ОЛИМПИАДА АПХЪАГЫЛАГIВЧВА ДРЫСАСТI

КЧР а-Хъада ТЕМРЕЗОВ Рашид хIреспублика йгIайрайгваз Токио апны Олимпиада ачемпионква Ставрополь край йгьи хIреспублика рымажа апны пхата йырпылтI. Асасчва Черкесск город «АдзыгIвбжьа ЙачIва» культура-тшпсщара парк йаныргIалу «Юбилейный» физкультура-згIвадарарыбагъьара комплекс апны хвитта абакIра тшазызбжьауа асабиква йрынйатI. Ауаъа аспортсменква пхата драйхIвахIвтI КЧР а-Правительства а-Председатель йзаместитель ЧЕККУЕВ Хзыр. – УахьчIва йхIызгIайыз ачкIвынчва Токио олимп хъвмарраква рпны хъацIара, чхIара гIадырбатI, Россия апны згвы йахвиту уагIа багъьа шту адуней шабгу йддырдыртI. Ауат ршвапхала йгIадзынгылуаш, аспорт апны йхIаракIу агIатгараква йырзынадзуш хIщардазтI, – йхIватI Чеккуев Хзыр. Токио олимп хъвмарраква рпны хвитта абакIрала хьапщ медаль гIатызгаз САДУЛАЕВ Абдулрашид, СИДАКОВ Зауырбакь, УГУЕВ Зауыр йгьи аджьаз медаль йанкъвгагIвхаз РАШИДОВ Гаджимурад, НАЙФОНОВ Артур, хвитта абакIрала Россия азкIкIра команда абжьагIв хъада ТЕДЕЕВ Дзамболат хIреспублика йъагIайыз ахъазла йырзыразта пхата йрайхIвахIвтI физкультурали спортли КЧР аминистр УЗДЕНОВ Рашид йгьи КЧР АуагIа Айззара (а-Парламент) адепутат ХВБИ ХIасан. Ари атшын КЧР а-Хъада Темрезов Рашид й-Унашва апкъ йтата хIреспублика йгIайыз аспортсменква «Къарча-Черкес Республикала гIатгара зму афизкультура анхагIвы» ЧIахIра хьызква йрынкъвгагIвхатI. Чеккуев Хзыр артшхъвагаква абакIыгIвчва йритхтI. Аспорт гватра ду ъазалырхуа Къарча-Черкес апны ари йапшу анйараква ракIвыршара асабиква згIвадата, къару рымата ргIадзныргылра апны магIны амапI. Олимп ахъыкв йазынадзаз аспортсменква асабиква рылаквала йанырбара ауат швапха гIархъырхуа, агIатгараква йырзычIвырхъауа йалагитI. Хвитта абакIрала гIатгара зму аспорт амастер, Россияла гIатгара зму абжьагIвы Тедеев Дзамболат хвитта абакIрала хIреспублика асаби спорт апхьартаква ргIащтийыгIвчва аспорт йаквйыргвышхвауата атшыбжьараква шахъдымрыпушла, ахIбачва йырхIвауа йшаздзыргIвуашла дрылабжьатI. АгIачважвараква рымщтахь асабиква ачемпионква сурат рыцхъырхырныс йанадрыхвит кьазу йгIалагылтI. Асасчва гватра рзалрымхуата сабикIгьи дгьгIанырымжьтI