ЛЫЖЬОРА ЩАРДАЛА ЙХІХЪАДЗГЫЛАЗТІ

Швымш бзита, йтлапІу «Абазашта» газет аредакция анхагІвчва! Йауашызтын, йгІаргванхауа апхІвысква ры-Мш йадахІвуата ари асальамшвъа хІцри газет анапа йгІаквшвцІа. Сара сквш 80 зхъыцІуаш АбазахІабльа абзазагІв КІАМ Люба МахІмуд йпхІа лакІвпІ сгІазквчважвуш. Ан… Ари ажва ацкІыс пшка, ацкІыс хъагІа адуней йгьыквымзапІ. Дугьи хвыцгьи, рныбыжь йгІаквхымкIва, ранчва бзи йырбитІ, бзирата йаъу зымгІва рзыртахъпІ, ан лажва ацкІыс узыртынчуа шаъам рдыритІ. Ангьи лсабиква рыхъазла бзирамкІва закІгьи лгвы йыгьтам, ауат тынчта, йызлу ажвлара йрылагІващауа, раргванкви дари ракъыль аквшвауа йбзазарныс, рымгІва йанакІвызлакІгьи йрайшазларныс рзыртахъпІ. ХІмама азаман аналачпаз адуней дгІаквылтІ, гІапсарагьи бжарагьи йрылу лдыритІ. Ауи АджьбакьргІа дыртпхІапІ, атгІачва апны гІвайщчва драхщазаджвыкІта дгІадзынгылтІ. Лангьи лайщчвагьи бзидздза дырбауа гватрала дкІвдыршун, бзирата йаъаз зымгІва лзыртахъын, лсабихъа штынчызлуш йащтан. Азаман хъамкІыхла йымгІвайситІ. Ауи лныбыжь даннадза, апхьартагьи дыцІалтІ, адырраква йылзыгІахъыртІуа адуней джьащахъва лгвапхадзауата, лыквлагІвчва дгІархьымшвауа дапхьун. Йбыжьбахауа акласс дангІалга лтгІачва закІыла дырцхърагІара лтахъыта лапхьара нылжьын, аколхоз архъаква зрашвуз дрыцылтІ. Ауи швабыжта дынхагІвын, луыс нардзамкІва йыгьгІанымхузтІ, дызлаз агвып рапхъа дгылата драшвун, нартыхв шІылхуан, датша нхараква лырхъйун. Зпшдзарагьи зуысхащагьи ухъырхуаз апхІвыспа дызбуз гІалайлахІун. Ауи 17 сквша рахІа дыртамкІва КІамргІа рунагІва днашылын, цгІвысабичва гІадзынлыргылтІ. ХІан аколхоз нхараквагьи асабиква рыгІзарагьи ацлырцун, архъа нхараква йанрылгарыз аферма апны ахІвысква дырхьпшуан, зынгьи нхаракІгьи хъара дгьачвымгылтІ. Ауи ламайчра нхара ахъазла артшхъвага швъаквалагьи, амедальквалагьи лыхьыз рхІватІ. ХІани хІаби зпхдзыла йынхаз, йбзазаз йрыуапІ. Ауат тыдз шІыц андыргыл йаквшвауата хІангьи бзита йынхуз датша пхІвысквакІгьи асовет йызшІыртын, рынхаща ахъазла йдыртшхъватІ, асогІаквала йдыргвыргъьатІ. Ауи йгьылхъаштылхуам, асовет йгьи аколхоз аунашвачпагІвчва ауи агІан атыдз шІыц шабгу йазхъуш хъышвпрапса ангІалырт дгвыргъьауа лунагІва дшгІадгылхыз. Анхара ртшхъвагаква ракIвымкІвагьи КІам Люба «Ан-фыр» медаль гІалквнадыргатІ. Абзазара алачпапІ, баргвыракІгьи уанымйауата йыгьцум. ХІан агвымха ласы йылхъаштылхуа, абзира анцІрала лгвы йтата дгІабзазатІ, лгвапари л г І в ы ч І в г І в ы с а г І а р и гьлымрыдзтІ. Ауи лбжьагажваквала хІара абзираква шхІзылтахъу хІылахІхІвитІ. Адин йадкІылу хІан мшигІадза намаз лчпапхьадза йлыщтагІайуа зымгІва згІвадара рымазларныс, адуней мамырызларныс дахІвауата АлахІ тшизыналырхитІ. «ХІкъраль, адуней шабгу тынчызтІ, ахвыцква рылахь зрыхъващуаш закІгьи нымшарыгІатІ!» – зымгІва рыхъазлагьи дхІвахІвитІ зхІальгьи, зажвагьи, знапІгьи, згвгьи пшку хІыгІвычІвгІвыс тлапІа. Адунейла йдыртлапІауа апхІвысква ры-Мшла йгьи мартІ а 7 йылхъыцІыз асквш 80-ла слайхІвахІвуата хІан дзайгвыгъауа абзираква зымгІва лылаквала йылбарныс, ларгванква рпхара лыгымхарныс, дызгІвадата, лажва гвыбзыгъа хІымгІвата щардала хІапхъа дгылазларныс лзыхІтахъпІ. Ан, апхІвыс лыхъазла щарда узыгІвуаштІ, йугІвыпхьадзагьи закІ учвагІвсызшва йубитІ. Абзираква зымгІва ззыстахъу хІан хъагІа щарда дхІымазтІ. Арат асатырква гвылагьи псылагьи сыззыразу санхъва йылзынасырхитІ.