РХЪВДАКВЦIАРАКВА ДЖВЫКВЫРЦIАТI

Къарча-Черкес а-Хъада ТЕМРЕЗОВ Рашид мачвы зцIайцIаз аунашваквала аминистр шIыцква рхъвдаквцIараква джвыквырцIатI.  АуагIахъа уысквала, ажвлара коммуникацияквала йгьи печатьла КЧР даминистрхатI КУМУКОВ Альберт Мусай йпа. Альберт Мусай йпа Казань федеральна университет «Международные отношения» ъачIвагIа гIацIигатI. Ауи «Лидеры России» анкъвакъвра афиналбжа дахIврала дазынадзатI. Йынхара ауагIахъа уысквала, ажвлара коммуникацияквала йгьи печатьла КЧР а-Министерства ажвлара йгьи адин адкIылараква рыцынхарала ахъвшара апны кьангьашагIвта йджвыквицIатI. ЙцIыхъвахауата туризмла, акурортквала йгьи чкIвыныргIа рполитикала КЧР аминистр дизаместительын. АгIвхъатакI ранйара апны Къарча-Черкес аунашвачпагIв аминистр шIыц йапшым акъральгIв жвлара институтква, адин йгьи ауагIахъа жвлара организацияква рыцынхарала змагIны дуу а-Министерства йахъвдаквцIару ахачIвква дрыхайыргIвазатI. – А-Министерства ажвлара йраргванызлара, Россия акъральыгIвара рыбагъьара, хIышта амамыр, атынчра, ауагIахъаква райгвара хчара, ауагIахъа бызшвакви цIаскви йгьи ахабарргагаква ртшауацIыхра йырзынхара атахъыпI. ДжьауапкIра злу уъанатIа шIыцла адахIвраква уымазтI, – йгIаликIгIатI агIвыджь райчважвара апны КъарчаЧеркес а-Хъада.  Туризмла, акурортквала йгьи чкIвыныргIа рполитикала КЧР а-Министерства унашва ахъицIуштI ТЕКЕЕВ Расул Магомед йпа. Текеев Расул КъарчаЧеркес а-Правительства апны сквшпхьадзара дынхахьатI. Ауи йынхара асквш 2008 агIан кадр политикала, акъральыгIва ртшхъвагаквала йгьи адгалра уысквала аунашвахъцIарта Хъада къральыгIва къвырльыкъвхарала ахъвшара апны ъачIвагIагIвта йджвыквицIатI. ЙцIыхъвахауа апщысквша Лагъь КIавкIаз атшауацIыхрала а-Корпорация Къарча-Черкесла а-Департамент унашва ахъицIауата аинвестиция проектква абзазара йалажьрала уыс ду акIвйыршатI. КЧР а-Хъада Темрезов Рашид йшгIаликIгIазла, аминистр шIа ашIыцраква ргIаджвыквцIарала, чкIвыныргIа рполитикала йъачIвагIадырра йгьи ауагIа дшызрыцынхауала йшвапха джьауапкIра злу йъанатIа анкъвгара апны йгIайцхърагIуштI. «Туризмла, акурортквала йгьи чкIвыныргIа рполитикала а-Министерства ахъпшылра йацIу анархараква зымгIва хIреспублика йахъазымкIва акъраль шабгу ахъазла магIын ду рымапI» – йгIвытI Темрезов Рашид й-Инстаграм напа апны.