РЪАЧІВАГІА АЗЪАЗАРА ЙАЗХІИТІ

 «Асквш абжьагІвы» анкъвакъвра акІвшалитІ. Ауи апкъ йтата акъраль ашІыпІаква зымгІва рпынгьи асабиква рыдынхалрала гврыхвара гІазырбауа аъачІвагІагІвчва швапха амырдитІ. Къарча-Черкес Республика арайонкви агород гІаныршаракви рпны йаныргІалу асабигІзартаква рбжьагІвчва анкъвакъвтІ, ауаъа йагъьта тшгІазырбазгьи рылшараква гІадырбахтІ. АпхъагылагІвчва дара ъанхауа асабигІзартаква рпны йахъазымкІва йрымдыруа асаби гвыпква рпынгьи апхьара сахІатква акІвдыршахтІ. Къарча-Черкес Республика арыпхьагІвчва ръачІвагІа йъаладырхІауа аинститут апны апхъагылагІвчва «Моя педагогическая концепция» зхьзыз ргІачважвараква йрыздзыргІвытІ. Ажюри йалаз арыпхьарали наукали КЧР аминистр лзаместитель СЕМЕНОВА Елизавета йгьи РИПКРО аъачІвагІагІвчва ауат йгватшныта йрыздзыргІвытІ йгьи йагъьыз щаквдыргылтІ. Йапхъахауа гыларта Устьджьгваты город «Звездочка» сабигІзарта абжьагІвы КИРИЧЕНКО Юлия Николай йпхІа йылквнадыргатІ. ЙгІвбахауа гыларта лквнадыргатІ Къарча район йаланакІуа ХІвмара кыт «Солнышко» сабигІзарта абжьагІвы КАРАСАЛИХОВА Зурида Гисай йпхІа йгІатылгатІ. Йхпахауагьи Къарча город «Солнышко» сабигІзарта абжьагІвы КУБАНОВА Сузана Азретали йпхІа йгьи Прикубань район йаланакІуа ЧапаевскІа кыт «Амалька» сабигІзарта абжьагІвы КОРНЕЕВА Земфира Нурчыкв йпхІа йагІвыршатІ. АпхъагылагІвчва йрайхІвахІвтІ арыпхьарали наукали КЧР аминистр лзаместитель Семенова Елизавета йгьи ареспублика профсоюз комитет аъачІвагІагІв ТЕКЕЕВ Хвсей. Ауат абжьагІвчва артшхъвага грамотакви ахча согІакви рквнадыргатІ. Россия ашІыпІаквала анкъвакъвра гІатызгаз абжьагІвчва ранкъвакъвра Къарча-Черкес ахьызла Кириченко Юлия далазлуштІ. СквшигІадза йакІвшауа анкъвакъвраква аъачІвагІагІвчва нхарала ргІатгараква гІадырбарныс йгьи йдырхІаз ашвапха амырдарныс рылнаршитІ.