Шимал Кавказ кърал гуманитар-технология академияны КъЧР-де юристле хазырлагъан институтунда наркотиклеге къаршчы дерс бардырылгъанды.
Бютеуроссия Халкъ фронтну Къарачай-Черкесияда регионал бёлюмюню келечилери КъЧР-де Ич ишлени министерствосуну къуллукъчулары бла бирге къурагъандыла бу дерсни.
Дерсде бюгюнлюкде кёблени сагъышландыргъан затны юсюнден сёз баргъанды – джаш адамланы эмда акъыл-балыкъ болмагъанланы ичлеринде медицинагъа келишмеген психотроп шекелли препаратланы ичгенле кёбден кёб болуб тебрегендиле. Ол себебден профилактика ишлени кючлю этиу заман салгъан борчларыны бириди.
Джаш адамла ол хылымылы затланы къатларына бармазча, саулукъларын къурутмазча этиуге уллу эс бёлюнмесе, тамбла кеч боллукъду, деген оюмну сёлешгенле бир аууздан джакъладыла. БХФ-ны келечилери насвайны джайгъанлагъа тазирни уллу этерге кереклисини хакъындан оюмларын айтдыла. Бу оноуну быйыл джаз КъЧР-ни Халкъ Джыйылыууну депутатлары да къабыл кёргендиле.
Айтылгъан зат сёзде къалыб кетмез ючюн, республиканы шахарлары бла районларында да профилактика ушакълагъа аслам эс бёлюннюкдю.
Комментарии