РФ а-Президент ПУТИН
Владимир дзунашвачпагIвыз
Австрия
нхара уысла йцаз аделегация
далан Къарча-Черкес
Республика а-Хъада
ТЕМРЕЗОВ Рашид. РФ
а-Правительства анхагIвчва,
аштаква рунашвачпагIвчва,
аэнергетика
компанияква знапIыцIу
аъачIвагIагIвчва Россия
йгьи Австрия хъата щардала
рацынхара щаквыргылра
уысква йрылачважватI.
Къарча-Черкес Республика
а-Хъада Темрезов
Рашид агIвкъралькI
ащтаныкъвауищтара йцIуа
асквш 50, хIапхъахьылагьи
разазаъащаква
агъьчIвра йырзынархаз
анйараква дрылан.
РФ а-Президент Путин
Владимир йгIачважвара
апны Австрия а-Федеральна
канцлери а-Президенти
Россия аделегация
ъадрайгваз ахъазла
дшырзыразу гIаликIгIатI.
– ПIатIу зкву айззара
йалу! Россия йгьи Австрия
ащтаныкъвауищтара
йцIуа асквш 50-ла
зымгIвагьи сгвы йгIатыцIуата
сшвайхIвахIвитI.
Афинанс нхагIвчва, ахIаракьатчпагIвчва,
Россия
йгьи Австрия аинвесторква
зымгIвагьи файда
злу аэкономика ацынхара
шваднакIылитI, йазакIу
швпроектква абзазара
йалалитI. Австрии
России йанакIвызлакIгьи
агвынгIвыра рызбжьата
йгIамгIвайситI. Сквшышвщарда
руацIа хIкъральква
йапшым анархараквала
акъыльаквшвара
рызбжьата йацынхитI.
Асквш 1968 агIан Совет
Союз йтыцIуа агаз Австрия
йшыргушла ангIалра
мачвы ацIарцIатI. Ауи
амщтахь зынгьи йапымшвтуата
Австрия аэнергоресурсквала
йадыгIгалитI.
ХIара аргваныта хIащтаныкъвара
абзирала Россия
йтыцIуа агаз анахьанат
акъральква йрадзарнысгьи
лшара рымапI.
ХIапхъахьылагьи хIацынхара
гьашIахIрысуашым,
рыцIагьи тшауацIнахIрыхуаштI.
«Газпром» йгьи
«ОМФау» компанияква
рангIалра шIыц апкъ йтата
ароссия газ асквш
2040-дза йгIашвадзуштI.
АъачIвагIагIвчва «Северный
поток – 2» газцага
труба апроект абзазара
йаларжьырныс йхIазырпI.
Россия Австрия аэкономика
йацызкIуа аинвесторква
рпны йгIвбахауа
гыларта акIитI. ХIкъральла
австрия фирмата 1200
нхитI, йхIзацалу анхартаквагьи
500 йнадзитI. Щарда
мцIуата Петербург йакIвшаз
ауагIахъа форум
Австрия абизнесменква
ъалаз швабыжта йсгвапапI.
ХIара йанакIвызлакIгьи
файда злу апроектква
йрыцхIкIитI, хIапхъахьылагьи
ауи анархарала
йхIылшауа гьгIаныгIжьуашым.
Россия аэкономика
дахIврала штшауацIнахуагьи
йсгвапата йгIалскIгIитI.
ЙагIвсыз асквш
ауацIала а-ВВП процент
1,5-ла йалахIатI, ауи йаццауата
апромышленна
йгьи акыт млыкврхIара
гIархарджьраква хIаракIхатI,
ахвгIахвтра тшауацIнахитI.
Россия асом тшарыбагъьитI,
– йхIватI Путин
Владимир.
Ауи амщтахь Россия
а-Президент намыца бызшвала
йшгIаликIгIазла,
агIвкъралькI ращтаныкъвара
аъаща уарыразуашта
йаъапI. Ауи анархара
рыцIагьи йагъьхара
ахъазла амайчра нхара
шатахъу даквгIашIастI.
Получайте свежие новости на электронную почту
Комментарии