РАБАДУЧВА РХЪАЦIАРА ЙГЬАМАЙЖЬАТI

СынчIва февраль а 15 совет айсыгIвчва Афганистан йгIатырдахищтара сквш 30 цIуаштI, ауаса ауи айсра ахвыртаква жвыра гьрыхьуам. АлбыргIан кыт йтыцIта Афганистан къвырльыкъв зхаз жвахыгIв йнадзитI: Къвмыкъв Уасман ХIарун йпа (дыгьгIахънымхIвыхтI), Шхай Назир Борис йпа, Шармат Умар Николай йпа, НакIвахв ХIасин Къарабит йпа (ар къвырльыкъвхара амщтахь пхастала дыдзтI), Шармат Аслан Амырби йпа, НакIвахв ХIарис МухIамад йпа, Напша Фуъад Заудин йпа, Напша Нурали Мурадин йпа, Меремкъвыль Альберт МухIамад йпа, Уаз Рамазан Мардас йпа, КIам Рауаль Нурби йпа, КIам Арсен Мусса йпа, Меремкъвыль Альберт Абдулкьарим йпа. Йара класскI йацапхьаз, йацгIадзынгылыз Меремкъвыль Альберт, НакIвахв ХIарис, Шармат Аслан, КIам Рауаль рпхыцIа ацапшхатI, ауат йшIадзата айсра алакта йтапшытI. УахьчIва МЕРЕМКЪВЫЛЬ Альберт МухIамад йпа швйабасырдыритI. МеремкъвыльргIа МухIамади КIвыни пщыгIвпачви хгIвыпхIчви гIадзындыргылтI. Афганистан къвырльыкъв зхаз Альберт зымгIва драйцIбапI, ауи асквш 1968, сентябрь а 21 дйытI. Ауи акыт ачкIвынчва рапшта, аурам хъвмарраква дрылата, агъныла дтагIвзуа, апхынла топ дасуа дгIадзынгылтI. Асквш 1985 агIан апхьарта дгIалгатI. УадыргIвана сквшыкI АлбыргIан асовхоз рабочата дынхатI. Анхара йацйырцауата асовхоз ршвъала ДОСААФ апны машинанкъвцагIвта дапхьатI. Асквш 1986, октябрь а 15 Альберт къвырльыкъвхара дызшIырттI. – Апхъапхъа Ставрополь хIыргатI, – йгIайгвалашвахитI Альберт. – Ауаъа Ростов область йыргуш адесант гвып азыркIкIуан. Сара ауаъа айъазагIвчва гIаспшытI, сырчакьын – схIатлара гьнахъум. Акомандир «СычкIвын, швпны уцахта уан бзита тшлыррчата ухIызгIайх», – йхIван сгIацадырпахтI. ЖвамшкI анцIы сатазшIыртхын, МарагIацIцIырта айсра округ йыргушыз агвып срыларцIатI. Сызлаз автомобиль батальон Амур область, Томичи кыт апны аустав хIдырдыртI, абджьар гIарысабапра, машина квпшырата йаъу рынкъвцара бзидздзата хIырзырбжьатI. Ауаъа цымызкI атшыбжьараква хIанырхъыс, йазалху амедицина комиссия гIахIпшын, хъахчарала хIкъраль йаминистрыз Язов Дмитрий йхъатала хIнайдастI. ХIара апоезд хIаквдырчIватI, техниката йхIымаз шабгу андыргылтI, хIъаргауа хIымдыруата жвыхвымшкI хIымгIвайстI. Амур область ахIауа ахьшвашвара градус 40 йнадзауата хIджвыквырган, Афганистан градус 55 пхара аъата хIнадзатI. Амашинаква хIанырхьпшуаз айха ъамапсымакI дакъикъакIла йщтIауцIазтын – напIтара ухъамкIва йыгьузгIащтIымххуазтI, ауаса амара йгIанаршуанта. ХIызлаз архъв 39/908 Шинданд къала йаныргIалын. Ауаъа йаъаз айсыгIвчва зымгIва Совет Союзла йтыцIыз хIакIвын. ХIбатальон бензин, авиация былчIвы нкъвыгIгун. Асамолетква, авертолет-бомбардирква, «черная акула»-хIва йызпхьуз авертолет дуква былчIвы гьрыгхIмырхузтI. ГIвротакIла йалаз хIбатальон КамАЗ гIвынгIважва хIыдырбагъьалын. Зынцарала КамАЗ-кI тонн гIважва агун. Ауи агIан Кандагар рахIа йшварагIвару шIыпIата йаъан, асамолетква зымгIва ауаъа акIвын йъагIачIвуз. Афганистан съадзаныз хIашIамсуа ауат былчIвы рзыгIгатI. МгIва хIаныквыз зджьарагьи хIгIашIас хIгьахвитмызтI, а-КамАЗ гIагIвыржварныс закIы гьазхIвамызтI. «Шинданд – Кандагар» мгIва километр зкьи бжакIи аурапI, быжьмышкIы мгIва хIыквын. Ачарта адыркIыххьата архъв хIгIайхызтын, хIшымлащиуаз йшун, хIаларышата а-КамАЗ-ква хIыртачвуан. ХIцата хIгIайхызтын, хымшкIы гIахIыртуан. Ауаса ауыгьи гьтшпсщарамызтI – дасу дызквчIву амашина дахьпшуан, йырчIаджьуан, мгIва дшыквылхуаш тшазадигалуан. Альберт йгIагвалашвахраква санрыздзыргIвуаз щардала йхъа дтахъвыцуа дчIван, йнашх йызнымкIва тшапсахтI, йгвгьи гIалалуан, ауаса йылызбгIауата тшикIуан. Ауи данджвылцIрызгьи йхъапщыла йылдыруаз гIасалхIвуан. Йара дгIашылхырквын, айчважвара атаджвыквхIцIахуан. – ХврейскI зчпауа й-КамАЗ йачIва къапщыкI гIаквнадыркIуан. ЗымгIва шалу Кандагар рейста 45-кI раъара счпазапI. АмгIва хIаныквызгьи аргваныта угыл гьамуашызтI, КамАЗ-кI гIагIвыржвазарквын, пщбахвба ацагушын. АшварагIварадара ахъазла метр 300–400 хIызбжьата хIцун. 19-33 зномерыз с-КамАЗ йсхъазын йаквчIваз, гIвза дгьсыцмызтI, автомат сбжьа йаныта арылагьи аруль сымата акIвын сшымгIвайсуаз. Шофер гIважвагIв рпны заджвы дырщрыквын, йтара аруль зхIыркIуаш чIыдата заджв дхIыцта мгIва хIыквылра атахъын. Ауаса ауи зынгьи дгьгIахIымрысабаптI. АлахI йбзирала, зымгIвагьи хIабгата дасу йара йтехникала дынхатI. Йара ачкIвынгьи дгвыргъьун. Кандагар хIаннадзара закIы-закI машина хIтаржьуан. АмгIваква зджьара йгIанымхауата йгвымхан, абомбаква ъагIагIвжваз амашаква щардадзан. БылчIвыта тонн гIважва згауа а-КамАЗ ду ауи апш машакI йтапазтын, йара-йара дгьызгIатымцIхуашызтI. Ауи ахIатырла, «ремонтна взвод»-хIва йызпхьуз аколонна хIцIыхъва йтагылан, – агIагвалашвахраква дрылапI Альберт. – ХIахьыла йауата йсыцын Къарданыгь абзазагIв Узденов Борис, Алибердыкъва йауаз Джьджьу Арсен (ауи дангIайх адуней йхIваджьтI). Бориси сари йъакIвызлакIгьи хIащтагыла хIымгIвайсуан. УыжвгIандзарагьи хIанйалитI, хIгьабачвымдзтI. Зны рейс сцауата КамАЗ-ла амина сахъапатI. Саргьи сгIатнарышвттI, сызквчIвазгьи амцIнапсатI, савтоматгьи зджьарала йхъыланарцIыжвын, анышв йхънагIватI. Ауи апш гвжважвагIвакI ангIаншара дзачIвсолдатызлакIгьи апхъапхъа дзымцIасуаш абджьар акIвзара атахъын. Сара сабджьаргьи гьсмаухтI, апхъапхъа йгIаснапIыцIашваз сбронежилет акIвпI. Ауи агIан хвырта гIасадзан, агоспиталь сыргатI. АйъазагIв аудын сшархъабльаз йдыртI, ауаса «амамыр бзазара уазцахырквын, ауи апш швъа уымата нхара зджьарагьи угьнарахврым»-хIва бзира сзихауата йхIван, сшызгIвадула швъа гIаситын сгIауищтхтI. Альберт Афганистан къвырльыкъв шихуз йани йаби ласы йыгьрымдыртI. Сальамшвъа ангIайгIвуазгьи рахIа йгIвадахьдзу ашIыпIа – акъральгIвына йадзхъаз Кушка даъазшва йгIайщтиуан. Февраль а 23 йадахIвуата йани йаби рпа дъаныз архъв йгIатыцIта ртшхъвага швъа анрызгIай агIан акIвпI Альберт Афганистан къвырльыкъв шихуз анырдыр. Ауи азаман ани аби руацIа йтшаз гIазгвынгIвуаш ауи агвъаджьыгIва зырхъвыхыз йакIвпI… – Шинданд апны йптшыз а-КамАЗ-ква ари Ахва ду (АлбыргIан апны шIыпIа хьзыпI) апшта йаквпсан. УачIвы йхIызниуаш заджвгьи йыгьхIымдыруазтI, – йгIайгвалашвахитI Альберт. – Афганистан хIангIатыцIх хIтара зынла датша гвыпкI таргахтI, хIаргьи сентябрьта Амур область хIгIаргхтI. Ауаъа хымызкI хIаъан, маршировкIа хIазырбжьатI, апарад хIалан, уацIыхъван сержант чын гIасквнадыргатI. Ауи азаман ар йыргуз гIвысквша къвырльыкъв рхун. Афганистан сквшыкI йаъаз ауи гIвысквшата йхIзырпхьадзатI. Октябрь йцаз гIвымызкIлагьи сахънахIван, асквш 1987 декабрь агIан акIвпI схагIагв сангIайх, – йхIвитI ачкIвын. – Афганистан сангIатыцIхуаз хмедалькI сылан – «За заслуги», «За исполнение служебного долга за пределами Отечества», «От благодарного афганского народа». Асамолетла съадзагIапссуз сшевронква, скитель сырхьпшытI. ХIсамолет Минводы йангIачIва Черкесскла йгIайхуашыз хвгIвы такси хIкIын, хIгIайхтI. – Черкесск йхъвлата сгIадзатI, зпны сгIанха ауаш сцриквагьи щардагIв тан, ауаса йъабзазуз сзымдырхуата авокзал сыквылтI. Ауаъа къарча таксисткI къвырльыкъвхара сшгIайхуаз гIайгвынгIвын, дгIасыдзхъагылтI, смедальква аниба Афганистан сшаъаз гIайгвынгIвытI. «УгIай, са уызгахуаштI, уабагьи уасакI гIакIайхIыргвапI!»-хIва дымшыркъвауа хIурамхъадза сгIайгхтI, – йгIайгвалашвахитI Альберт. – АсахIат ахпа надзагIвацатI, акыт ычвапI, уагIакIгьи гьпIатIауам. Ужвы хIурам сгIабжьалхитIта ауыгьи сыматыбгIахатI, съагIамгIвайсуагьи Шарик-хIва ла чвгьакI хIыман, ауи сгIанамдырхуата йгIасыжвылпIхIва схъвыцитI. Агвашв гIастIыта сангIагваралх, Шарик гIаспыраххын сарбзитI, йгвыргъьитI. ХIаба ашв гIайтIын, саниба зынла йайыркIын днашылхтI. «Атажв, бца анаъа малицакI дгIайтI, йтахъу бицIгIа», – йхIватI. ХIан дгIаджвылцIызтын – са сгылапI. «Упа дгьуымдырхтI», – лхIван хIабагьи дйыквхIвырттI. Араъа узычвхуазма? ХIаба сшвъаква дырпшуа хIшчважвумца йхIыршатI. СхIатлара килограмм 52 йнадзауата ар йцаз сангIайх килограм 40 акIвын йсчакьхуаз. АлбыргIан кыт абзазагIв Меремкъвыль Альберт МухIамад йпа рхъвыхра щарда дгIарылстI, ауаса АлахI йрызкъхъвы дгьалйымхсызтI, йпхыцIа йцри шта дгIанагхтI. Альберт къвырльыкъв зцихаз ужвы йъагIадзазгьи драбадыритI, телефонла йайчважвитI. Ари асквш февраль а 2 Альберт Кропоткин даъан. Ауаъа ахъахьыла зунашва счпаз Къарданыгь йауу Узденов Борис, Новосибирск йгIатыцIыз Панчин Сергей Альбертгьи дрыцта ррота акомандир Кожухаров Владимир Адольф йпа йунагIва йсасытI. АнбжьагIвчва сахIатпхьадзара йадзхъачIватI, йабабатI. Альберт Афганистан айсра дангIайх амщтахь йгIайквнадыргаз аюбилей медальква йрыуапI «70 лет Вооруженных Сил», «20 лет вывода войск из Афганистана», «25 лет вывода войск из Афганистана». Ауи ймедальква сквш – 30 цIитIта йкитель йалата дрыкврыцкьауа йынкъвигитI. Акитель ужвы тIакIв йчвтшвахазтынгьи, бзидздза йбитI. Меремкъвыль Альберти йара акыт йауу ХIачкъыз Радими унагIвара гIандыршатI, пщгIвыпхIчва гIадзындыргылитI. АхIбадза Таисия медицина колледж дгIалган, ХIабаз айсра комиссариат дынхитI, гIвысабичва лымапI. Ауи йлыщтагIайуа Залина акультури азъазари рколледж диплом къапщыла дгIалгатI. Лдырра йалалырхIауата Ростов область, Шахты йаныргIалу ауниверситетгьи «дизайнермодельер» ъачIвагIа гIацIылгатI, Москва аъахвтанква ъардзахуа астудия дынхитI. ЦIыпх мартI агIан Босния-Герцеговина асуратгIвгIвчва райззара апны ауаъа йапхьауа мастер-класс длырбатI. Ауи йлыщтагIайуа Алина юристта аколледж диплом къапщыла дгIалгатI, Залини лари йацыта Москва йынхитI. АйцIбадза Аиша апхьарта й-2-хауа акласс дыцIапI. Альберт ар дгIайхынгьи зынгьи дгьымчIватI, шоферта сквш 26 дынхатI. УахьчIвала йхъапщыла Радими йари рсабиква адрыпхьитI, бзазара мгIва тамам йтадыргылитI. АйсыгIв-интернационалист йы-Мш ангIаргванхауа февраль а 15 йадахIвуата Афганистан апны зинтернационал борч зырхъйаз зымгIва ргвбжараква мачIхарныс, йырквнагу ацхърагIараква гIарадзауа, рызгIвадара йалымдзгIауа, рдуней мамырта ргIариква, ауат йгIарыцIагылуа рыхайырква щардала йнардасырныс рзыстахъпI.