Сентябрь а 28 жвасквша цІытІ абаза уысагІв
бергьльы ТЛЬАБЫЧА
Мира СахІатгьари йпхІа дхІылахмищтара. Абаза хІвсыса рыуа зымгІва
рапхъа ауысара гІащтІызхыз, йапхъахауата Горький Максим йыхьыз зхъу
Москва литература институт йгІалгаз, йапхъахауата СССР агІвгІвчва
р-Союз йнарахвыз йгьи
«Къарча-Черкес ауагІа
руысагІв» хьзы гІазквнадыргаз Мира лакІвпІ.
Йгвыбзыгъаз, апхъанчІви
хІвсыса рапш йщаквкІыз
ахъвыжв бзыльхвагІа абаза литература атшауацІыхра къару ду алалцІатІ, абаза уагІа шабгу
рыхв щтІылхуа дынхатІ,
дбзазатІ. Ауи лыршІыйара ахъазла хІкъраль
уагІвстагьи зыхьыз бергьльу ауысагІвчва Кулиев
Къайсын, Друнина Юлия,
Львов Михаил, Ладонщиков Георгий ажва пха
щарда рхІватІ.
Мира литература институт дапхьаркІвауата «Азпшра» йапхъахауа лазкІкІра гІацІцІтІ. Ауи агІвгІвчва шІаква йхвбахуз
р-КъральыгІва семинар
далан, лыршІыйара агІвгІвчва р-Союз аунашвачпарта алапшын, хвы
азырбатІ. Ауи амщтахь
Мира агІвгІвчва р-Союз
днарахвтІ, луысакви лпоэмакви урышвла йгІацІцІтІ.
Мира лгІвыраква «Советская женщина», «Дружба
народов», «Крестьянка»,
«Дон», «Ставрополье»,
«Литературная газета»,
«Литературная Россия»
журналква йызнымкІва
йгІарыншвалтІ.
Тльабыча Мира сквшщарда ареспублика гІвырагІацІщтырта редактор
ахІбата дынхатІ. Абаза
бызшвала агвацпа литература гIвыраква агIацIщтра йаззрыхIазыруаз Мира луыс нардзан, абаза
гІвгІвчва лажва йазылрыдзыргІвырныс лылшун.
АуысагІв бергьльы
ЧквтІу Микаэль «Ашахв
сазпшуата» Мира лкнига апхъажва азигІвуата
араса йгІаликІгІатІ: «Сара ауысагІв Тльабыча Мира хвы зылзызбауа ари
акІвпІ: луыса чІвырхъаква лчпауищтара луысара зынгьи мцы гьалмырхІватІ. Абзазара ацІабырг
дгьакъвымцІтІ…».
Тльабыча Мира абаза
хъачва гІвгІвчва къалата
йылпхьадзун. Дызцынхарныс лынасып йгІанакІыз Джыр ХІамид, Цекъва Пасарби, Джьгватан Къали, ЧвзыкІьа ШахІымби, ЧквтІу Микаэль,
Мыхц Кьарим рыршІыйара лкІгІараква, рхІальква шаъаз, абаза литература бызшва ащаквгылра апны уыста йдырхъйаз йауацІыхта йызнымкIва дгІарыквчважватІ.
Ажва аламкІва, ауысагІв
лщаквгылра апны ахІбачва рбжьагажва гвыбзыгъаква магІын ду рыман.
Мира гвылагьи псылагьи драйгвыргъьун акъальам гІащтІызхыз ахІвсса. «АлахІ сйыхІвитІ ари
ахачІвборч йгІащтІысхыз
ацІыхъвадза йнадырдзахныс абаза уысара ажвгІванд гІазыркІкІаз ахІвсса», – йгІалылкІгІатІ ауи
лгІвыракІ апны.
АуысагІв бергьльы абаза йгьи урышв бызшвала
жвыхв книгакІ гІацІылщттІ.
«Азпшра», «ЙырзысшатІ
сгвы», «Квырмыш узысчпитІ, амамыр!», «Йнашхыйу, йлашару сдуней»,
«Акаца шкІвокІваква»,
«Ашахв сазпшуата», «Ари
адуней, съадзакву» датшагьи луысаква разкІкІраква Къарча-Черкес
шабгу ауагІахъа литература дырбайатІ. Ауи лыршІыйара йгІаквчважватІ
йбергьльу абаза уысагІвчва ТхIайцІыхв Бемырза,
Мыхц Кьарим, ЧквтІу Микаэль, Апса ФатІимат,
ацІбацІбагІв ТІыгв Владимир.
Мира бзи йылбуз акаца шкІвокІва чкІвын луысаква рпны йкъагІитІ,
йгІвахитІ, йкІапІлахитІ.
Ауасамца – сквшигІадзагьи. ЙшыгІбауа апшта,
ауи абзазара гьшІчІвум,
ауаса йанаъазара, Мира
луысаква рынцІрагьи цІыхъва гьрымазлушым.
АуысагІв адуней анылхІваджь амщтахь лхъапщыла ТхІакІвщын Евгений, лымхІв ГьадгвычІва
Мурат, лпа СултІан, лпхІа
Джьана, лтаца Мадина
гІвтомкІла йалу луысаква разкІкІраква асквш
2012 агІан йгІацІырщтын, апхьагІвчва согІата
йрырттІ.
Ауат йрыпхьалакІгьи
йхъа, йылахь, йбзазара
йырзынарху гІаликІгІитІ,
ауысагІв йцІолу лфилософия хъвыцраква даргьи йшырзаргвану, зыршIыйара заджвы йчIвгьи
йапшым Мира тынха байа шхIызгIанылжьыз рылархІвитІ
Получайте свежие новости на электронную почту
Комментарии