЫРГТА ЙГIАДЗЫНГЫЛИТI

Россия ДОСААФ КЧР-ла ахъвшара апны апатриот, аспорт йгьи ахъахчара нхараква рымыз гIахъыртIуата айззара акIвшатI. Ауи йалан физкультурали спортли КЧР аминистр йзаместитель АГЫР Мурат, чкIвыныргIа руысквала йгьи туризмла КЧР аминистр йзаместитель КЪАЗАНОКЪВА Арсен, арыпхьарали наукали КЧР а-Министерства, арыпхьара-бжьара йгьи асабиква рхвитнагIаква хчара уысквала ахъвшара аунашвачпагIв ГЕРБЕКОВА Джульетта, «Росгвардия» КЧР-ла а-УнашвахъцIарта знапIыцIу йзаместитель ЦУРОВ Марат, Россия ДОСААФ КЧР-ла ахъвшара апредседатель йхъвдаквцIараква зырхъйауа ЖЕЛНАКОВ Андрей, ажвлара организацияква, чкIвыныргIа райсра-патриот бжьарала Черкесск а-Квта ргIащтийыгIвчва, «Юнармия» патриот адкIылара йалу асабиква. Агыр Мурат йгIайззаз тшырзынайырхауата йшихIвазла, апатриот, аспорт йгьи ахъахчара нхараква рымыз ауацIа хIреспублика агородкви арайонкви рпны ашIаква рызгIвадара рыбагъьара, райсра-патриот бжьара йырзынарху айззараква акIвшуштI. – Россия ДОСААФ КЧР -ла ахъвшара, ажвлара организацияква хIсабиква р-Псадгьыл бзи йырбауата, Абашта айсра Ду агIан ауи гIазхчаз афырква рдыруата, патриотра рылата ргIадзныргылра къару ду аларцIитI. Аспорт йгьи ахъахчара нхараква рымыз апкъ йтата бзита тшгIазырбуш, згIатгараквала хIзыргвыргъьуш чкIвыныргIа щардагIвызтI,– йхIватI Агыр Мурат. Желнаков Андрей йшгIаликIгIазла, хIреспубликала ансисквшагьи йадыргаллауа апатриот, аспорт йгьи ахъахчара айззараква йрылалуа асабиква анкъвакъвраква рпны тшгIадырбара йахъазымкIва, Россия атурыхлагьи адыррагьи рауитI. – ХI-Псадгьыл атурых ъахIымрыдзуа, ауи гIазхчаз афырква ъахIхъмаштылуа хIацзакIыра арыбагъьитI, хIымчхъара йалахIитI. ХIкъраль апхъаламгIвайсра йазынхуш, Россия Абджьар къаруква рпны хъацIарала зборч зырхъйуш уахьчIва хIыздынхалуа чкIвыныргIа швакIвпI. Афизкультури аспорти шврыдкIылата швхъа швадынхалырквын. йгIашвдахIвуаш щардапI,– йхIватI Желнаков Андрей. Цуров Марат йшихIвазла, «Росгвардия» апны асквш 2019 абжьара нхараква йры-Сквшта йщаквдыргылтI. –Ауи а-Сквш апкъ йтата хIреспублика агородкви арайонкви рпны айсра-патриот айззараква адыгIгаллуштI, чкIвыныргIа йрыдынхалуа ажвлара организацияква аргваныта хIрыцынхуштI, – йгIаликIгIатI аполковник Цуров Марат. Гербекова Джульетта «Славной Родиной горжусь я!» зшIытга зму апатриот, аспорт йгьи ахъахчара нхараква рымыз хIреспублика арыпхьара нхартаква зымгIва рпны йшакIвшуш гIалылкIгIатI. – Ари амыз ауацIа йакIвшуш айззараква чкIвыныргIа рпатриот бжьара йазынарху ауыс хъадаква йрыуапI. ЙцIыхъвахауа асквшква хIреспублика апны чкIвыныргIа рпатриот бжьара йацызкIуа ажвлара организацияква бзита йгIарылахIатI. «Юнармия» адкIыларагIваца сабита зкьи хышв райхIа алалхьатI. Ауат хIреспубликала йакIвшауа апатриот айззараква радгалри ракIвыршари йацхърагIитI, йапшым анкъвакъвраква рпны тшгIадырбитI, – лхIватI Гербекова Джульетта. Ауи датшагьи йшылхIвазла, хIреспублика апны апатриот, аспорт йгьи ахъахчара нхараква рымыз хнархаракIла йакIвдыршитI. СынчIва январь а 23 йгIашIарышвта февраль а 1-дза «Величие и слава России» зшIытга зму декада акIвшуштI. Февраль а 4 йгIашIарышвта а 13-дза «Есть такая профессия – Родину защищать» зшIытга зму, февраль а 14–23 руацIа – «Согреем друг другу сердца» декада адыргалуаштI. СынчIва февраль а 23 йхъыргIвахуаш апатриот, аспорт йгьи ахъахчара нхараква рымыз ацIыхъвагIарбараква йанрылапшхуа рыцIа бзита тшгIазырбаз арыпхьара нхартаква артшхъвагаквала йгIалыркIгIуштI.