ЛЫНЦIРА АЗГIВАДАРАХЧАРА ЙАЗЫНАЛЫРХАТI

«Абазашта» газет анапаква рпны хIуагIахъа йрыуата йапшым аъачIвагIагIвчва бзиква щардала хIгIарыквчважвитI. Ауат рызджьакI рхабар хIзырдыруа ркытлагIвчва ракIвпI. УахьчIвагьи Псыжв кыт абзазагIв КIвыдж МухIарби йажва пхаква, йразыра йкытлагIв йылзынайырхауата ужвыгьи зны ауи хIгIалыквчважварныс дгIахIватI. Сквш 60 гIвычIвгIвыс ныбыжькI аъара йнадзитI. Ауи аъара сквшы цIитI ШАУ Марина Мурадин йпхIа амедицина дапщылищтара. Ауи аъара заман уъачIвагIа къычIрата йузамылуа, гIващагIаракIгьи алуымщтуа уынхарныс гьмайрам. Марина Мурадин йпхIа лынцIра-бзазара амедицина йъазыналырхаз зынгьи дгьамайгIваджьхтI. Асквш 1940 агIан Гвым кыт ййыз Шау Марина Мурадин йпхIа дхвыцищтара амедицина бзи йылбун. Акаца цIла амыгъква гIамылхуанта ауат гвырызшва лыла йгIацIалжьуа дхъвмаруан. Лсабихъа анцагьи ауи аъачIвагIа йазлымаз абзибара сквшигIадза рыцIагьи йымчхун. АпхIвыспа апхьарта дангIалга, Кисловодск медицина училища дыцIалтI. Ауаъа дырра бзи лаутI. ЛъачIвагIала диплом ангIацIылга, Къарча-Черкес область чымазагIвтара апны нхара далагатI. Ауи азаман агIан ауаъа айъазагIв хъадата Шишков Михаил дынхун. ХIкъральла зыхьыз бергьльыз айъазагIв гвымчIваква Вальтер Виталий, Батчаева Людмила, Чичков Юрий рпны швапха байа лырхIарныс лылшатI. Ауат ръачIвагIа амадзаква лдырдыруаз акIвымкIвагьи, лхъвдаквцIараква джьауапкIрала дшрыдгылуаш, ачымазагIвква гвапата дшрачважвуш гIалархIвлун. СквшквакI ауаъа данынха амщтахь Псыжв кыт акушерката далагатI. Асквш 60-ква рагIан ачымазагIвтара апны дзы гькIылгамызтI. Атшква ацIархIвунта абкъвылквала Къвбина дзы гIаргуан, амедицина ъамапсымаква гьнамхъузтI. Ага ауаса йаъазтынгьи, Марина лынхара апны зынгьи гIващагIаракIгьи гьаллымщттI. Саби дзауаз апхIвысква зымгIва рызгIвадара лдзгIара амайдзауата майрата йщаквгылхуан, пхастакIгьи нымшауа, асабиква згIвадата ййуан. Марина лхъвдаквцIараква анлырхъйуз зынгьи гвжвайыгIваракIгьи гьгIалыламшвузтI, йанакIвызлакIгьи аджьауапкIра лара йналахвуан. ЗаманкI анагIвс Псыжв чымазагIвтара Заречна йыргахтI. Псыжв кыт апны фельдшер-акушер пункт гIахъыртIытI. Марина Мурадин йпхIа ауаъа процедурна медахща ъанатIа гIалызхъарцIатI. Ауаъагьи намхъара щарда аъан. Амедицина ъамапсымаква гьнамхъузтI, столкI апны апрививкаквагьи лчпун, ахвыртаквагьи дрыдынхалуан, датшагьи уыс щарда йара ауаъа йакIвлыршун. Ага ауаса йаъазтынгьи, мыгIвхъгаракIгьи зынгьи йыгьнылмыршатI. АчымазагIв дрызгIаргта, ласыта йчпачIву щаквыргылра анатахъыз гIаншара щардагьи дыршIашватI. ЙанакIвызлакIгьи луыс бзита йылдыруата тшгIалырбун. Афельдшеракушер пункт рчIаджьра йазыбжата Псыжв абзазагIвчва тшанырзыналырха, лажва гIвбата йрымчпауата цхърагIара лдрадзатI. Шау Марина ауи щардала пхата йгIалгвалашвахитI. Асквш 1970-ква рагIан афельдшер-акушер пункт амбулаторията йырчпахтI. Рынхара аъаща рыцIа йагъьхатI, йапшым айъазагIвчва драйгватI. УахьчIвала амбулатория Абаза муниципальна район йа-Квта поликлиникахатI. Сквш 60 цIуата зны бзи йылбаз аъачIвагIала йынхауа Марина гIаншара щарда лыла йыцIстI, абаргвыраквагьи, анамхъараквагьи лбатI. Ауи йанакIвызлакIгьи абзазагIвчва рынцIра, рызгIвадара дазабакIуа, цхърагIара йазыбжу дизынадзауа дгIабзазитI. Лынхара азцIабырграта йазлыму гIалыркIгIауата ачIахIра грамотаква, адипломква, аразыра сальамшвъаква гIалквнадыргатI, «АзгIвадарахчара аотличник», «КЧР-ла гIатгара зму амедицина анхагIвы» чIахIра хьызква дрынкъвгагIвыпI. Шау Марина лкытлагIвчвагьи тшгIалзыназырхауа зымгIвагьи швабыжта йылзыразпI. Дызцынхауа агвыпгьи ауи ахIба уасаражвта, нхагIв гвымчIвата акIвпI дшырпхьадзауа. АйцIбачва рыхъазла дшвапхапI, дкьангьашагIвпI.