ЛКIГIАРА ДЖЬАЩАХЪВА ЗМУ АБДЖЬАРКВА РГIАРБАРА

Адыгея астолица Майкъвап апны ТВЕРДОХЛЕБОВ Николай йхъатачIв коллекцияла йалу «Оружие народов Кавказа XVII–XIX веков» зхьзу гIарбара Восток ауагIахъаква р-КъральыгIва музей а-Лагъь-КIавкIаз хъвшара апны йакIвшатI. – АгIарбара швабыжта йджьащахъван. Ауи йаланакIтI 200 айхIа йрыпшдзу акъамаква, ахIваква, ахысгаква, йапшым ашлемква, ахрихыцква. Ауат й-XII–XIX-хауа асквшышвква рагIан Тифлис, Владикавказ, Екатеринодар, Майкъвап, Кубачи рпны йдрыхIазыртI, – лхIватI агIарбара акуратор Сулейманова ФатIима. АъачIвагIагIвчва йшырхIвауала ари азкIкIра апны абджьар квпшыраква зымгIва гIарбапI. Ауи Твердохлебов Николайи адгьа ршIыйара адкIылари рацынхарала йадыргалтI. Ауат ужвы ашвъаквала йалу фильм агIаныршара йадынхалитI. АгIарбара ангIахъыртIуаз йгIадгылтI Адыгея а-Хъада КУМПИЛОВ Мурат, адунейла зыхьыз бергьльу асуратчпагIвювелир, абджьаррыхIазырыгIв адгьа ршIыйара адкIылара йалу ЕУТЫХ Ася. Ауат ргIачважвараква рпны Твердохлебов Николай атурых тынхаква рхчарала уыс ду шйырхъйаз гIалыркIгIатI. – Йапшым азаман шIчIвараква рагIан йдрыхIазырыз абджьарква, ауагIахъаква рылкIгIараква йрыуата щарда, абджьаррыхIазырра штшауацIнахуаз гIауархIвитI. КIавкIаз йауаз ажьийква, аювелирква адуней шабгазла рыхьыз бергьльын. АгIарбара злалу абджьарипхьадза йара атурых джьащахъва амапI, ауи КIавкIаз ауагIахъаква рцIасква, ртурых, айсраква рагIан хъацIарата йгIадырбуз ауысква йырпщылапI, – йхIватI Кумпилов Мурат агIарбара ангIахъыртIуаз. Ачеркес ъачIвагIагIвчва йдрыхIазырыз абджьарква гыларта кIьыда рзалхпI. Ахысгаква апистолетква, авинтовкаква, ахIваква, акъамаква щардата йгIарбапI, йынкъвызгуз рыхъазлагьи йгIауархIвуа гьмачIым. Йара ауаъа йаныргIалпI Тифлис апны й-XIXхуз асквшышв агIан йынхуз аршIыйагIв Попов Иосиф йрыхIазырыз абджьарквагьи. ЙцIыхъвахауа асквшы гIважва руацIала Твердохлебов Николай КIавкIаз абджьарква разкIкIра йадынхалуа зымгIва рацкIыс зыхьыз хъара йгаз дрыуапI. Ауи НьюДжерси йаныргIалыз акъазакъ музей аэкспонатква Кубаньла ргIахъгахрагьи дацхърагатI. «Холодное оружие кубанского казачества» монография андрыхIазыруаз Твердохлебов Николай йырхIаз ашвапхи уасаражвра злу йкьангьашракви гIадрысабаптI. Ауи культурала РФ а-Министерства апны дэксперт хъадапI, ГIвадахь Россия абджьарква рырдыррала здырраква хвы аквырцIауа хIкъральгIвчва дрыуапI, йхъатачIв коллекция агIарбара Петербург амузей, акъральыгIва этнография музей рпынква йызнымкIва йадыргалхьатI. Твердохлебов Николай Майкъвап апны йакIвшаз йхъатачIв гIарбара йзадызгалыз зымгIвагьи разыра ажва рзынайырхатI, абджьарипхьадза даквгIашIасуамца дрыквчважватI. АгIарбара ачеркес «хIачIащ» квпшыра амата йъадыргалыз зымгIвагьи йрымаджьащахъвахатI.