Гъатхэпэм и 25-м «Наша великая Победа» Дунейпсо жылагъуэ проектым ипкъ иту къызэрагъэпэща автокъэжэныгъэм хэтхэр, къалэ-лIыхъужьхэм, зауэ щIыхьым, япэ нагъыщэ зиIэ Хэку зауэшхуэм и орденыр къызыхуагъэфэща къалэхэм къабгъэдэкIахэр, ди хэгъуэгум къынэсащ. Автокъэжэныгъэм хэтхэр кърагъэблэгъэну Нэгъуей муниципальнэ районымрэ Ставрополь краймрэ я зэпылъыпIэм щыпежьащ, иужьым республикэ къалащхьэм къеблэгъахэщ. Япэ щIыкIи Черкесск къалэм дэт лIыхъужьхэм я Аллеем деж зэIущIэ щрагъэкIуэкIащ. Хэкупсэ акцэм къеблэгъащ КъЧР-м и Правительствэм хэтхэр, ЦIыхубэ ЗэIущIэм (Парламентым) и депутатхэр, Черкесск къалэ администрацэм, бэдаущ, жылагъуэ организацэхэм я лIыкIуэхэр, Хэку зауэшхуэм и ветеранхэр, еджакIуэхэр. Республикэ къалащхьэм и унафэщIхэм, депутатхэм, къалэдэсхэм къабгъэдэкIыу автокъэжэныгъэм хэтхэм фIыщIэ яхуищIу зэхуэсым деж къыщыпсэлъащ Черкесск къалэ муниципальнэ къэхъугъэм и Iэтащхьэ Беланов Евгений. Хэкупсэ акцэм хэтхэм яхъуэхъуащ Хэку зауэшхуэм и фэеплъыр хъумэным хуэгъэзауэ къызэрагъэпэщ Iуэхугъуэхэм ехъулIэныгъэ щызыIэрагъэхьэну. ИкIи, автокъэжэныгъэм хэт, «Аллея российской славы» проектым и унафэщI Сердюков Михаил Черкесск къалэм и мэрым къыбгъэдэкIа ФIыщIэ тхыгъэр хуигъэфэщащ. КъинэмыщIауэ, Беланов Евгений зэIущIэм хэтахэр щигъэгъуэзащ Черкесск къалэм дэт православнэ гимназием Сердюков Михаил езым и IэкIэ ищIа тыгъэр — Радонежский Сергий и фэеплъ сыныр зэрахуигъэфэщам. Сердюков иджыри и зы IэрыкIыр — «Хэку зауэшхуэм и зауэлI-хуиткъэщIыжакIуэ» фэеплъ сыныр республикэм и къалащхьэм къыхуигъэфэщащ. Сыныр «ХытIыгу щхъуантIэ» зыгъэпсэхупIэ паркым щагъэувынущ. Дунейпсо жылагъуэм акцэм хэтхэм захуигъэзащ КъЧР-м лъэпкъ IуэхухэмкIэ, цIыхубэ коммуникацэхэмрэ печатымрэкIэ и министр Кратов Евгений. —Мы Iуэхугъуэм къегъэлъагъуэ дуней псом цIыхуу тетым мамырыгъэр къытхуэзылъэща, зи щхьэ зауэ иным хэзылъхьахэм я фэеплъыр зэрытщымыгъупщэр. Ди республикэм щыщу цIыху мин 22-рэ Хэку зауэшхуэм хэкIуэдащ. ТекIуэныгъэ Иныр къытхуэзыхьа дэтхэнэми — ди щхьэр яхудогъэщхъ. Дэтхэнэ ветеранри ди гум илъщ, тщыгъупщэкъым. ФIыщIэ яхудощI мы акцэр къызэзыгъэпэщахэм, ди блэкIар тщызымыгъэгъупщэхэм, ди нэхъыжьхэм я щапхъэм дытетыну дыхуэзыгъэушхэм, — жиIащ министрым. ПэкIум къыщыпсэлъащ Черкесск къалэм и ветеранхэм я Советым и тхьэмадэ Никагосов Рафаэл, Хэку зауэшхуэм и ветеран Маху Мусэ, еджакIуэхэр. — Лъэпкъ зэхуэмыдэ куэд зыщыпсэу Урысейм и тхыдэм деж Хэку зауэшхуэм и напэкIуэцIхэр гъэнщIащ нэщIэбжьэ инкIэ, хэщIыныгъэшхуэкIэ. Ауэ абы дригъэгупсысын хуейщ нэхъри хэкупсэу дыщытыным, ТекIуэныгъэ Иныр къытхуэзылъэщахэм зэрахьа лIыгъэм, хахуагъэм, хэку фIылъагъуныгъэм дыхуэпэжыным, ахэр дгъэщыпкъэным. Тщыгъупщэ хъунукъым ди адэхэм, адэшхуэхэм я гъащIэр щIатар, зэрахьа лIыхъужьыгъэр. Хэку зауэшхуэм щыгъуэ лъэпкъхэр зэрызэкъуэувам хуэдэу дызэкъуэтмэ, дэркIэ шынагъуэ щыIэнукъым, — жиIащ проектым и унафэщI Слюсаренко Олег. Акцэм и къызэгъэпэщакIуэм къызэрыхигъэщамкIэ, илъэс еплIанэ хъуауэ автокъэжэныгъэр къызэрагъэпэщ. Мы гъэм акцэр ирахьагъэххэщ къалэ 13-м. Зэхэту къалэ 90-м екIуэлIэну ягъэбелджылащ. Къэпсэлъэныгъэхэр зэфIэкIа нэужь, Хэку зауэшхуэм хэкIуэдахэм я фэеплъу дакъикъэкIэ щыму щыта нэужь, мафIэ Мыужьыхым и лъабжьэм удз гъэгъахэр щагъэтIылъащ. КъыкIэлъыкIуэуи, метр зэбгъузэнатIэ 200 ТекIуэныгъэм и Ныпыр лIыхъужьхэм я Аллеем деж щаубгъуащ… Источник: riakchr.ru Предыдущая новость 982 просмотров Следующая новость Читайте также Натхъуэхэ зэкъуэшитIри — «ЦСКА»-м 11.09.2015 336 IэнатIэщIэм пэрагъэхьащ 25.09.2015 469 Получайте свежие новости на электронную почту Подписаться Комментарии Написать
Комментарии